Lơ̆m hnam ‘nao man xă 80m² tơ̆ plei Bu Boong, xăh Tuy Đức, dêh char Lâm Đồng, mŏ Thị Duyên, bơngai M’nông, kŭm hăm klo păng 2 ‘nu kon oei hơmet tơmam vă sơng xa Têt. Hnam đei man kơjăp ‘lơ̆ng đơ̆ng tơdrong jang sut pơđĭ hnam hiăh hiok, ‘nao jang đang dang 1 puăt sơnăm ‘nâu, jĭ tơdrong hơiă  tih hlŏh hăm unh hnam mŏ.

Đei hnam ‘nao, pơgar ‘long pơtơm vă đei plei blŭng a, đei dơ̆ng phe păng tơmam xa têt đơ̆ng ƀô đô̆i hơpăh ăn, pơyan Puih mak sơnăm ‘nâu hăm unh hnam mŏ Thị Duyên yoa thoi noh roi chơt hơiă ƀiơ̆: “Hnam nhôn đei teh đak tơgŭm 90 triu vă man hnam đơ̆ng tơdrong jang sut pơđĭ hnam hiăh hiok, tŏk oei tơ̆ hnam ‘nao đei hlŏh 3 khei ‘nâu bơih, hnam nhôn tôch hơiă. Đei anih oei xa sơđơ̆ng, nhôn hơđơ̆ng jơhngâm jang xa, rong ‘me kon hŏk. Têt ‘nâu oei đei Quân khu 7 tơgŭm, hơpăh jên păng tơmam xa, kơna unh hnam đei tơmam sŏng xa roi lơ ƀiơ̆, răt bơ̆n hơbăn ao ‘nao ăn kon vă sơng xa têt Bính Ngọ. Hnam nhôn bơnê kơ Đảng, teh đak lơ dêh.”

Kŭm nhen tơ̆ Tuy Đức mơ̆n, tơdrong chơt hơiă Têt đei tôm tơmam xa măh mai oei păr truh hăm lơ unh hnam pơmat tat tơ̆ tơring sơlam tơ̆ kông kơ dêh char Lâm Đồng. Tơ̆ plei Bình Minh, xăh Đắk Wil, yă Lữ Thị Đan, bơngai Thái, 1 ‘nu rong kon đơ̆ng rŏng kơ klo lôch hơchăng. Tŏk bŏk sơnăm sơ̆, đơ̆ng tơdrong tơgŭm ăn tơdrong arih xa, yă đei ƀơk 250 tŏ iĕr yŏng hăm tơmam hiĕm vă rong păng đei kăn ƀô pơm ăn hơdrong kơjăp ‘lơ̆ng. Vă jê̆ Têt, iĕr yă rong blŭng a pơtơm đei rôp tĕch hơnhăk ba kon jên kŭm pôm păi mơ̆n. 1 puăt kơsô̆ jên yă măn vă răt yŏng rong dơ̆ng, oei đei ‘nŏh nôp jên hŏk păng chơ choh hơbăn ao ‘nao ăn kon.

Dôm năr vă jê̆ têt, 30kg phe tơgŭm đơ̆ng teh đak kŭm hăm ƀĕng chưng, tơmam yoa kăl đơ̆ng ƀô đô̆i hơpăh hlôi tơgŭm ăn mĕ kon yă hiơt hiong lê̆ ƀiơ̆ đon pơngơ̆t. Yă Lữ Thị Đan, tơroi: “Đei iŏk phe tơgŭm đơ̆ng teh đak, tơmam têt đơ̆ng ƀô đô̆i, mĕ kon măr nhi tôch hơiă, bơnê kơ Đảng păng teh đak. Têt ‘nâu 2 ‘nu mĕ kon đei tôm tơmam sŏng xa ƀât Têt bơih. Sơnăm ‘nao Bính Ngọ, tơdăh gơ̆h, hơpơi ‘mĕh Đảng, teh đak pơngơ̆t ăn lơ ƀiơ̆ vă mĕ kon măr nhi gơ̆h tŏk klăih đơ̆ng pơmat tat.”

Tơdrong hơiă mưh arih xa phĭ tơnŏ oei truh hăm tơring sơlam Lâm Đồng 'nŏh jĭ tơdrong iŏk đei đơ̆ng rim anih jang chinh trĭ vang tơgŭm. Rim sơnăm, Quân khu 7 jang hơdoi hăm khul kơdră pơgơ̆r dôm tơring pơgơ̆r “Pơyan Puih mak kơ đe linh”. Tơ̆ Lâm Đồng, tơdrong jang 'nâu đei tơlĕch hrơ̆ch tơ̆ 5 xăh sơlam đei Tuy Đức, Đắk Wil, Thuận An, Thuận Hạnh păng Quảng Trực. Kŭm hăm pơjing tơring kon pơlei oei xa jê̆ kơđông linh tơ̆ xăh Quảng Trực, tơdrong jang hlôi hơpăh 2.600 tơpu tơmam đei kơjă dang 5 ti ăn khul linh păng kon pơlei tơ̆ tơring sơlam. Rơbâu tŏ ƀĕng chưng đei pơm hơpăh ăn unh hnam tơnuh, vă jê̆ tơnuh; lơ 'măng khăm hơlen, ƀơk đĕch pơgang hơmet jĭ đei pơgơ̆r; đei hloi kơchơ “asong đĕch” vă pơvih ăn kon pơlei chă răt iŏk tơmam Têt.

Đại tá Nguyễn Văn Sơn, Chính ủy Anih chĕp kơ̆l pơgơ̆r khul linh dêh char Lâm Đồng ăn tơbăt: “Kiơ̆ đơ̆ng dôm tơdrong jang “Pơyan Puih mak kơ đe linh” sơnăm ‘nâu hlôi hơnhăk ba lơ tơdrong gĭt kăl găh chinh trĭ, tơƀôh hơdăh tơdrong mât 1 ƀơ̆r đon đơ̆ng khul linh hăm kon pơlei. Kiơ̆ đơ̆ng noh “jơhngâm đon kon pơlei roi hơđơ̆ng” roi đunh roi ‘lơ̆ng, dơ̆ng kơjăp tơ̆ tơring sơlam kơ dêh char Lâm Đồng.”

Đơ̆ng rŏng kơ tơmât hơdai hăm dôm dêh char Đắk Nông, Lâm Đồng păng Bình Thuận, dêh char Lâm Đồng 'nao đei teh xă vă jê̆ 24.300km², xă hlŏh lơ̆m teh đak, đei hloi tơring sơlam tơ̆ kông, đei hloi tơring sơlam tơ̆ đak dơsĭ. Hơdrô̆ trong sơlam tơ̆ kông kơjung hlŏh 142km, hăm 5 xăh, vă jê̆ 100.000 'nu bơngai, vă jê̆ 1 puăt 'nŏh jĭ kon pơlei kon kông. Mă đơ̆ng 'nao đei tơmât hơdai ră, dêh char oei vei kơjăp tơdrong đei yoa đơ̆ng dôm tơdrong jang tơjur tơnuh hin lơpang, akŏm tơ̆ dôm tơring pơmat tat dêh hlŏh. Ƀât Tết Bính Ngọ, dêh char mong akŏm, hơpăh ăn 1.600 tơpu tơmam, đei kơjă truh 1,6 ti hlak jên ăn dôm unh hnam pơmat tat tơ̆ tơring sơlam.

Yă H’Vy Êban, Phŏ Kơdră Anih MTTQ Việt Nam dêh char Lâm Đồng ăn tơbăt: “Kiơ̆ đơ̆ng tơdrong jang, kon pơlei roi đei tơdrong chơt vă sơng xa têt, hăm tôm tơmam ƀiơ̆. ‘Nâu kŭm jing tơdrong jang tôch đei yoa, vang tơgop bơ̆ jang kiơ̆ trong jang đơ̆ng Đảng, Teh đak hăm đon pơhnŏng “ưh đei hŭt hơchăng bu tơ̆ rŏng”.

Đơ̆ng dôm bơbŭng hnam man kơjăp ‘lơ̆ng tơplih ăn dôm hnam gia, hiăh hiok, dôm trong jang xa oei tŏk bŏk hơnhăk ba iŏk yoa lơ, truh dôm tơmam hơpăh đei pơjao trŏ khei ‘năr, tơdrong arih xa kơ kon pơlei tơ̆ tơring sơlam Lâm Đồng oei dar dĕh yak tŏk. Pơyan Puih mak tơ̆ tơring sơlam ưh lăp ƀrŭng brăng pơkao chôh ‘lơ̆ng rŏ, đei tôm ƀĕng chưng, têt đĕch, mă oei đei hloi đon lui đei tưk tơiung roi ‘lơ̆ng, jĭ tơdrong tơguăt đĭ đăng hơdrĕch hơdrung hơnơ̆ng đei hơmet kơjăp, pơjing đei jơhngâm đon hơđơ̆ng, dơ̆ng kơjăp ăn kon pơlei, vei lăng ‘lơ̆ng tơdrong pơm tơm păng hiôk sơđơ̆ng 'lơ̆ng hơiă  tơ̆ tơring sơlam kơ teh đak./.