Dôm năr ou, trong man đơ̆ng tơring Mdrak mơ̆t tơ̆ ƀuôn M’Suốt brông ƀrang hla kơ ƀrê sơnglŏng dreng, pano pơrô̆ tơbăt găh Hop akom tih mă XIV kơ Đảng. Lơ̆m jơhngơ̆m đon chơt hơ iă ‘nă hal pơyan jang sa iŏk yoa kơjăp, đảng viên Y Liêu Niê, hơdrung Êđê oei tơ̆ ƀuôn M’Suốt tơring Mdrak tơbăt, jang kiơ̆ tơdrong jang pơting dih băl kơ kuh chơt hơ iă Hop akŏm tih, kon pơlei hơdrin pơtăm kơtao, chehphe, tiu, sâu riêng, rong kon tơrong, jang sa roi năr roi tŏk lơ, gơnơm đơ̆ng noh tơdrong hơrih sa kơ kon pơlei roi năr roi sơđơ̆ng. Hrei ou chi ƀô̆ pă đei ŭnh hnam dơnuh, lơ̆m ƀuôn lăp pă 11 lơ̆m 172 ŭnh hnam. Lăng truh Hop akŏm tih mă XIV, đảng viên Y Liêu Niê pơtruh nơ̆r hơmŏ.“Kon pơlei hơpơi ‘meh vă Đảng păng Teh đak hơnơ̆ng lăng ba, tơmơ̆t jên jang dơ̆ng rim tơdrong jang atŏk tơ iung trong nơnăm, đak sŏ nha  rơgoh, pơnơ̆t đak, hnam trương hŏk, hnam pơgang; adoi đei lơ trong jang tơgŭm djru ăn đe hơ ioh kon kông đei hŏk pơhrăm tôm , hŏk tơdrong jang, đei tơdrong jang sơđơ̆ng, đơ̆ng noh tơgop tơ iung pơjing pơlei pơla roi năr roi pơdrŏng păng atok tơ iung.”

Ngê̆ nhân Hring Mlô, 68 sơnăm, bơngai Êđê oei lơ̆m ƀuôn M’Găm, tơring Mdrăk tơbăt, jăl jang ou ki, gơnơm tơdrung lăng ba đơ̆ng Đảng păng Teh đak atŭm hăm tơdrong hơdrin đơ̆ng kon pơlei, tơdrong hơrih sa kơ kon pơlei lơ̆m pơlei roi năr roi atŏk tơ iung, tơdrong oei sa joăt joe ‘lơ̆ng rŏ sơ̆ ki đei vei kơjăp. Kơdih yă atŭm hăm rim bơngai ‘lŏ kră lơ̆m pơlei jei hơdrin vei răk tơdrong jang dui vai vai tanh khăn, pai tơdrô ge dăh mă dôm tơdrong oei sa joăt jeo sơ̆ ki ... vă kơ hoei hiong hiơt. Mă lei, vă kĕ vei kơjăp, đơ̆ng rŏng Hop akom tih yă hơpơi ‘meh vă kơdră kơpal, rim hơnih jang hơnơ̆ng đei dôm trong bơ̆ jang tơgŭm djru trŏ ƀlep, tơklep kơjăp dih băl găh atŏk tơ iung tơmang pơhiơ̆ pơlei pơla hăm vei răk tơƀăk mong tơdrong oei sa joăt joe sơ̆ ki kơ bơngai Êđê. Ngê̆ nhân Hring Mlô tơma.“Mir nhôn đei trong Đông Trường Sơn găn hloh păng 1ha 4 sao teh hlôi pơtăm chehphe, ‘long sa plei păng pơjing đei hnam pơtăm. Ba băt pai tơdrô ge, tanh brai păng pai por ‘nhot kơ bơngai Êđê. Đơ̆ng rŏng hop akŏm tih, hơpơi rim kơdră kơpal, hơnih jang tơgŭm djru vă ŭnh hnam atŭm hăm kon pơlei lơ̆m ƀuôn M’Găm atŏk tơ iung tơmang pơhiơ̆ pơlei pơla, tơklep hăm tơdrong vei răk tơƀăk mong tơdrong joăt joe dui brai vai tanh khăn, tôn chĭng chêng. Dang ei trong nơnăm hlôi ‘lơ̆ng liĕm, tơdrong jang tơmang pơhiơ̆ jei ƀônh ƀŏ hloh kơsơ̆, mă lei kăl đei tơdrong tơgŭm djru pơchoh trong đơ̆ng Đảng păng Teh đak”.

                   Kơ iĕng Bí thư Đoan xah M’Drak Y Khương Mlô ăn tơbăt, đe sơnăm mơlôh hơnơ̆ng đei lăng jĭ “kŏng ti gah 'ma ăn kơ Đảng”, mă kăl noh lơ̆m khei năr đơ̆ng rŏng kơ tơmơ̆t hơdai. Pơm kiơ̆ tơdrong jang pơlong sơng kơ kuh kơ Hop akŏm mă 14 kơ Đảng, đoan viên, hơdruh tơdăm xah M’Drak hlôi hăt hot vang jang lơ tơdrong kăp gĭt. Hloh 2.550 đoan viên vang akŏm hơpuih pơ-'nguaih cham char, hơtol hla kơ, băng rôn, pano tơroi tơbăt gah Hop akŏm. Mă kăl đơ̆ng khei 7/2025  truh dang ei, dôm jĭt rơbou đoan viên hlôi pơtho kon pơlei pơm keh đang hla bơ-ar hanh chĭnh, akŏm chih VNeID, tơgop tơgŭm ăn jơnŭm pơgơ̆r tơring pơm jang tơnăp hloh. Lăng truh Hop akŏm mă 14, 'nhŏng Y Khương Mlô pơtruh nơ̆r hơpơi 'meh: “Đơ̆ng rŏng Hop akŏm 14 kơ Đảng, inh hơpơi 'meh đe sơnăm mơlôh nhôn pơtoi đei hŏk pơhrăm, hơtŏk tơdrong hlôh vao, đei tơgŭm vă gơh akŏm dôm tơdrong hlôh vao 'nao, đei trong hiôk vă hơbĕch hơbal hloh lơ̆m tơdrong tơplih kơmăi kơsô̆; atŭm hăm noh vang vei răk tơƀăk mong um ai joh ayŏ juăt jue păng dôm tơdrong jang akŏm ăn đoan viên, hơdruh tơdăm hơ-ioh iĕ”

          M’Drak đei hloh 22.000 măt bơngai, jê̆ 40% 'noh kon pơlei kon kông; Đảng ƀô̆ xah đei jê̆ 1.200 đảng viên akŏm hŏk hôp tơ̆ 56 hơnih jang đảng. Hăm đon lui kơ Đảng păng Hop akŏm 14, đơ̆ng đảng viên, kon pơlei truh đe đoàn viên, hơdruh tơdăm tŏk bŏk oei pơlong jang vei răk tơƀăk mong joh ayŏ, tơgop pơjing jơnŭm pơgơ̆r tơring kơjăp kơtang, tơdrong hơpơi 'meh 'măng Hop akŏm đei jơnei keh kong, pơih minh jăl jang hơtŏk tơ-iung 'nao ăn pơlei pơla.