Tơ̆ xăh Hòa Thịnh, dêh char Đắk Lắk - hơnih pŭ trăp đơ̆ng ‘mi tih đak lơ̆p, lăp đơ̆ng rŏng kơ dơnâu đak Chính Nam đei pơm hơmet ming đang, đak đĭ ro truh tơ̆ chŭn, kon pơlei jang chŭn mir tơ gĕch choh teh, hăt hot rei hơdrĕch. Lơ̆m hơgăt teh să hloh 2.200 hek tar ƀa Phang, truh dang ei tơring đĭ rei hơdrĕch vă jê̆ đang đĭ bơih. ‘Ngoăih kơ 110 tấn ƀa hơdrĕch đei dêh char tơgŭm kơtă, ‘meh vă uơ oei dơ̆ng dang 180 tấn, dêh char Đắk Lắk hlôi đei trong jang tơgŭm jên vă kon pơlei kơchăng răt hơdrĕch lăp hăm chŭn na, vei sơđơ̆ng tơtom pơyan jang. Tơdrong chơt hơiă ƀôh hơdăh tơ̆ muh măt kon pơlei jang chŭn mir ƀơ̆t đei tơgŭm trŏ ƀlep. Ƀok Mai Tấn Huy, kon pơlei jang chŭn mir xăh Hòa Thịnh tơroi:

“Kon pơlei jang ƀa pơyan Phang hlôi đei teh đak tơgŭm hơdrĕch vă kon pơlei rei ƀa vă kơ tom pơyan jang. Tŏ ‘mi kial tôch kơ hiôk ăn kon pơlei rei ƀa. Hơmĕng ‘noh jĭ đei plei lơ”.

Ưh khan lăp tơ̆ Hòa Thịnh, đơ̆ng rŏng đak lơ̆p, lơ tơring păh Hơlĕch dêh char Đắk Lắk kŭm nhen vă hiong pơgoh ƀa hơdrĕch mong răk. Kiơ̆ jô̆ hơlen đơ̆ng anih jang găh choh jang sa, akŏm ‘meh vă ƀa hơdrĕch pơyua ăn rei pơtăm pơyan ƀa Phang lơ̆m dêh char dang 26.000 tấn. Truh dang ei, hăm kon jên đơ̆ng dêh char păng tơdrong vang tơgŭm đơ̆ng dôm anih mơdro sa, khŭl jang, kơdih, hlôi đei dang 15.000 tấn ƀa hơdrĕch đei tom gơih truh tơpang ti kon pơlei jang chŭn mir. Mă đơ̆ng thoi noh, pơting hăm ‘meh vă tơpă yan âu, lơ̆m dêh char Đắk Lắk oei ưh kơ măh dang 11.000 tấn hơdrĕch, dêh char hơnơ̆ng tơgŭm jên vă kon pơlei kơchăng răt hơdrĕch lơ̆m dôm năr truh.

Hơdai hăm jên tơgŭm đơ̆ng tơring, rim anih jang khoa hŏk kŭm hơdrin vang yak hơdai hăm kon pơlei jang chŭn mir tơring ‘mi kial đak tih pơrăm. Lơ̆m pơyan jang ƀa phang âu, Anih jang Khoa hŏk Ki Thuơ̆t Tơring tơter đak dơsĭ Nam Trung Bộ hlôi hơnơ̆ng tơlĕch jang dôm tơdrong jang tơgŭm ƀa hơdrĕch ăn kơ kon pơlei rim tơring păh Hơlĕch dêh char Đắk Lắk. Ƀok Nguyễn Đức Thọ, Kơdră Anih pơtho pơjao kơmăy kơmŏk păng pơtrŭt choh jang, Anih jang Khoa hŏk Ki thuơ̆t Tơring tơ ter đak dơsĭ Nam Trung Bộ tơbăt, tơ̆ lơ hơnih asong ăn, dôm jĭt tấn ƀa hơdrĕch hlôi đei pơjao truh tơpang ti kon pơlei.

 “Nhôn hơnhăk dôm hơdrĕch ‘lơ̆ng ki thuơ̆t ‘nao lơ̆m rei pơtăm, dôm hơdrĕch âu ‘noh kĕ ăn iŏk yua lơ, păng đĭ klui pơyan jang pơting hăm khei joăt pơtăm. Kơlih thoi noh nhôn hơnhăk dôm hơdrĕch păh lăp khei ‘năr păng kơđeh năr vă vei sơđơ̆ng đei plei lơ ăn pơyan jang ƀa Phang vă jê̆ truh đơ̆ng kon pơlei jang chŭn na”.

Kiơ̆ chih jô̆, truh khei ‘năr dang ei, lơ̆m dêh char Đắk Lắk đĭ rei hơdrĕch dang 70% chŭn na lơ̆m akŏm kơsô̆ 26.000 hek tar ƀa pơyan Phang. Kơsô̆ chŭn na uơ oei dơ̆ng tŏk bŏk đei kon pơlei hơnơ̆ng rei hơdrĕch ƀơ̆t hơdrĕch đei ăn dơ̆ng păng tŏ ‘mi kial hiôk ‘lơ̆ng. Mă đơ̆ng rei pơtăm hiơ̆ ƀiơ̆ pơting hăm năr jang hmă, mă lei hăm tơdrong iŏk yua dôm hơdrĕch ƀa păh lăp păng kơđeh năr, anih jang găh choh jang sa hơmĕng iŏk yua păng plei lơ pơyan ƀa Phang sơnăm ‘nâu oei đei vei sơđơ̆ng.

Yă Đặng Thị Thủy, Phŏ Kơdră Anih vei lăng găh Choh jang sa păng Cham char dêh char Đắk Lắk tơbăt, anih jang chih iŏk păng lăng ‘lơ̆ng tơdrong vang yak hơdai tơtom, tơnăp đơ̆ng dôm anih mơdro sa, bơngai đei jơhngơ̆m đon ‘mêm mơnat păng dôm anih jang khoa hŏk lơ̆m tơdrong tơgŭm kon pơlei tơring đak lơ̆p. ‘Nâu jĭ tơdrong tơm gĭt kăl tơgŭm kon pơlei jăh tơiung ming choh jang sa, sơđơ̆ng tơdrong jang sa. Yă Đặng Thị Thuỷ roi tơbăt: Dang ei, Anih vei lăng găh Choh jang sa păng Cham char dêh char Đắk Lắk hlôi athei dôm anih joăt jang hơtŏk loi dơ̆ng lăng kiơ̆ tơring, pơtho kon pơlei iŏk yua trong choh pơtăm, vei rong kon tơrong vă hơtŏk ‘lơ̆ng iŏk yua choh jang sa păng vei sơđơ̆ng hơtŏk tơiung kơjăp tơ̆ hơnăp kơnh.

“Anih jang hlôi pơgơ̆r ăn rim anih joăt jang hơlen lăng pơtho ăn kon pơlei rim xăh vă tơtom rei pơtăm kŭm nhen tôm tơdrong ‘lơ̆ng vă vei sơđơ̆ng vei rong kon tơrong lơ̆m khei ‘năr dang ei kŭm nhen vă jê̆ truh. Hơdai hăm pơtho tơtom lơ̆m tơdrong joăt jang tơ̆ rim tơring vă kon pơlei hơđơ̆ng jơhngơ̆m păng pơgơ̆r jang sa”.

Đơ̆ng dôm kơdơ chŭn ‘nao tơiung đơ̆ng rŏng ‘mi tih đak lơ̆p, đon lui tŏk bŏk đei hơlơ̆k dơ̆ng hăm kon pơlei jang chŭn mir păih Hơlĕch Đắk Lắk. Hăm tơdrong hơdrin hrơ̆ch đơ̆ng hơdrĕch, ki thuơ̆t truh pơgơ̆r choh jang, kon pơlei tŏk bŏk hơmĕng pơyan ƀa Phang 2026–2027 gô jing 1 pơyan jang sa đei iŏk yua lơ, tơgop jăh sơđơ̆ng tơdrong hơrih sa păng hơtŏk tơiung choh jang sa kơjăp đơ̆ng ‘mi tih đak lơ̆p pơrăm.