Tơ̆ ƀuôn Kđoh, tơring Cư Pơng, dêh char Dak Lăk, bơ̆ jang pơrô̆ tơbăt găh năr pôk rơih đei iung jang đơ̆ng khei 11 sơnăm hơdrol. Atŭm hăm hơtol  ƀăng rôn, áp phích tơ̆ rim trong tơm, pơtho tơbăt kiơ̆ rapor lơ̆m aloa, kơdră tơring oei iung jang kơtang pơgơ̆r hop akŏm tơroi tơbăt hloi ăn kon pơlei lơ̆m pơlei, pơgơ̆r hop akom tơroi tơbăt găh khôi luơ̆t. Adoi chih tơbăt dôm tơdrong kơtơ̆ng ang, hla hla bơar pơrô̆ tơbăt lơ̆m mạng tơpôl păng lơ̆m kơtơ̆ng ang hơnih bơ̆ jang vă tơroi tơbăt truh hăm kon pơlei pơla.

Ƀok Y Hoh Niê, Kơdră chĕp pơgơ̆r hơnih Bơ̆ jang Măt trân ƀuôn Kđoh tơroi tơbăt, dôm nơ̆r pơrô̆ pơrôp akŏm pơtho tơbăt ăn bơngai tăh hla jang kiơ̆ hơnăp jang pôk rơih ƀlep tơdrong tơchơ̆t, chă rơih dôm bơngai ‘lơ̆ng, hơgei tang măt ăn kon pơlei.“Tơblang hơdăh ăn kon pơlei hlôh vao păng năm tălh hla trŏ lăp vă rơih dôm bơngai tang măt tơpă đei jơhngơ̆m đon ‘lơ̆ng trŏ lăp ăn tơdrong tang măt ăn kon pơlei, bơ̆ jang tơnăp vă hơnhăk đei tơdrong iŏk yoa păng tơgŭm ăn kon pơlei đei tơdrong hơrih sa ‘lơ̆ng hơ iă hloh. Nhôn gô tơgoăt iŏk jang kiơ̆ dôm nơ̆r pơrô̆, nơ̆r pơchoh ăn đơ̆ng kơdră kơpal păng tơblang hơdăh ăn kon pơlei jang kiơ̆ ƀlep, vă ‘măng pôk rơih đei pơgơ̆r jơnei ‘lơ̆ng hơ iă”,

‘Moi kiơ̆ bơ̆ jang pơrô̆ pơrôp, pơtho tơbăt, rim tơdrong kơtơ̆ng ang găh pôk rơih đei pơtruh ăn tôch hơdăh, bơngai tăh hla jei pơtruh ăn dôm tơdrong hơpơi ‘meh vă ăn dôm bơngai đei rơih pơm bơngai tang măt, ‘noh dôm bơngai đei tôm tơdrong rơvơn trŏ lăp kiơ̆ khôi luơ̆t, adoi jei kăl hlôh vao tơdrong oei sa joăt joe sơ̆ ki, tơjê̆ hăm kon pơlei păng pơma tơbăt hơdăh dôm nơ̆r pơma sa đơ̆ng kon pơlei pơla kơdih. Yă amí Lip, oei lơ̆m ƀuôn Ea Klok, tơring Cư Pơng, tơbăt:“Ĭnh ‘meh vă pôk rơih truh ou kơnh rơih đei bơngai ‘lơ̆ng, hơgei, ling lang lăng ba kon pơlei, ưh kơ chă jô̆ bơngai ou pơdrŏng dăh mă bơngai to dơnuh. Ling lang tơklep, lăng ba kon pơlei, hlôh vao tơdrong oei sa joăt joe sơ̆ ki, hlôh vao tơdrong hơrih sa kơ kon pơlei, pơ̆n pơma tơbăt hơdăh dôm nơ̆r tơgop đơ̆ng kon pơlei pơla bơ̆n”.

Kiơ̆ đơ̆ng Hơnih vei lăng pôk rơih dêh char Dak Lăk, truh dang ei, tơdrong hop akŏm ‘măng mă blŭng hlôi drơ̆ng nơ̆r 28 ‘nu bơngai chih hơnăn ăn pôk rơih vă rơih iŏk 15 ‘nu bơngai tang măt Kuô̆k hô̆i jăl XVI, lơ̆m ou đei 5 ‘nu bơngai kon kông, 9 ‘nu bơngai drŏ kăn păng 1 ‘nu bơngai sơnăm mơlôh. Hăm bơngai tang măt Jơnum vei lăng kon pơlei dêh char đei 148 ‘nu vă pôk rơih đei 84 ‘nu. Tơ̆ tơring, lơ̆m dêh char gô vă pôk rơih 2.445 ‘nu bơngai tang măt Jơnŭm vei lăng kon pơlei.

Tơ̆ tơring, tơdrong pơkoel proh hơmet bơngai tang măt, mă kăl bơngai drŏ kăn păng bơngai kon kông đei lăng kơjăp đơ̆ng ‘măng pơgơ̆r hop akŏm blŭng a hloi. Yă H Hương B.Krông, Kơdră chĕp pơgơ̆r Hơnih bơ̆ jang MTTQ Việt Nam phương Ea Kao, dêh char Dak Lăk akhan:“Hơnăp jang hơnih dơ̆ng kơ bơngai dro kăn roi năr roi đei lăng kơjăp, gô tang măt ăn nơ̆r pơma kơ bơngai tăh hla bơ̆n, pơma tơbăt dôm tơdrong hơpơi ‘meh vă đơ̆ng kon pơlei, mă kăl lơ̆m ou ‘noh găh drŏ kăn. Lơ loh ‘noh tơdrong proh hơmet bơngai drŏ kăn, bơngai kon kông jĭ mĭnh trong proh hơmet ăn tôch trŏ lăp, sơđơ̆ng ăn tơdrong đei iŏk yoa hăm dôm bơngai ou lơ̆m tơdrong chih hơnăn ăn pôk rơih. ‘Nou jei jing mĭnh păh tơƀôh hơdăh găh tơdrong đei iŏk yoa mĭnh păh jei sơnong jang păng jei jing hơnăp jang trăp trĭn hăm bơngai đei chih hơnăn ăn pôk rơih”.

Lơ̆m jơ ‘năr đei tơdrong tơplih găh tơring păng pơlei pơla đơ̆ng rŏng hơgrop, bơ̆ jang hơmet ăn pôk rơih tơ̆ Dak Lăk đei sơkơ̆t hơdăh jĭ tơdrong jang chinh trĭ tơm dơnơm, vă proh hơmet ‘lơ̆ng păng iung jang hơdoi kơjăp đơ̆ng rim tơring, hơnih jang. Tơdrong dăr lăng, hơmet ming proh hơmet hơdrol, hơdrĕch hơdrung păng măt bơngai chih hơnăn ăn pôk rơih đei iung jang ‘lơ̆ng, ƀlep hăm tơdrong tơchơ̆t, pơm trong kơnăl ăn rim ‘măng hop akŏm proh hơmet đơ̆ng rŏng ou kơnh.

Kiơ̆ đơ̆ng yă Cao Thị Hòa An, Kơ iĕng Ƀĭ thư Đảng dêh char, Kơdră chĕp pơgơ̆r Jơnŭm vei lăng kon pơlei dêh char, Kơdră chĕp pơgơ̆r Hơnih vei lăng pôk rơih dêh char Dak Lăk, rim tơdrong jang hơmet ăn tŏk bŏk tơlĕch jang kiơ̆ ‘lơ̆ng, sơđơ̆ng păng ƀlep hăm tơdrong pơkăp ‘lơ̆ng kơdră tang măt.“Rim tơdrong jang truh dang ei ‘noh Hơnih bơ̆ jang pôk rơih jei hlôi iung jang hơdoi păng bơ̆ jang ‘lơ̆ng păng keh đang hrôih hloh trong pơkăp ăn. Lơ̆m khei năr kơnh hơnơ̆ng iung jang dôm tơdrong jang pơm sơđơ̆ng ƀlep tơdrong tơlĕch ăn, proh hơmet khul kơdră tang măt păng tơdrong pơkăp ‘lơ̆ng bơngai tang măt kiơ̆ ƀlep tơdrong tơchơ̆t”.

Sơđơ̆ng proh hơmet bơngai tang măt ‘noh bơngai kon kông păng drŏ kăn lơ̆m pôk rơih ưh khan lăp trŏ ƀlep tơdrong pơkoel đơ̆ng khôi luơ̆t, mă oei tơgop hơmet pơ ‘lơ̆ng jơhngơ̆m đon lui đơ̆ng bơngai tăh hla. Hăm tơdrong kăl đei lơ hơdrĕch hơdrung oei sa nhen Dak Lăk, tơdrong sơđơ̆ng proh hơmet khul jang lơ̆m pơgơ̆r pôk rơih gô pơjing ‘lơ̆ng ăn tơdrong iung jang hơnăp jang tang măt kơ rim hơnih bơ̆ jang kon pơlei pôk tơmơ̆t, pơjing đei tơdrong lăp đon, drơ̆ng mĭnh nơ̆rt lơ̆m rim kon pơlei pơla.