Thủ tướng hôn bơnê ‘măng năm tơmang đei pơgơ̆r lăp đơ̆ng rŏng Hop akŏm tih mă XIV kơ Đảng jơnei, sơkơ̆t hơdăh Việt Nam lăng kơjăp, kơrŭn đĭ ai pơm hơtŏk loi dơ̆ng tơgoăt tơgoăl joăt joe, tơgoăt tơgoăl gĭt kăl păng jang hơdoi tôm tong dih băl Việt Nam - Cuba. Ƀar păh hôn bơnê kơtang hơyak ‘lơ̆ng lơ̆m tơgoăt tơgoăl dih băl, drơ̆ng mĭnh nơ̆r pơtrŭt kơtang jang hơdoi mŭk drăm-tơpôl; tơlĕch jơnei rim tơdrong vă jang choh jang ƀa kơtă, tơbăt dih băl trong jang hơ iă 40 sơnăm tơplih ‘nao; pơih să jang hơdoi ŭnh hơyuh rơgoh ‘lơ̆ng, mă kăl ŭnh hơyuh jơ̆ng ‘năr; atŏk kơtang jang hơdoi pơtho pơhrăm jang pơgang, pơjao kmăi kmŏk vaccine, pơgang ming hơmet jĭ jăn tơgum ăn tĕch mơdro lơ̆m ƀar teh đak păng tĕch mơdro tơ̆ teh đak đe. Thủ tướng sơkơ̆t hơdăh, Việt Nam gô hơnơ̆ng pơtho tơbăt dôm trong jang gơh lơ̆m atok tơ iung ŭnh hơyuh hăm Cuba vă pơvih pơvăn ăn pơm tơlĕch, jang sa păng tơdrong hơrih sa ăn kon pơlei Cuba.