Kơdră teh đak pơma hơdăh tơdrong 2 păh tơchơ̆t pơm hơtŏk tơdrong pơvei jang jang hơdoi gĭt kăl tôm tơdrong, tơdrong jang hơdoi kơjung hlŏh, tơƀôh hơdăh tơdrong năng kăl păng đon adrin chinh trĭ đơ̆ng 2 păh vă hơnhăk tơdrong pơvei Việt Nam - EU jing mĭnh trong jang hơdoi ‘lơ̆ng hơiă.

Kơdră Anih vei lăng châu Âu António Costa akhan, tơdrong pơm hơtŏk tơdrong pơvei đơ̆ng EU păng Việt Nam jing jang hơdoi gĭt kăl tôm tơdrong jĭ 1 tơdrong tơchơ̆t gĭt kăl lơ̆m jơhnơr arih, atŭm hăm ‘nŏh tơƀôh hơdăh trong jang đunh đai năm truh ning mônh kơnh đơ̆ng 2 păh. Drơ̆ng nơ̆r âu iŏk đei đơ̆ng rŏng 35 sơnăm jang hơdoi kơjăp ‘lơ̆ng, tơƀôh hơdăh jăl trong jang tŏk pran lơ̆m tơdrong pơvei EU - Việt Nam ‘moi kiơ̆ tơdrong pơm tơbôl, lui băl, năng kăl băl păng nơ̆r pơkăp  atŭm yoa tơdrong rơngei, hơnŭk hơnoa.