Pơgê 27/1, Kơdră teh đak Lương Cường bơ̆jang hăm Anih pơvih ăn Kơdră teh đak găh tơlĕch jang dôm hơnăp jang pơgơ̆r Tết Nguyên đán Bính Ngọ sơnăm 2026. Đơ̆ng rŏng kơ mơ̆ng roi tơbăt păng tơgop nơ̆r pơma dơnuh, Kơdră teh đak drơ̆ng nơ̆r hăm dôm tơdrong apĭnh, hơdai hăm pơma hơdăh athei jang kiơ̆ tơpăt dôm trong jang, athei đơ̆ng Anih tơm Chĭnh trĭ, Ban Bí thư păng pơtho đơ̆ng dôm anih jang ƀơm truh lơ̆m pơgơ̆r bơ̆jang Tết.

Kơdră teh đak athei hơmet ăn mă ‘lơ̆ng dôm tơdrong hiôk pơyua ăn kon pơlei chơt hơiă Pơyan puih mak, sơng Tết sơđơ̆ng, hiôk ‘lơ̆ng, ‘mơ ‘met, pơm tơdrong chhôk hơiă iŏk đơ̆ng blŭng sơnăm 2026. Hơdai hăm ‘noh, kăl kơ pơgơ̆r ‘lơ̆ng năm ngôi, thơ thâu Tết dôm kang ƀô̆ kră jang kach mang, ŭnh hnam teh đak tơgŭm, bơngai đei kŏng, khŭl lĭnh păng dôm anih jang bơ̆jang tơ̆ tơring hơtăih hơtŏ, tơring sơlam, achon đak dơsĭ, vei sơđơ̆ng rim kon pơlei đei sơng Tết tôm măh, tơ nŏ hiôk ngăl.