Khŭl bơ̆jang kơ dêh char Gia Lai yua đơ̆ng Phŏ Kơdră Anih vei lăng kon pơlei dêh char Nguyễn Thị Thanh Lịch pơm kơdră khŭl ‘nao truh năm ngôi, thơ thou têt ăn dôm anih jang păng ŭnh hnam đei kŏng jang ‘lơ̆ng tơ̆ 1,2 tơring păih Pơmơ̆t dêh char. Khŭl bơ̆jang hlôi thơ thou Têt 25 ŭnh hnam bơngai đei kŏng jang ‘lơ̆ng tơ̆ dôm xăh: Ia Rbol, Ia Rsai, Uar, Ia Dreh păng Phú Túc, mĭnh hnam đei pơjao 1 tơpu tơmam đơ̆ng dêh char păng 2 triệu hlak jên măt. Kră pơlei Ksor Chuel oei tơ̆ plei Rưng Ama Nhiu, xăh Ia Rbol, Gia Lai tơbăt: “Ŭnh hnam nhôn kŭm nhen kon pơlei lơ̆m pơlei, tơdrong hơrih sa roi ‘năr roi sơđơ̆ng păng đei ƀôh ƀiơ̆, rim hnam adoi lăng truh tơdrong hơrih sa phĭ tơnŏ, hiôk chơt. Hơdai hăm ‘noh, Đảng păng Teh đak ling lang bơngơ̆t truh, vei lăng tơdrong hơrih sa kơ kon pơlei kon kông tơ̆ tơring Tây Nguyên, tơgŭm kon pơlei ƀrư̆ ƀrư̆ hơtŏk tơiung mŭk drăm, hơtŏk ‘lơ̆ng tơdrong hơrih sa. Tơ̆ hơnăp kơnh, ĭnh ‘meh Đảng păng Teh đak hơnơ̆ng bơngơ̆t truh lơ hloh dơ̆ng, đei dơ̆ng dôm tơdrong jang hơdăh vă kon pơlei kon kông sơđơ̆ng jơhngơ̆m jang sa, sơđơ̆ng tơdrong hơrih sa đunh đai”.

Hăm kon pơlei M’Nông tơ̆ xăh Nâm Nung (dêh char Lâm Đồng) – tơring kăn kư̆ kăch mang lơ̆m khei ‘năr tơblăh sơ̆, hrei ‘nâu đei tơplih ‘lơ̆ng hơiă. Dang ei, mih ma duch nă lơ̆m xăh oei jang tŏk mŭk drăm đơ̆ng ‘long cheh phe, tiu, ƀa đak păng vei kơjăp tơdrong juăt, jŏh ayŏ kơ dŏ xoang kơ hơdrĕch hơdrung. Hơdrô̆ tơ̆ plei Ja Rah, kon pơlei M’nông oei chĕp vei 20 sơmrŭk chĭng chêng hăm 30 ‘nu bơngai gơ̆h tôn chĭng; 30 ‘nu bơngai gơ̆h tanh brai vai khăn, tanh hơkăt. Vă rim unh hnam pai pơđĭh tơdrô ge. Dôm tơdrong et xoi kơ bơngai M’nông, tơdrong hơri, pơm tơmam tôn reh oei đei chĕp vei ‘lơ̆ng.

Ƀok Y’Nkrơm (bơngai M’Nông) tơ̆ plei Ja Rah, xăh Nâm Nung, dêh char Lâm Đồng akhan, tơdrong arih xa ‘nao phĭ tơtŏ dơnŏ ‘lơ̆ng, hiôk chơt đei đơ̆ng mât 1 ƀơ̆r đon, adrin jang tŏk đơ̆ng kon pơlei tơ̆ tơring kăn kư̆ kăch mang sơ̆: “Sơnăm ‘nâu jang xa kiơ̆ trong ‘nao kŭm đei ƀiơ̆ kơ sơnăm sơ̆. Unh hnam đei 1 sao ƀa đak, yoă đei 20 ƀao ƀa. Oei cheh phe ‘nŏh phĕ đei 5 tân, plei lơ ƀiơ̆, inh kŭm ƀôh hơiă ƀiơ̆. Sơnăm ‘nâu tĕch đei hlŏh 100 triu, jên jên phŏng, kŏng jang oei rơkăh tŏ sĕt vă măn jên jang lơ̆m sơnăm truh âu păng răt tơmam ăn hnam tơnŏ, oei pă 20-30 triu, vă sơng xa têt, ngôi hơdai hăm mih ma duch nă. Têt truh ‘nŏh pơgơ̆r et xa krao mih ma duch nă ngôi hơdai; dôm unh hnam vang jang hơpong, dang 10 unh hnam jang hơpong, păng krao hloi đe ‘nhŏng oh truh et xa, thơ thou ăn băl năr têt jang xa roi đunh roi tŏk.