Dôm năr vă jê̆ Têt Bính Ngọ 2026, ‘moi kiơ̆ ƀar păh jih đak kroong Đa Nhim, kon pơlei pơtăm ‘nhot, ƀum, plei tơ̆ rim tơring D’ran, Ka Đô, Đơn Dương… dêh char Lâm Đồng oei mơdŭk mơdăk năm tơ̆ chŭn ‘nhot. Mă lei, tơplih ăn jơ ‘năr mơdŭk mơdăk kăt ‘nhot tĕch ăn jơ ‘năr Têt nhen dôm sơnăm hơdrol, khei năr ou, kon pơlei tơ̆ ou tă akŏm lơ̆m choh teh, pơlăp ming đing đak tơruih păng rei dơđăh pơtăm ‘nao.

Ƀok Phạm Bích, oei tơ̆ thôn Đường Mới, tơring D’ran tơbăt, ‘mi kial hơbŭt hơbông hơtuch sơnăm 2025 hlôi pơm ăn lơ hơgăt teh jang pơtăm ‘nhot tơter đak kroong Đa Nhim răm teh tơmo klơ̆p, đei tơring teh tơdrŭt hơlih tôch hơmơt tơt. Tơdrong hơmet pơ ‘lơ̆ng chŭn ‘nhot kơ yuơ lơ loh tơhoach tôch kơ lơ jơ ‘năr jang păng kon jên. Ƀơ̆t măt, lơ ŭnh hnam rơih trong choh hơmet teh truh dang yơ, pơtăm ming ‘nhot truh dang noh:“Đei bơngai pơtăm su hào, hla sơƀei krôp, pro preng,hơmrĕ. Găh ou ‘noh teh ‘măn ăn pơtăm xa lăch. Dang lơ̆m pơnil khei dŏng kap ‘noh bŭch tĕch bơih. Dang ei ‘noh oei ưh kơ tom vă chă bŭch tĕch lơ̆m jơ ‘năr Têt ôh”.

Lơ̆m ‘măng ‘mi kial hơbŭt jơbông pơrăm hơtuch sơnăm 2025, tơring D’ran ‘noh mĭnh lơ̆m tơring răm kơtang hloh kơ tơring tơm pơtăm ‘nhot Đơn Dương hăm vă jê̆ 300ha ‘nhot răm đak lŏk jroh hŭt. Ƀok Trương Quang Kiên, Kơ iĕng Kơdră chĕp pơgơ̆r Hơnih vei lăng kon pơlei tơring D’ran tơbăt, lơ̆m hơmet ming choh jang sa, kơdră tơring hlôi yak hơdoi hăm kon pơlei, tơgŭm djru hơmet pơ ‘lơ̆ng tơdrong ưh kơ măh teh ‘lơ̆ng vă tuh hơmet ăn chŭn ‘nhot. Tơring jei tơlĕch nơ̆r apĭnh đei trong tơgŭm djru vă tơgŭm ăn kon pơlei hrôih iung jang choh jang sa dơ̆ng:“Kơdră chĕp pơgơ̆r Đảng, kơdră chĕp pơgơ̆r tơring krao hơvơn păng bơ̆ jang hăm rim hơnih jang mong jên pơjing rơvơn ăn kon pơlei tŏk iŏk hăm jên cheh tŏ sĕt vă hơmet pơ ‘lơ̆ng dơ̆ng choh jang sa đơ̆ng rŏng ‘mi kial hơbŭt hơbông pơrăm. Kơdră chĕp pơgơ̆r Đảng, kơdră chĕp pơgơ̆r tơring hlôi hơlêm kon pơlei hơdrin hơmet pơ ‘lơ̆ng teh vă jang sa chă pơtăm ‘long pơtăm ƀlep pơyan, rim ‘nhot sa hrôih vă đei iŏk yoa kơjăp. Truh dang ei tơdrong hơmet pơ ‘lơ̆ng đơ̆ng rŏng ‘mi kial pơrăm hơgăt teh jang sa hloh 70%”.

Mă đơ̆ng Têt ou, lơ ŭnh hnam pơtăm ‘nhot tơ̆ tơring tơm jang ‘nhot Đơn Dương ưh kơ đei ‘nhot vă bŭch tĕch, mă lei tơ̆ dôm chŭn ‘nhot hlôi răm tơmo hrêr dơ̆k klơ̆p, dôm dơđăh jơk tŏk bŏk bluh vơ̆. ‘Nou jĭ tơdrong ƀôh hơdăh tơdrong hơ iă đei iung jing dơ̆ng, pơih trong hơmŏ găh dôm pơyan ‘nao hăm jơhngơ̆m đon chơt hiôk hrôih vih hơlơ̆k dơ̆ng hăm kon pơlei tơring pơtăm ‘nhot tơm dêh char Lâm Đồng.