Yă Rơ Châm H’Yéo, oei lơ̆m phương Pleiku, dêh char Gia Lai - sơ̆ jang lơ̆m Khul kơdră chĕp pơgơ̆r Đảng dêh char, Kơdră so chĕp pơgơ̆r Hơnih jang Mặt trận Tổ quốc Việt Nam dêh char Gia Lai, lăng kơjăp kơtang rim kơtơ̆ng ang găh Hop akŏm tih kơdră tang măt lơ̆m teh đak ‘măng mă XIV kơ Đảng.  Yă H’Yéo tơbăt, gơnơm tơdrong chĕp pơgơ̆r păng lăng ba kơtang đơ̆ng Đảng hăm tơring kon kông, tơdrong hơrih sa kơ kon pơlei oei lơ̆m dêh char Gia Lai pơma hơdrô̆ păng Tây Nguyên pơma atŭm hlôi tŏk kơtang păng tơplih tôm tong. “Kon pơlei Tây Nguyên ling lang mĭnh nơ̆r ƀơ̆r đon kiơ̆ Đảng, kiơ̆ Ƀok Hô. Hơpơi ăn Đảng bơ̆n hơnơ̆ng lăng ba, pơjing rơvơn ăn Tây Nguyên hơnơ̆ng atŏk tơ iung mŭk drăm, oei sa joh ayŏ, pơtho pơhrăm, hăm trong tơ iung pơjing Tây Nguyên pơdrŏng găh muk drăm, đei lơ bơngai gơh hơgei. ‘Nou jĭ dôm tơdrong kăl hloh”.

Kiơ̆ trong lăng đơ̆ng bơngai lơ sơnăm vang iung jang pơchoh trong păng pơrô̆ jang kiơ̆ trong bơ̆ jang tơgŭm djru kon kông, ƀok Ksor Phước (oei tơ̆ Gia Lai) - Sơ̆ bơ̆ jang lơ̆m Khul kơdră chĕp pơgơ̆r Trung ương Đảng, Kơdră so Kơdră dơnơm, Kơdră chĕp pơgơ̆r Hơnih bơ̆jang vei lăng kon kông păng rim trong jang tơgŭm ăn tơring kon kông kơ Khul kơdră chĕp pơgơ̆r Teh đak - sơkơ̆t hơdăh, bơ̆ jang vei lăng kon kông păng tơdrong jang tơgŭm djru ăn tơring kon kông hlôi đei Đảng păng Teh đak tơlĕch jang kơtang. Ƀok Ksor Phước lui lơ̆m jăl ‘nao, Đảng păng Teh đak gô lăng ba kơjăp tơlĕch jang kiơ̆ jơnei rim tơdrong oei sa joăt joe sơ̆ ki, hơnih bri brăh ‘lơ̆ng liĕm, hơnih gru gra gĭt kăl dăr sơnăm vă atŏk tơ iung jang kmăi kmŏk joh ayŏ, tơmang pơhiơ̆ kơjăp ‘lơ̆ng, tơklep tŏk mŭk drăm hăm vei răk tơƀăk mong atok tơ iung tơdrong oei sa joăt joe sơ̆ ki. “Tơdrong kon kông ling lang tơdrong kăl mă rim ayăt ‘meh vă pơlơ̆m vă pơchôih, phă pơrăm tơdrong tơgoăt tơgoăl pôm nơ̆r ƀơ̆r đon hơdrĕch hơdrung. ‘Lơ̆ng hloh ‘noh kăl pơjing ‘lơ̆ng tơdrong kon pơlei vang vei lăng sơđơ̆ng Teh đak, atŏk kơtang kon pơlei vang iung jang, hơmet pơ ‘lơ̆ng tang găn hơlou lơ̆m trong atŏk tơ iung mŭk drăm tơpôl. Atŏk tơ iung mŭk drăm vă atŏk kơtang vei lăng sơđơ̆ng dơ̆ng teh đak păng sơđơ̆ng dơ̆ng kơjăp teh đak vă atŏk tơ iung mŭk drăm. ‘Nou jĭ tơdrong mă ba hơpơi ‘meh vă hloh hăm jăl truh ou kơnh kơ Đảng hăm tơdrong lơ̆m teh đak, mă kăl hăm tơring kon kông tơ̆ Việt Nam”.

Tơ̆ tơring Tây Bắc, kon pơlei kon kông jei tŏk bŏk lăng truh Hop akŏm tih kơdră tang măt lơ̆m teh đak ‘măng mă XIV kơ Đảng, pơtruh ăn jơhngơ̆m đon hơmŏ lơ̆m dôm tơdrong tơchơ̆t kăl kơ Đảng lơ̆m jăl trong atŏk tơ iung ‘nao. Ƀok Nguyễn Văn Độ, đảng viên oei lơ̆m pơlei Hưng Hà, tơring Chiềng Khương, dêh char Sơn La hơmŏ Hop akŏm tih ‘măng mă XIV gô hơnơ̆ng tơlĕch đei dôm trong jang gĭt kăl hloh, đunh đai tai sơnăm, trŏ lăp hăm yan ou kơ tơring kon kông, mă kăl ‘noh lơ̆m atŏk tơ iung mŭk drăm tơklep hăm tơjur dơnuh kơjăp ‘lơ̆ng.“Nhôn hơpơi ‘meh vă Đảng păng Teh đak hơnơ̆ng pơjing rơvơn ăn kon pơlei choh jang sa đei tŏk iŏk kon jên lơ hloh dơ̆ng. Adoi hơnơ̆ng pơtrŭt rim hơnih mơdro sa tơmơ̆t jên jang pơm tơlĕch tơmam drăm choh jang sa tơ̆ tơring atăih yăih, nhen pơm tơlĕch tơmam drăm choh jang sa, rong kon tơrong, ka hơdang vă hơnhăk đei iŏk yoa kơjăp ăn kon pơlei”.

Kang ƀô̆, đảng viên păng kon pơlei tơring Chiềng Khương, dêh char Sơn La jei tơbăt jơhngơ̆m đon hơpơi ‘meh vă rim Tơdrong jang tơm teh đak hơnơ̆ng đei tơlĕch jang kiơ̆ hrơ̆p mĭnh ‘măng, jơnei, mă kăl ‘noh Tơdrong jang atŏk tơ iung mŭk drăm-tơpôl tơring kon kông păng groi kông, đei lăng jĭ kăl hloh tơgŭm ăn kon pơlei đei dơ̆ng kon jên tơmơ̆t choh jang sa, pơm sơđơ̆ng hơrih sa. Ƀok Đào Việt Phương, Kơ iĕng Kơdră chĕp pơgơ̆r Đảng tơring Chiềng Khương tơbăt:“Nhôn lui kơjăp păng hơmŏ Hop akom tih ‘măng mă XIV kơ Đảng gô hơnơ̆ng tơlĕch dôm trong jang, tơdrong tơgŭm djru trŏ lăp hloh, pơjing đei jơhngơ̆m pran kơtang ăn atŏk tơ iung mŭk drăm-tơpôl kơjăp ‘lơ̆ng lơ̆m jăl ‘nao. Kon pơlei hơpơi ‘meh vă hơnơ̆ng lăng ba kơjăp truh tơdrong choh jang sa; đei trong tơgŭm djru tơpă tơgŭm ăn choh jang sa kiơ̆ pơm tơlĕch tĕch mơdro. Adoi hơmŏ Đảng hơnơ̆ng đei trong jang, trong tơgŭm djru atŏk tơ iung muk drăm-tơpôl trŏ lăp hăm tơring sơlam teh đak nhen atŏk tơ iung mŭk drăm ‘măng sơlam teh đak.