Tơ̆ cham rông pơlei Kăm, tơring Ia Krái, dêh char Gia Lai, jơ ‘năr lêh puih mak pơih blŭng hăm “Năr lêh ƀĕng chư̆ng jơk” lơ̆m jơ ‘năr chơt hơ iă ‘nă hal. Khul kơdră chĕp pơgơ̆r Hơnih tơm chĕp pơgơ̆r Binh đoàn 15, khul kơdră chĕp pơgơ̆r tơring atŭm hăm kon pơlei rim pơlei đei klăh asong dih băl jing 4 khul, chơt hơ iă ‘nă hal pơting dih băl ‘nŭng ƀĕng chư̆ng, pơjing đei jơ ‘năr hiôk chơt, tơgoăt dih băl ƀô̆ đô̆i - kon pơlei ‘lơ̆ng liĕm. Jơ̆p lơ̆m cham rông ‘noh rim “hơdrơ̆r tơmam drăm 0 hlak jên” tơgŭm ăn kon pơlei hơmet ăn Têt. Lơ tơdrong pơgơ̆r pơchơt pơhiơ̆ kră sơ̆ jei đei pơgơ̆r, hơvơn đei lơ đe hơ ioh vang chă pơchơt ngôi, nơ̆r pơma dơnuh, hiơ hiĕk jĭ iơ iơ̆r iơ iăr.

 Truh gơmăng, tơ̆ ou hlôi jing năr lêh puih mak ƀĕng ƀang tơdrong oei sa joh ayŏ joăt joe sơ̆ ki kơ Tây Nguyên hăm pơgơ̆r soh pôi ŭnh păng lơ tơdrong hơri hơ ‘nguơ̆i kơ pơlei pơla, teh đak atŭm hăm tôn bơ̆n chĭng chêng, hơsoang ‘lơ̆ng rŏ. Vang năm ‘măng pơgơ̆r, mŏ Ksor Nuch - kon pơlei oei lơ̆m pơlei Dọch Krót, tơring Ia Krái chơt hơ iă tơbăt:“Ƀô̆ đô̆i vih sa Têt hăm Kon pơlei ‘noh chơt hơ iă ‘nă hal dêh. Pơgơ̆r pơlong ‘nŭng ƀĕng chưng, rim tơdrong pơchơt kră sơ̆ păng pơgơ̆r joh ayŏ kơdŏ soang, sŏng sa ‘nhĕm ‘nhot pơ đĭ kơ bơngai Jarai hăm bơngai Yuăn, pơjing đei jơ ‘năr tơgoăt tơgoăl chơt hơ iă ‘nă hal hloh”.

Lơ̆m jơ ‘năr pơgơr, Binh đoàn 15 hăm Đoàn Kinh tế – Quốc phòng 715 hlôi pôk ăn kơhrĕng tơmam drăm ăn ŭnh hnam đei iŏk yoa ăn teh đak, ŭnh hnam dơnuh. Hơnih tơm chĕp pơgơ̆r Binh đoàn 15 hlôi tŏk ngôi rim hnam, apĭnh jet gia pơma dơnuh, pôk ăn tơmam drăm, hmach thơ thou Têt rim kră pơlei, thôn trơng, bơngai đei kon pơlei lui yom păng ŭnh hnam đei iŏk yoa ăn teh đak; năm ngôi, hmach Têt Kơđông ƀô̆ đô̆i vei lăng sơlam teh đak Ia O, khul kơdră chĕp pơgơ̆r Đảng, chĕp pơgơ̆r tơring kơ rim tơring Ia O hăm Ia Krái.

 Thiếu tướng Hoàng Văn Sỹ - Kơdră chĕp pơgơ̆r Binh đoàn 15 tơbăt, tơdrong pơgơ̆r “Puih mak sơlam teh đak ƀô̆ đô̆i kon pơlei tơgoăt dih băl hơ iă” gô hơnơ̆ng tơlĕch jang. Lơ̆m ‘măng mă blŭng, Binh đoàn gô pôk ăn 30.000 tơnô̆ tơmam drăm ăn rim kang ƀô̆, bơngai jang păng Kon pơlei rim pơlei; tơgum djru 100 tân phŏng mơ̆r vi sinh hăm tơdrong jang ‘Rơgoh ‘lơ̆ng Trường Sa” sơnăm 2026.

Hloh đơ̆ng ‘măng pơgơ̆r u, Binh đoàn 15 ưh khan lăp vei lăng năng tông tơdrong hơrih sa, jơhngơ̆m đon ăn kon pơlei mă oei iung jang tơdrong jang chinh trĭ tôch gĭt kăl, tơgop pơm kơjăp hloh dơ̆ng tơgoăt tơgoăl dih băl, hơmet pơ ‘lơ̆ng jơhngơ̆m đon lui yom đơ̆ng Kon pơlei hăm Đảng, teh đak păng Ƀô̆ đô̆i, tơ iung pơjing kơjăp iăp kơtang “jơhnyơ̆m đon kon pơlei yom kiơ̆ tơ̆ tơring sơlam Teh đak. Thiếu tướng Hoàng Văn Sỹ tơbăt: “Sơnăm 2026, nhôn iŏk yoa dôm tơmam drăm kơ dih lơ̆m Binh đoàn tơmơ̆t lơ̆m rim tơmam drăm pôk ăn. Đơ̆ng noh, pơm hơtŏk lui dơ̆ng jơhngơ̆m đon lăng ba dih băl kơjăp đơ̆ng Binh đoàn 15 hăm kon pơlei, tơ iung pơjing tơgoăt tơgoăl dih băl kơjăp kiơ̆ ƀlep trong tơlĕch ăn đơ̆ng Quân ủy Trung ương pơrô̆ ‘noh ưh kơ lê̆ bơngai bu hơchăng hŭt tơ̆ rŏng. Đơ̆ng noh jơhngơ̆m đon lui yom sa roi kơtang păng tơpă jing jih pran kơjăp iăp kơtang hloh vei lăng Teh đak lơ̆m chăl hle”.

Găh tơ̆ tơring sơlam teh đak kơ dêh char Dak Lăk, jơ ‘năr puih mak tŏk bŏk truh hrôih hloh hăm dôm tơdrong jang lăng ba duih băl kơjăp đơ̆ng kang ƀô̆, ƀô̆ đô̆i kơ Khul Ƀô̆ đô̆i vei lăng sơlam teh đak lăng tông nông gia Têt ăn kon pơlei mă kăl hăm ŭnh hnam tơnap tap, ŭnh hnam răm kơtang đơ̆ng ‘mi kial hơbŭt hơbông pơrăm.

Tơ̆ phường Sông Cầu, dêh char Dak Lăk, Kơđông Ƀô̆ đô̆i vei lăng sơlam teh đak iung jang hơdoi hăm Khul dro kăn phương pơgơ̆r “Năr lêh ƀĕng chư̆ng jơk”. Kơhrĕng tŏ ƀĕng ‘mêm kơ eng dih băl đei pôk ăn truh tơ̆ tơpang ti rim ŭnh hnam dơnuh, unh hnam đei iŏk yoa ăn teh đak, tơgop hơnhăk đei jơ ‘năr Têt chơt hơ iă ‘nă hal. Sơng iŏk tơmam Têt đơ̆ng ƀô̆ đô̆i vei lăng sơlam teh đak, ƀok Dương Bình Yên, oei tơ̆ thôn Phú Hòa, phương Sông Cầu, tơbăt:“Tôch chơt hơ iă sơng iok đei tơmam pôk ăn dôm bơngai dơnuh, dôm tơring răm đơ̆ng ‘mi kial hơbut hơbông pơrăm ou ki vă đei mĭnh pơyan Têt Bính Ngọ chơt hơ iă ‘nă hal păng hơnŭk hơnoa hloh.”

Tơ̆ phường Hòa Hiệp, Kơđông ƀô̆ đô̆i vei lăng sơlam teh đak Hòa Hiệp Nam iung jang hơdoi hăm rim hơnih bơ̆ jang Pơgơ̆r”Puih mak Sơlam teh đak, chhơp jơhngơ̆m đon kon pơlei”. Khul pơgơ̆r hlôi pôk ăn 110 tơnô̆ tơmam drăm ‘noh đei jên hmă hăm tơmam drăm ăn rim ŭnh hnam đei iŏk yoa ăn teh đak, unh hnam đei iŏk yoa ăn kĕch mang, ŭnh hnam dơnuh, rim đe oh lơ̆m khul “Ba oh năm tơ̆ hnam trương”. Atŭm hăm ‘noh, khul ƀok thây pơgang ƀô̆ đô̆i oei pơgơ̆r khăm, pơtho tơbăt jơhngơ̆m pran jăng păng ƀơk pơgang ăn dang 100 ‘nu kon pơlei.

Jei lơ̆m dôm năr ou, rim kơđông ƀô̆ đô̆i vei lăng sơlam teh đak tơ̆ đak dơsĭ kơ Dak Lăk oei iung jang hơdoi hăm rim Khul đei jơhngơ̆m đon ‘lơ̆ng tơgŭm djru ming hơmet hnam oei ăn lơ ŭnh hnam kon pơlei tơnap tap, tơgŭm ăn kon pơlei hrôih sơđơ̆ng đei hơnih oei, sơđơ̆ng jơhngơ̆m jang sa păng sơng Têt chơt hơ iă ‘nă hal. Thiếu tá Vũ Lý Huỳnh, Chính trị viên Kơ iĕng Kơdră chĕp pơgơ̆r Kơdông ƀô̆ đô̆i vei lăng sơlam teh đak Xuân Đài, Hơnih tơm Ƀô̆ đô̆i vei lăng sơlam teh đak dêh char Dak Lăk tơbăt:“Tơdrong pơgơ̆r Têt ƀô̆ đô̆i kon pơlei sơnăm ou ‘noh kang ƀô̆, ƀô̆ đô̆i kơđông Xuân Đài đei lơ trong tơplih ‘nao hloh, pơgơ̆r truh tơ̆ hơnih apĭnh jet gia pơma dơnuh, hơlêm rim kon pơlei rôp ka hơdang ou ki hiong răm kơtang đơ̆ng kial hơbŭt kơsô̆ 13 păng ‘măng ‘mi hơbông đak lip pơrăm ou ki. Tơtom hơlêm păng pôk tơmam drăm vă kon pơlei hơdrin tơklep hăm đak dơsĭ, atŭm hăm khul Ƀô̆ đô̆i vei lăng sơlam teh đak iung jang vei lăng năng tông kơjăp đak dơsĭ, achon dơsĭ, sơđơ̆ng dơ̆ng kơjăp tơring sơlam teh đak tơ̆ đak dơsĭ păng tơgop atŏk tơ iung mŭk drăm tơpôl tơ̆ tơring”.