Iung pơma tơ̆ Pơm lêh, Bí thư Đảng ủy Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn hmach chơt hơ iă ăn ƀok Dương Thanh Bình đei sơng iŏk Huy hiệu 45 sơnăm jang Đảng hăm ƀok Phùng Khánh Tài đei sơng iŏk Huy hiệu 30 sơnăm jang Đảng ƀlep lơ̆m jơ ‘năr gĭt kăl hloh, tơbăt 96 sơnăm năr pơjing Đảng păng Hop akŏm tih kơdră tang măt lơ̆m teh đak ‘măng mă XIV kơ Đảng ‘nao pơgơ̆r jơnei keh kong ‘lơ̆ng liĕm. Tang măt ăn 2 ‘nu kơdră đei sơng iŏk Huy hiệu, Kơdră chĕp pơgơ̆r Hơnih bơ̆ jang Tang măt Kon pơlei păng Dăr lăng hơlen Dương Thanh Bình sơkơ̆t hơdăh, hơnơ̆ng hơdrin pơhrăm, vei kơjăp jơhngơ̆m đon ‘lơ̆ng kĕch mang; pơm jŭk yŭk trong hơlou jang kiơ̆ ‘lơ̆ng Tơdrong tơchơ̆t, Tơdrong pơkăp kơ Đảng, rim tơdrong tơchơ̆t kơ Đảng, trong bơ̆ jang, Khôi luơ̆t kơ Teh đak; hơnơ̆ng atŏk kơtang, vei kơjăp hơnăp jang kơ bơngai đang viên tơgop lơ̆m tơ iung pơjing teh đak Việt Nam roi năr roi pơdrŏng pran kơtang, atŏk tơ iung kơjăp, yak truh chủ nghĩa xã hội.