Jang kiơ̆ trong bơ̆ jang đơ̆ng Đảng păng Teh đak, lơ̆m dôm sơnăm ou ki, rim tơring tơrang lơ̆m tơring Tây Nguyên jang kiơ̆ jơnei Tơdrong jang tơm teh đak tơjur dơnuh kơjăp ‘lơ̆ng păng Tơdrong jang tơm teh đak atok tơ iung  mŭk drăm - tơpôl tơring kon kông păng groi kông. Đơ̆ng ŭnh hnam dơnuh, ŭnh hnam mŏ H Phương Knul (hơdrung ÊĐê), oei lơ̆m ƀuôn Tuôr, tơring Hòa Phú, dêh char Dak Lăk hlôi đei teh đak tơgŭm ăn tŏk iok jên vă tơmơ̆t jang sa, dang ei hlôi đei tơdrong hơrih sa sơđơ̆ng păng ming man hnam oei kơjăp ‘lơ̆ng. “Sơ̆ ŭnh hnam nhôn găh ŭnh hnam dơnuh, ưh kơ đei hnam oei. Teh đak tơgŭm djru mĭnh păh, ŭnh hnam chă pơđom kơna mă pơm đei hnam ou. Mă lei tơdrong jang sa oei tim mă sơđơ̆ng, oei lăng tông ăn kon hơ ‘lơ̆p hŏk pơhrăm. Ĭnh hơpơi Teh đak hơnơ̆ng lăng ba, pơjing tơdrong jang păng jang sa iŏk đei sơđơ̆ng ăn rim ŭnh hnam oei tơnap tap lơ̆m tơring”.

Hop akŏm kơdră tang măt lơ̆m teh đak ‘măng mă XIV kơ Đảng xơkơ̆t hơdăh trong jang lơ̆m 5 sơnăm kơnh, ŭnh hnam dơnuh kiơ̆ trong dơnuh lơ pang jăl sơnăm 2026–2030 tơjur jô̆ hơtŏ 1–1,5 % lơ̆m sơnăm. Tơlĕch jang kiơ̆ trong ou, Tơdrong tơchơ̆t Hop akŏm tih Đang ƀô̆ dêh char Dak Lăk jăl jang 2025–2030 tơlech ăn ŭnh hnam dơnuh lơ̆m dêh char tơjur đơ̆ng 2% năm tơ̆ lơ; ŭnh hnam dơnuh kon kông tơjur đơ̆ng 3% lơ̆m sơnăm năm tơ̆ lơ. Vă iŏk đei jơnei trong tơlĕch jang ou, dêh char hơnơ̆ng lăng kơjăp atŏk tơ iung choh jang sa, pơjing trong jang sa ăn kon pơlei, pơih să trong tơjur dơnuh trŏ lăp hăm tơring. Yă Nguyễn Thị Nguyên Thảo, Kơ iĕng Kơdră chĕp pơgơ̆r Hơnih vei lăng kon pơlei dêh char Dak Lăk tơroi tơbăt:“Jăl jang 2026–2030, dêh char hơnơ̆ng pơjing rơvơn vă tơlĕch kon jên jang, trong jang vei lăng năng tông tơpôl truh hăm kon pơlei; jang kiơ̆ Nơ̆r athei jang kiơ̆ 39 kơ Ban Bí thư, atŏk ‘lơ̆ng iok yoa kon jên tơmơ̆t jang, tơmơ̆t kon jên choh jang sa, mơdro sa, pơjing dơ̆ng hơyak ăn atŏk tơ iung tơring tơrang ‘nao, atŏk tơ iung muk drăm - tơpôl tơring kon kông, groi kông, sơđơ̆ng tơdrong hơrih sa tơpôl lơ̆m dêh char.”

        Lăp đơ̆ng rŏng Hop akom tih mă XIV kơ Đảng, Kháng Hòa hlôi tơlĕch jang kiơ̆ kơtang “rơih ƀlep-tơlĕch jang kiơ̆ tĕnh koăng-jang truh tơ̆p truh troch - Hơlen jang ‘lơ̆ng kiơ̆ jang keh đang”, akŏm hơmet pơ ‘lơ̆ng trong tơmơ̆t jên jang, pơtrŭt kơtang rim tơdrong jang tơm, pơjing hơyak pran ăn jang kiơ̆ trong tơlĕch jang đei jing pơlei tơm  găh Trung ương hơdrol sơnăm 2030. Lơ̆m nơ̆r pơrô̆ jang, Kơdră chĕp pơgơ̆r Hơnih vei lăng kon pơlei dêh char Khánh Hòa Trần Phong pơma hơdăh, athei tŏk kơtang dôm tơdrong lơ̆m rim tơdrong jang kăl; athei rim hơnih bơ̆ jang, tơ ring tơ iung pơjing trong jang hơdăh; akŏm hơmet pơ ‘lơ̆ng tơhlăk tơhlĭn, pơm hơtŏk kĕ pơjei păng jang ‘lơ̆ng pơvih pơvăn ăn kon pơlei, hơnih mơdro sa: “Rim hơnih jang, tơring kăl tơ iung pơjing trong vă jang hơdăh kiơ̆ kơ khei, đei ‘măng kiơ̆ kơ giĕng; akŏm hơmet pơ ‘lơ̆ng tơhlăk tơhlĭn, hơmet pơ ‘lơ̆ng trong jang tơmơ̆t jên jang, pơm hơtŏk kĕ pơjei păng jang ‘lơ̆ng pơvih pơvăn ăn kon pơlei, hơnih mơdro sa. Mơ̆ng kiơ̆ tơdrong jang kơ hơnih, bơ̆n kăl iung jang mă kơtang hloi”.

Lơ̆m tơdrong hơdrin lăng truh hơnơ̆ng tŏk mŭk drăm 2 kơsô̆, ba Khánh Hòa đei jing pơlei tơm găh Trung ương, tơdrong jang tơ iung pơjing ming man jing tơdrong jang tơm dơnơm hloh. Kơdră chĕp pơgơ̆r Hơnih vei lăng tơ iung pơjing ming man dêh char Khánh Hòa Nguyễn Thành Phú tơbăt, hơnih jang ming man gô akŏm pơm hơtŏk jang ‘lơ̆ng trong pơ prŏ ăn, atŏk tơ iung tơring kơdrơ̆m păng kmăi kmŏk kiơ̆ trong gơh hơgei, kơjăp ‘lơ̆ng, pơvih pơvăn ‘lơng ăn trong tơlĕch jang kơ dêh char:“Nhôn gô hơnơng hơdrin kơtang, akŏm tơlĕch jang rim tơdrong jang mă Hơnih Đảng dêh char, Hơnih vei lăng kon pơlei dêh char pơjao ăn; mă kăl ‘noh pơm hơtŏk pơjing trong vă jang ‘lơ̆ng, atok kơtang jang ‘lơ̆ng tơring kơdrơ̆m păng kmăi kmŏk hơgei, tơklep hăm atŏk tơ iung mŭk drăm rơgoh ‘lơ̆ng, mŭk drăm đak dơsĭ păng tơmang pơhiơ̆ pơjing hơyak pran ăn atŏk tơ iung lơ̆m dêh char”.

Tây Nguyên păng tơring tơmăn Nam trung bộ jĭ tơring sơlam teh đak-achon dơsĭ. Lăp đơ̆ng rŏng Hop akom tih kơdră tang măt lơ̆m teh đak ‘măng mă XIV kơ Đảng jơnei keh kong, Thượng tướng Đỗ Xuân Tụng, Kơdră jang lơ̆m Trung ương Đảng, Kơ iĕng Kơdră chĕp pơgơ̆r Hơnih tơm jang Chinh trĭ Khul Ƀô̆ đô̆i Kon pơlei Việt Nam hlôi đei jơ bơ̆ jang hăm Khul kơdră chĕp pơgơ̆r Khul Ƀô̆ đô̆i vei lăng sơlam teh đak dêh char Dak Lăk, Thượng tướng athei Ƀô̆ đô̆i vei lăng sơlam teh đak dêh char Dak Lăk tơlĕch jang kiơ̆ hrôih Tơdrong tơchơ̆t Hop akŏm tih ‘măng mă XIV kơ Đảng. “Mă blŭng kăl hơlen mă brĕ, tơlĕch jang kiơ̆ hơdăh Tơdrong tơchơ̆t Hop akŏm tih mă XIV kơ Đảng, jang kiơ̆ ‘lơ̆ng nơ̆r athei jang kiơ̆, pơrô̆ jang đơ̆ng Tổng Bí thư ‘noh “2 vei kơjăp jơhngơ̆m đon ‘lơ̆ng, 2 atŏk kơtang, 2 tang găn hơlou” păng “5 kơjăp iăp kơtang”. Tổng bí thư tơlĕch ăn dôm trong jang tôch trŏ lăp, rơbot ƀônh mă lei hlôi tơƀôh hơdăh tôm tong nơ̆r pơrô̆ iung jang hăm Khul Ƀô̆ đô̆i pơma atŭm, hăm Ƀô̆ đô̆i vei lăng sơlam teh đak pơma hơdrô̆.”

Rŏ năng vă pơma, tơdrong Hop akŏm tih kơdră tang măt lơ̆m teh đak ‘măng mă XIV kơ Đảng hlôi tĕnh koăng lang să mơ̆t lơ̆m tơdrong hơrih hăm dôm trong tơlĕch jang hơdăh, trŏ lăp hăm dôm tơdrong yan ou tơ̆ tơring, kiơ̆ tơdrong jang. Đĭ đăng tŏk bŏk akŏm yak mơ̆t lơ̆m jơ ‘năr chơt hơ iă ‘nă hal kơ Đảng, chơt hơ iă ‘nă hal kơ puih mak ‘nao Bính Ngọ 2026.