Ŭnh hnam ƀok Ksor Bư (hơdrung Jarai) oei lơ̆m pơlei Bi, tơring sơlam teh đak Ia O, dêh char Gia Lai đei hloh 300 dơnơm ksu păng 4 sao ‘long găr sơlơ̆k. Ƀok Bư tơbăt, mĭnh ƀar sơnăm kơ ou, tơdrong hơrih sa kơ kon pơlei tơring sơlam teh đak tơplih kơtang. Đei tơdrong lăng ba đơ̆ng Đảng păng Teh đak, kơjă tơmam drăm choh jang sa tŏk măt, kon pơlei pơnam jang sa, kơna tơdrong hơrih sa đei iŏk yoa kơjăp. “Hrei ou, mŭk drăm ŭnh hnam gơnơm đơ̆ng choh jang sa, hăm 4 sao mir pơtăm ‘long găr sơlơ̆k păng dang 300 dơnơm ksu. Todrong jang sa iŏk đei đơ̆ng ‘long pơtăm ou tơgŭm ăn ŭnh hnam roi năr roi sơđơ̆ng hơrih sa. ‘Ngoăih kơ ‘noh ŭnh hnam oei rong rơmo, adoi iok mơ̆r ĭch rơmo chă tuh ăn ‘long ksu păng ‘long găr sơlơ̆k, mĭnh păh pơkom đei kon jên jang adoi atŏk đei iŏk yoa kơjăp. Đơ̆ng jang sa ou ŭnh hnam hơrih sa sơđơ̆ng, vei lăng năng tông kon hơ ‘lơ̆p hŏk pơhrăm.”

Hăm sơnăm 70, ƀok Ra Lan Calan oei tơ̆ pơlei Bi, tơring sơlam teh đak Ia O (dêh char Gia Lai) oei hơnơ̆ng yak hơdoi hăm kôn mon kon soi vei lăng năng tông mir pơgar chehphe, ksu. Ƀok Calan tơbăt, hlôi đei ‘măng tơƀơ̆p tôch kơ lơ tơdrong mơmat tat gleh hrat mưh rong ‘me măh 8 ‘nu kon lơ̆m mă ŭnh hnam oei mơmat tat. Dang ei hăm jang sa mĭnh sơnăm iŏk đei hloh 200 triu hlak jên, ƀok Calan gơh sơđơ̆ng jơhngơ̆m vă chă pơma găh mĭnh pơyan puih mak hiôk chơt, găh kon hơ ‘lơ̆p hlôi tih vơ̆ djơ̆ ‘lơ̆ng păng pơlei pơla tơplih roi năr roi kơtang.“Lơ̆m pơlei, kon pơlei đei Teh đak lăng ba, tơgum djru tơtom, mă kăl ‘noh rim ŭnh hnam dơnuh păng vă jê̆ dơnuh. Hodrô̆ ŭnh hnam bơ̆n, gơnơm pơnam jang sa, hơdrin jang sa chă pơtăm bơ̆n chehphe, tiu, ‘long găr sơlơ̆k kơna tơdrong hơrih sa sơđơ̆ng pă đei tơnap tap nhen sơ̆ bơih. Găh kon hơ ‘lơ̆p, mă đơ̆ng tơdrong hơrih sa oei gleh grat mă lei ba ling lang hơdrin pơjing rơvơn ăn kôn mon kon sou sơđơ̆ng hơrih sa păng roi năr hơrih sa roi sơđơ̆ng.”

Atŭm hăm pơlei Bi, kon pơlei oei lơ̆m pơlei Mit Chep, tơring Ia O jei tơplih ‘nao gơnơm chă pơtăm bơ̆n chehphe, ksu. Mă kăl, hloh 120 ‘nu bơngai lơ̆m pơlei tŏk bŏk jang lơ̆m rim hơnih ƀô̆ đô̆i oei lơ̆m tơring, tơgop pơjing đei tơdrong jang păng jang sa iŏk yoa kơjăp. Ƀok Ksor Chu, Bí thư Chi bộ jang hloi Thôn trơng sơkơ̆t hơdăh, trong bơ̆ jang đơ̆ng Đảng păng Teh đak tơpă pơtrŭt kơtang atŏk tơ iung mŭk drăm-tơpôl tơ̆ tơring sơlam teh đak. Pơlei đei vă jê̆ 360 ŭnh hnam, găh lơ ‘noh bơngai Jrai mă lei dang ei lăp pă 17 ŭnh hnam dơnuh, ŭnh hnam vă jê̆ dơnuh. “Đơ̆ng dôm trong bơ̆ jang trŏ lăp đơ̆ng Đảng păng teh đak lơ̆m tơdrong lăng ba, tơgŭm djru kon kông, mă kăl bơngai Jrai, tơdrong hơrih sa kơ kon pơlei roi năr roi sơđơ̆ng. Khul kơdră chĕp pơgơ̆r tơring jei tơmơ̆t jên jang, pơjing rơvơn atŏk tơ iung mŭk drăm ‘moi kiơ̆ rim tơdrong jang pơtăm chehphe, ksu, tiu; păng jei găh kơjă tơmam drăm choh jang sa, mă kăl ‘noh kơjă chehphe, roi năr roi sơđơ̆ng. ‘Ngoăih kơ ‘noh, khul kơdră chĕp pơgơ̆r tơring jei pơih rim lăm pơtho tơbăt ăn kon pơlei găh kih thuơ̆t tơmơ̆t jang kiơ̆ lơ̆m choh jang sa vă ‘long pơtăm plei ăl, hơnhăk đei iŏk yoa kơjăp. Kon pơlei tôch chơt hơ iă păng bơnê kơ Đảng păng Teh đak hlôi lăng ba tơdrong hơrih sa kơ kon pơlei.”

Hăm đei hloh 300ha chehphe, 1.200 ha ‘long găr sơlơ̆k, atŭm hăm tơdrong lăng ba đơ̆ng rim Kŏng ty ksu păng rim khul jang mŭk drăm-vei lăng teh đak 74, 75, 715, kon pơlei oei lơ̆m tơring Ia O, dêh char Gia Lai đei tơdrong hơrih sa sơđơ̆ng păng hơnơ̆ng atŏk tơ iung. Ưh khan tơplih ‘nao găh mŭk drăm, Ia O oei ƀôh hơdăh atŏk kơtang lơ̆m tơplih kơsô̆. Mă đơ̆ng tơring hơtăih yăih, hăm hloh 58% măt bơngai ‘noh bơngai Jrai, mă lei hrei ou hloh 90% hô sơ bơ̆ jang đei jang keh đang kiơ̆ trư̆k tuyên. Vă iŏk đei jơnei hơ iă ou, tơring hlôi pơrô̆ hơvơn hơdruh tơdăm năm iung jang năm truh pơlei pơtho ăn kon pơlei pơm định danh điện tử VNeID păng bơ̆ jang pơm hla bơar ou to kiơ̆ trư̆k tuyên. Yă Hà Thị Hường, bơngai bơ̆ jang lơ̆m Hơnih bơ̆ jang pơm hla bơar tơring Ia O tơbăt:“Kmăi kmŏk dang ei hlôi sơđơ̆ng, đơ̆ng rŏng hơgrop đei kơdră kơpal lăng ba kơjăp kơna tơring chă răt mĭnh ƀar kmăi kmŏk. Kang ƀô̆ iŏk pơm hô sơ păng pơtho tơbăt ăn kon pơlei. Đơ̆ng rŏng hơgrop kang ƀô̆ bơ̆ jang tôch hơdrin, bơ̆ jang prăt năr hloi, pơm keh đang hô sơ 90%, đei ‘măng keh đang 98%, 99% xek tơlang ƀlep jơ ‘năr pơkă, tôm tong”.

Lơ̆m dôm năr vă jê̆ Têt Bính Ngọ, bơ̆ jang vei lăng năng tông tơdrong hơrih sa tơpôl jei đei tơring lăng ba kơjăp. Ƀok Phan Đình Thắm, Kơdră chĕp pơgơ̆r Hơnih vei lăng kon pơlei tơring Ia O, dêh char Gia Lai tơbăt.“Têt Nguyên đán, rim tơdrong hơrih sa tơpôl, rim ŭnh hnam đei iŏk yoa ăn teh đak, rim ŭnh hnam dơnuh, vă jê̆ dơnuh lơ̆m tơring đei lăng ba kơjăp păng chă tơgŭm djru tơmam drăm. Nhen tơmam  hơpăh đơ̆ng Trung ương hlôi pơtruh ăn truh hăm dôm ŭnh hnam đei iŏk yoa ăn teh đak đơ̆ng 300.000 truh 600.000 hlak jên. Mă kăl rim khul kŏng ang, ƀô̆ đô̆i, ƀô̆ đô̆i vei lăng sơlam teh đak hlôi pơm ‘nhŏng oh hăm rim pơlei, kon pơlei kon kông tơnap tap lơ̆m tơring, tơgum djru kon pơlei dơnuh sa têt chơt hơ iă, ƀĕnh ƀang jơhngơ̆m đon tơgoăt tơgoăl rim tơring sơlam teh đak, tơring dơnuh, tơring hơtăih yăih tơgoăt kơjăp jơhngơ̆m đon ‘mêm kơ eng dih băl ƀô̆ đô̆i kon pơlei adoi nhen ƀar păh kang ƀô̆ tơring hăm kon pơlei kơtă”.

Puih mak hlôi vih truh hăm mir pơgar Ia O. Ksu tŏk bŏk lơ̆m pơyan tơplih hla ‘nao, chehphe tơbŭk tơbăk chôh pơkao ƀou phu tru hut atŭm hăm muh măt tơbôch tơbach kơ kon pơlei tơring sơlam teh đak kơna ƀôh hơdăh găh mĭnh pơyan puih mak ‘nao-puih mak kơ phĭ tơtŏ dơnŏ ‘lơ̆ng dơ̆ng kơjăp, kơ jơhngơ̆m đon lui yom păng kơ tơdrong tơgoăt tơgoăl dih băl kơjăp iăp kơtang ƀar păh Đảng, teh đak, khul ƀô̆ đô̆i kŏng ang păng kon pơlei tơring sơlam teh đak dêh char Gia Lai. Mĭnh pơyan puih mak sơđơ̆ng dơ̆ng kơjăp tŏk bŏk lang sa tơ̆ tơring sơam kơ Teh đak.