Cham hop akŏm thôn Đoàn, tơring sơlam teh đak Ia Lốp, dêh char Dak Lăk hlôi hơmet pơ ‘lơ̆ng. Chih chư “Kơ kuh chơt hơ iă ‘măng pôk rơih Kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp, jăl jang 2026 – 2031” đei hơtol tơ̆ hơnăp ‘măng jang. Ƀok Huỳnh Quang Phấn, Thon trơng thôn Đoàn, tơring Ia Lốp tơbăt:“Thôn Đoàn ‘măng mă ou gô sơng hơvơn đei vă jê̆ 300 ‘nu bơngai tăh hla vang năm pôk rơih Kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp, lơ̆m năr 15/3 kơnh. Vă pơvih pơvăn ‘lơ̆ng ăn bơ̆ jang pôk rơih, thôn hlôi đei tơpôl tơgŭm ăn kon jên ming hơmet hnam hop akŏm. Khul kơdră chĕp pơgơ̆r thôn tŏk bŏk pơrô̆ hơvơn kon pơlei vang iung jang atŭm hăm khul kŏng ang, yân kuân păng ƀô̆ đô̆i vei lăng sơlam teh đak tơgop năr jang, ming hơmet hnam hop akŏm, kơƀang tang dŏ, sơđơ̆ng hơnih ‘lơ̆ng rŏ, trŏ lăp hăm tơdrong ‘meh vă kơ năr pôk rơih”.

Ƀok Bùi Sỹ Đông tơ̆ thôn Đoàn tơbăt, jô̆ đơ̆ng lĕch đơ̆ng dêh char Bến Tre năm tơ̆ tơring sơlam teh đak dêh char Dak Lăk jang sa, hơrih sa vă jê̆ 30 sơnăm, ‘nou jĭ ‘măng pôk rơih mă 5 ƀok vang năm tah hla pôk rơih kơdră tang măt Kuô̆k hô̆i păng Kơdră tang măt Jơnŭm vei lăng kon pơlei rim kâp. Hăm ƀok, tơdrong đei năm pôk rơih ou jing jơ ‘năr gĭt kăl hloh:“.Măng pôk rơ̆ih Kơdră tang măt Kuô̆k hô̆i, Jơnŭm vei lăng kon pơlei truh ou kơnh, ba jei tôch hơmŏ gô pôk rơih đei dôm bơngai đei jơhngơ̆m đon ‘lơ̆ng, bơ̆ jang hơgei, tơnăp, chông ba, chĕp pơgơ̆r kon pơlei nhôn; tang măt ăn jơhngơ̆m đon, nơ̆r pơma kon pơlei truh hăm Đảng, hăm Teh đak vă dôm tơdrong mă ưh kơ ‘lơ̆ng hơ iă lơ̆m tơring đei xek tơlang keh đang ‘lơ̆ng. Adoi, lăng ba atŏk tơ iung trong nơnăm adoi nhen hnam pơgang tơ̆ tơring sơlam teh đak đơ̆ng rŏng hơgrop”.

‘Măng pôk rơih Kơdră tang măt Kuô̆k hô̆i păng Kơdră tang măt Jơnŭm vei lăng kon pơlei 2 kâp, jăl jang 2026 - 2031, tơ̆ tơring sơlam teh đak Ia Lôp, dêh char Dak Lăk đei 4.600 ‘nu bơngai tăh hla vang năm tăh hla. Ƀok Nguyễn Duy Trung, Kơ iĕng Ƀĭ thư Đảng tơring Ia Lôp tơbăt, tơring hlôi pơjing 4 hơnih pôk rơih tơ̆ rim thôn, proh hơmet kon jên ming hơmet hơnih, atŏk kơtang khul kŏng ang, ƀô̆ đô̆i vei lăng sơlam teh đak, yân kuân vei lăng sơđơ̆ng dơ̆ng kơjăp tơring sơlam teh đak hơdrol, lơ̆m păng đơ̆ng rŏng pôk rơih, lăng truh ‘măng pôk rơih sơđơ̆ng, jơnei.“Tơring hlôi pơjing rim tơdrong jang, dôm tơdrong pơrô̆ tơbăt găh bơ̆ jang pôk rơih vă pơre lơ̆m ăl loa tơring, hăm kơtơ̆ng ang đei pơre 2 ‘măng lơ̆m năr ‘noh tơ̆ pơgê păng tơ̆ kơsơ̆. Pơjing rim khul pôk rơih, hơmet ăn rim tơdrong ‘lơ̆ng hơ iă hloh ăn ‘măng pôk rơih kơdră tang măt Kuô̆k hô̆i păng Kơdră tang măt Jơnŭm vei lăng kon pơlei 2 kâp hăl jang 2026 - 2031 lơ̆m năr 15/3 truh ou kơnh”.

Ia Lốp ‘noh mĭnh lơ̆m 4 tơring sơlam teh đak păh Pơmơ̆t dêh char Dak Lăk, tơjê̆ hăm dêh char Mondulkiri, teh đak Campuchia. Lơ̆m tơring đei Kơđông ƀô̆ đô̆i vei lăng sơlam teh đak 736 (Ea H’Leo), găh Hơnih Ƀô̆ đô̆i vei lăng sơlam teh đak dêh char Dak Lăk oei. Trung tá Trần Ngọc Kiên, Kơ iĕng Kơdră chĕp pơgơ̆r Kơđông Ƀô̆ đô̆i vei lăng sơlam teh đak 735 tơbăt, ‘ngoăih bơ̆ jang vei lăng sơđơ̆ng pơm tơm, sơđơ̆ng teh đak, kang ƀô̆, ƀô̆ đô̆i hơnih hlôi kơrŭn đĭ ai vang iung jang vei lăng sơđơ̆ng dơ̆ng kơjăp lơ̆m hơdrol, lơ̆m păng đơ̆ng rŏng Hop akŏm tih kơ Đảng ‘măng mă XIV, adoi nhen ‘măng pôk rơih Kơdră tang măt Kuô̆k hô̆i păng Kơdră tang măt Jơnŭm vei lăng kon pơlei rim kâp. “Kơđông ƀô̆ đô̆i vei lăng Sơlam teh đak Ea Hleo hlôi pơchoh trong ăn kơdră chĕp pơgŏr Đảng, Kơdră chĕp pơgŏr tơring dăr lăng, rơih păng hơmet tôm tong rim hơnih pơgơ̆r pôk rơih; ăn khul jang vang iung jang chă hơpih hơmet, chih tơbăt, hơmet ăn bơ̆n aloa, hơtol ƀăng rôn, nơ̆r pơrô̆; adoi ăn khul bơ̆ jang vei lăng, pơm sơđơ̆ng ‘lơ̆ng hơ iă tơ̆ rim hơnih pôk rơih. ‘Ngoăih kơ ‘noh, hơnih atŏk kơtang iung jang chă pơrô̆ tơbăt vă kon pơlei băt hơdăh trong hơlĕnh pơdăr, tơchă trong pơm kơnê̆ đơ̆ng khul ayăt ‘meh vă phă pơrăm ‘măng pôk rơih, đơ̆ng noh kon pơlei kơchăng, iung tơjră tang găn kĕ”.

          Tơdrong vang iung jang đơ̆ng pơđĭ khul chinh trĭ atŭm hăm tơdrong lăp đon đơ̆ng kon pơlei, bơ̆ jang hơmet ăn pôk rơih tơ̆ tơring sơlam teh đak Ia Lôp tŏk bŏk đei tơlĕch jang tĕnh koăng, ƀlep tơdrong tơchơ̆t. Đơ̆ng ming hơmet pơ ‘lơ̆ng rim hơnih pôk rơih, atŏk kơtang pơrô̆ tơbăt truh vei lăng sơđơ̆ng dơ̆ng kơjăp, đĭ đăng jei lăng truh năr 15/3 truh ou kơnh tơpă jing năr lêh tih kơ bơngai tăh hla tơring sơlam teh đak, rơih đei dôm bơngai tang măt tơgăl đei jơhngơ̆m đon ‘lơ̆ng, bơ̆ jang hơgei, tơnăp, tang măt ăn jơhngơ̆m đon, tơdrong hơpơi ‘meh vă đơ̆ng kon pơlei lơ̆m tơring sơlam teh đal dêh char Dak Lăk.