Tơ̆ tơdrong jang, Binh đoàn 15 păng Khŭl jang Mŭk drăm - Khŭl lĭnh 715 hlôi pơjao asong kơhrĕng tơpu tơmam ăn kơ dôm bơngai teh đak tơgŭm, ŭnh hnam dơnuh hin. Anih tơm chĕp kơ̆l pơgơ̆r Binh đoàn 15 hlôi truh tơ̆ hnam năm ngôi apĭnh jet gia, asong tơmam, thơ thou Têt ăn đe kră pơlei, bơngai pơgơ̆r pơlei, bơngai đei đe lui yom păng ŭnh hnam teh đak tơgŭm; năm ngôi, thơ thou Têt Kơđông lĭnh vei lăng tơring sơlam Ia O, kơdră đảng, kơdră chĕp kơ̆l dôm xăh Ia O păng Ia Krái.

Thiếu tướng Hoàng Văn Sỹ – Yŏng chĕp kơ̆l pơgơ̆r Binh đoàn 15 tơbăt, tơdrong jang “Pơyan Puih mak tơring sơlam ƀĕnh tơdrong ‘mêm đơ̆ng lĭnh hăm kon pơlei” gô hơnơ̆ng đei tơlĕch jang. Lơ̆m ‘măng mă 1, Binh đoàn gô asong 30.000 tơpu tơmam truh kang ƀô̆, bơngai jang păng Kon pơlei rim pơlei; tơgŭm 100 tấn phŏng hữu cơ vi sinh hăm tơdrong jang “Rơgoh ‘lơ̆ng Trường Sa” sơnăm 2026.