Pha hăm jơhngâm đon chơt hơiă thoi rim sơnăm, tơring juăt pơtăm pơkao Bình Kiến, găh Hơlĕch dêh char Đắk Lắk dôm năr ‘nâu nhen ưh gan chơt ƀiơ̆ yoa ƀơm ưh ‘lơ̆ng đơ̆ng ‘mi kial kơsô̆ 13 păng ‘mi tih đak lơ̆p ƀât tŏk bŏk khei 11/2025. Mă lei, tơ̆ jơ̆p pơgar, bơngai jang pơgar oei adrin jang tôch pơneh. Lơ pơgar pơkao kŭk tơgơ̆, păk đei pơdơ̆ng ming hăm kram, lơ anih teh hoh đơ̆ng pơkao lôch đei iŏk pơm anih ming dôm kơchŏu pơkao oei đei dơ̆ng. 'Nâu jĭ khei 'năr gĭt kăl vă gơ̆h hơnhăk tĕch tơmam 'lơng hlŏh ƀât Tết Nguyên đán Bính Ngọ 2026.

Pơmat tat dêh hlŏh đơ̆ng kon pơlei kơplăh dang ei ‘nŏh jĭ jên jang. Đơ̆ng rŏng kơ 'mi tioh đak lơ̆p, jên vă jang, răt bơ̆n phŏng, pơgang păng iŏk đe jang vei rong dơ̆ng pơgar pơkao tŏk lơ, roi pơm pơmat tat ăn kon pơlei mưh jên jang hlôi tuh đĭ ƀât blŭng pơyan bơih. Yă Nguyễn Thị Liên, phường Bình Kiến tơroi: “Inh hơmet ming đơ̆ng blŭng, hơmet pơ ‘lơ̆ng vă rong dơ̆ng, xăy bơ̆n phŏng, pruih bơ̆n pơgang, kŏng jang dơ̆ng huach lơ dêh. Hơmĕng jang đei ƀiơ̆ vă gơ̆h đei xa yoa dang ei tơlĕch jên jang lơ bơih.”

Tơ̆ dôm unh hnam jang pơgar, tơdrong vei rong oei vă yak mât lơ̆m khei ‘năr tôch gĭt kăl: pleh hŭt lê̆ rơnôp păng dơng ưh ‘lơ̆ng, hơmet ming jơnăr ăn pơkao tơlang. Yoa tơdrong jang tôch lơ păng  athei đei ki thuơ̆t dơ̆ng, dôm unh hnam athei thuê dơ̆ng bơngai jang, pơm ăn jên jang roi tŏk lơ. Yă Huỳnh Thị Nho pơma: “Khei ‘năr âu jĭ khei ‘năr oei hơmet pơkao, săy phŏng vă sư ‘lơ̆ng. Đơ̆ng rŏng kơ ‘mi tih đak lơ̆p ‘nŏh vei rong mơmat dêh, ‘mi kial pơm ăn pơkao hư đĭ, kŏng jang tŏk roi lơ. Pơtăm pơkao lăp hơpơi ‘mĕh tĕch hlot đĕch, vă gơ̆h pơdreo dơ̆ng 1,2 hlak jên jang.”

Kiơ̆ kơsô̆ chih jô̆ tam mă tôm, phường Bình Kiến đei hlŏh 50 ha teh pơtăm pơkao kŭk lơ kơloăi. Hrei ‘nâu, dang 50% pơkao tơ̆ dôm pơgar huei ƀơm kơnê̆ đơ̆ng ‘mi kial hlôi đei bơngai pơdro tơlĕch jên kŏk răt iŏk bơih. Hăm dôm pơgar oei đei dơ̆ng, kon pơlei oei adrin vei rong, gô ƀôh đe ‘mĕh răt lơ ‘nŏh tĕch hloi. Yă Nguyễn Thị Hiển, ăn tơbăt: “Bơngai pơdro chă dăr apinh răt mơ̆n, hăm yă lăp ai đĕch. Dang ei pơkao jing 'lơ̆ng mơ̆r, gô sư lĕch rơnôp pơkao 'nŏh đe răt.”

Vă yak hơdoi hăm kon pơlei, khul kơdră tơring kơchăng pơjing lơ trong jang xa, tĕch mơdro, tơgŭm tĕch tơmam vă tơjur ƀiơ̆ hiong răm ăn kon pơlei đơ̆ng rŏng 1 sơnăm tŏ ‘mi kial ưh kơ ‘lơ̆ng. Ƀok Lương Thảo Nguyên, Phŏ Kơdră vei lăng kon pơlei phường Bình Kiến, dêh char Đắk Lắk, tơroi, tơring oei adrin jang hơdoi vă chă anih răt iŏk pơkao sơđơ̆ng ‘lơ̆ng, tơgŭm ăn kon pơlei hơđơ̆ng jơhngâm lơ̆m khei ‘năr tĕch pơkao Têt truh âu kơnh: “Anih vei lăng kon pơlei phường đei trong pơgơ̆r ming tĕch pơkao têt tơ̆ tơter trong gre 1/4, pơm hơmet dôm anih ming pơkao, hơmet pơrŏ cham char vă đei anih tĕch mơdro sơđơ̆ng, tơgŭm ăn kon pơlei tĕch pơkao têt hiôk hian ƀiơ̆.”

Mă đơ̆ng oei tơjră hăm lơ tơdrong ưh sơđơ̆ng găh tŏ ‘mi kial păng jên jang, mă lei hăm đon kơchăng hơmet pơ ‘lơ̆ng rim tơdrong pơmat tat, bơngai pơtăm pơkao tơ̆ Bình Kiến oei adrin đĭ jơhngâm vă pơyan pơkao têt sơnăm ‘nâu gơ̆h iŏk đei yoa ‘lơ̆ng hlŏh.