Tơ̆ pơsat ƀok  Trần Phú, Tổng Bí thư mă blŭng kơ Đảng cộng sản Việt Nam, Tổng Bí thư Tô Lâm atŭm hăm Khul kơpal kơ Trung ương truh plang pơkao, plang hlôt nhang ƀlŏk hơdơ̆r, pơyom, hmach bơnê kăp gĭt hăm dôm tơdrong plang tih tên đơ̆ng ƀok Trần Phú lơ̆m tơdrong jang kăch mang nuih mơng kơ Đảng păng kơ kon pơlei Việt Nam. Bơngai jang kăch mang đei đon bơnôh 'lơ̆ng, bơngai linh cộng sản nuih mơng kơ ƀok Trần Phú ling lang ang hơdah, vă lơ chăl kang ƀô̆, đảng viên păng tôm kon pơlei hŏk ƀoi, yuk kiơ̆.

Pơtoi kơ noh, tơ̆ Hơnih Gru grua kăp gĭt kơ teh đak Ngã ba Đồng Lộc, Tổng Bí thư Tô Lâm păng Khul Kơpal kơ Trung ương hlôi plang hlôt nhang, plang kơvang pơkao tơ̆ Hnam ƀlŏk tơbăt đe linh mơlôh lôch tang lơ̆m jơ̆p teh đak păng pơsat kơ 10 drăkăn lôch tang tơ̆ Ngã ba Đồng Lộc. Tơdrong plang nuih mơng đơ̆ng đe hơdruh ou hlôi jing um pơtih ăn tơdrong plang tih tên hăm kơ triu hơdruh tơdăm kơyuơ teh đak mă hiơt dơh po, hiơt hloi sơnăm mơlôh kơyuơ tơdrong tơblah pơrơngei kon pơlei, rơngei hiôk hian ăn teh đak.