Pơrô̆ iung jang găh bơ̆ jang pôk rơih, Kơdră chĕp pơgơ̆r Kuô̆k hô̆i Trần Thanh Mẫn athei hơmet ‘lơ̆ng ăn ‘măng hop akŏm mă pơđăm kơ Jơnŭm chĕp pơgơ̆r Pôk rơih Teh đak, tơchĕng lăng gô pơgơ̆r hơdrol kơ năr pơdơ̆h Têt Nguyên đán. Jơnŭm chĕp pơgơ̆r Pôk rơih Teh đak hrôih đei hla bơar pơrô̆ athei rim tơring tơlĕch jang bơ̆ jang pôk rơih lơ̆m khei ‘năr pơdơ̆h Têt Nguyên đán; sơkơ̆t hơdăh rim tơdrong jang hơdăh đơ̆ng pơlei pơla, ăp truh tơ̆ tơring, phương, dêh char, pơlei tơm, sơđơ̆ng ăn tơdrong chĕp pơgơ̆r, tơlĕch jang ‘lơ̆ng đơ̆ng tơring truh tơ̆ dêh char, ưh kơ lê̆ đei tơdrong prăh prang, kơtĕch toch broch bơ̆ jang hơmet ăn pôk rơih kơ yuơ pơdơ̆h Têt.

Jang kiơ̆ nơ̆r pơrô̆ jang đơ̆ng Kơdră chĕp pơgơ̆r Kuôk hô̆i, ou ki Khul bơ̆ jang kơsô̆ 2 Hơnih jang vei lăng sơđơ̆ng dơ̆ng kơjăp tơpôl kơ Jơnŭm chĕp pơgơ̆r pôk rơih teh đak kơ yuơ Thượng tướng Lê Tấn Tới, Kơdră chĕp pơgơ̆r Hơnih bơ̆ jang vei lăng Sơđơ̆ng Teh đak - Sơđơ̆ng tơring păng jang tơbôl kơ Kuô̆k hô̆i hlôi bơ̆ jang hăm Hơnih jang vei lăng Pôk rơih dêh char Khánh Hòa găh bơ̆ jang vei lăng sơđơ̆ng dơ̆ng kơjăp tơpôl pơvih pơvăn ăn ‘măng pôk rơ̆ih. Thượng tướng Lê Tấn Tới athei.“jang kiơ̆ hơnăp jang kơ khul vei lăng sơđơ̆ng tơring, yân kuân tư̆ vê̆, ‘nou jĭ khul tơjê̆ hăm kon pơlei hloh. Ĭnh athei tơring hơyơ đei tơdrong ưh sơđơ̆ng, bơ̆n pơjao hloi khul bơ̆ jang năm truh tơ̆ noh đơ̆ng dang ei hloi, đơ̆ng hơdrol kơ Têt hloi. Vă oei tơjê̆ hăm kon pơlei, mơ̆ng kon pơlei pơma, pơma ăn kon pơlei hlôh vao, pơm ăn kon pơlei lui kơjăp. Ưh khan gô vă jê̆ truh năr pôk rơih mă pơjao ăn khul jang năm truh. Mă kăl lăng ba kơjăp truh tơring groi kông, tơring achon dơsĭ”.

         Tơ̆ dêh char Dak Lăk, hơnih bơ̆ jang vei lăng sơđơ̆ng atŭm hăm Kon pơlei iung jang kơtang tang găn hơlou, tơjră tang găn kĕ dôm tơdrong kơtơ̆ng ang ưh kơ ‘lơ̆ng, tơgop ăn vei lăng vă ‘măng pôk rơih tơpă jing năr lêh kơ bơngai tăh hla tơ̆ tơring. Jĭ Kơ iĕng kơdră Khul bơ̆jang tơplih kơsô̆ pơlei pơla, ƀok Y Sắc Kbuôr, Kơdră chĕp pơgơ̆r ƀuôn Cuôr, tơring Ea Mdroh, dêh char Dak Lăk tơbăt:“Ba mơ̆t lăng lơ̆m Zalo, Facebook ƀôh dôm kơtơ̆ng ang ưh kơ ƀlep găh măt bơngai kơdră tang măt Kuô̆k hô̆i dăh mă kơdră tang măt Jơnŭm vei lăng kon pơlei rim kâp ‘noh hơnơ̆ng ƀôh kơna ba sut hŭt hloi. Nơ̆r Yuăn đei, nơ̆r Êđê jei đei. ‘Nou jĭ dôm tơdrong kơtơ̆ng ang kơnê̆, tơchă tơdrong, mưh ƀôh ba xut hŭt hloi păng pơtho khan ăn rim bơngai ‘nĕ kơ pơm kiơ̆, ‘nĕ kơ lê̆ đe pơlơ̆m, pơm kơnê̆ truh kơdih păng ŭnh hnam.”

‘Măng pôk rơih Kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp, jăl jang 2026 – 2031, dêh char Dak Lăk đei dang 2 triu 420.000 ‘nu bơngai tăh hla vang năm tăh hla. Vă pôk rơih sơđơ̆ng ƀlep tơdrong tơchơ̆t, Hơnih vei lăng kon pơlei dêh char Dak Lăk hlôi pơjing Hơnih chĕp pơgơ̆r pôk rơih dêh char, 102 hơnih chĕp pơgơ̆r pôk rơih tơring păng rim khul joăt jang; lơ̆m ou khul kŏng ang, ƀô̆ đô̆i ‘noh khul tơm dơnơm, tơlĕch jang hrơ̆p dih băl vei lăng sơđơ̆ng, iung jang tang găn hơlou, đơ̆ng hơtăih. Ƀok Trương Công Thái, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk sơkơ̆t hơdăh:“Hơnơ̆ng atŏk kơtang bơ̆ jang hơlen băt hơdăh tơdrong,pơđĭ lơ̆m mạng, mă kăl ‘noh trong hơlĕnh pơdăr, tơchă tơdrong đơ̆ng khul ayăt, bơngai kơdou oei tơ̆ teh đak đe đei ƀơm truh lơ̆m dêh char Dak Lăk. Đơ̆ng noh tơtom ƀôh, xek tơlang dôm tơdrong kơtơ̆ng ang glăi, pơm tơsŭl tơsăl, pơm jơhngơ̆m đon hul hơl lơ̆m kon pơlei găh ‘măng pôk rơih; adoi pơchoh trong ăn Hơnih chĕp pơgơ̆r Pôk rơih dêh char pơrô̆ iung jang hơmet pơ ‘lơ̆ng, tơgop lơ̆m vei lăng sơđơ̆ng dơ̆ng kơjăp lơ̆m tơring, ưh kơ lê̆ đei tơdrong ưh sơđơ̆ng, pơm kơnê̆ truh ‘măng pôk rơih”.

Hăm trong pơrô̆ iung jang kơtang, hrơ̆p mĭnh ‘măng đơ̆ng Trung ương, tơdrong vang iung jang đơ̆ng rim tơring atŭm hăm jơhngơ̆m đon tơnăp đơ̆ng rim khul tơm dơnơm păng Kon pơlei, bơ̆ jang hơmet ăn pôk rơ̆ih Kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei rim kâp jăl jang 2026 – 2031 tŏk bŏk tơlĕch kơjăp iăp kơtang, ‘lơ̆ng liĕm.