Dôm năr ou, tơ̆ rim pơlei pơla găh Tơring kăl Lý Sơn, dêh char Quảng Ngãi, bơ̆ jang pơrô̆ pơrôp, pơtho tơbăt găh pôk rơih kơdră tang măt Kuô̆k hô̆i jăl XVI păng Kơdră tang măt Jơnŭm vei lăng kon pơlei rim kâp tŏk bŏk đei tơlĕch tôch kơtang, akŏm lơ̆m pơm hơdăh tơdrong kăl, hơnăp jang kơ bơngai tăh hla. Găh lơ kon pơlei lăng kơjăp păng hlôh vao hơdăh hơnăp jang kơ bơngai Kơdră tang măt jơnŭm vei lăng kon pơlei ‘noh bơngai tang măt ăn jơhngơ̆m đon, tơdrong hơpơi ‘meh vă đơ̆ng bơ̆n. Ƀok Nguyễn Văn Huy, Kơdră chĕp pơgơ̆r Tơring kăl Lý Sơn, dêh char Quảng Ngãi tơbăt, tơring iung jang hơmet ăn rim tơdrong kăl, tơdrong tơm ‘noh pơrô̆ tơbăt vă kang ƀô̆, đang viên păng kon pơlei băt hlôh ƀôh hơdăh tôm tong tơdrong gĭt kăl kơ ‘măng pôk rơih; adoi sơđơ̆ng ăn vei lăng sơđơ̆ng dơ̆ng kơjăp păng rim tơdrong rơvơn vă bơngai tăh hla năm jang tôm tong nơnăp jang, sơnong jang kơ bơ̆n.“Hrei ou, tơring hlôi pơgơ̆r hop akŏm pơma dơnuh mă blŭng, ‘moi kiơ̆ hla bơar chih hơnăn kang ƀô̆ păng rim hơnih jang găh Khul kơdră chĕp pơgơ̆r Đảng tơring kăl vei lăng vă apĭnh jet ăn chih hơnăn lơ̆m khul vă pôk rơih. Adoi, pơrô̆ tơbăt jơ̆p jang vă rim bơngai tang măt vang ba hla bơar chih hơnăn ăn pôk rơih. Truh dang ei hlôi jang kiơ̆ ƀlep trong tơlĕch ăn đơ̆ng Hơnih bơ̆ jang pôk rơih tơlĕch ăn”.

Tơ̆ tơring Nghĩa Hành, dêh char Quảng Ngãi, bơ̆ jang hop akŏm pơma dơnuh, iŏk nơ̆r tơgop đơ̆ng kang ƀô̆ păng bơngai tang măt rim pơlei pơla tŏk bŏk đei pơgơ̆r tơpăt ‘lơ̆ng, ƀlep tơchơ̆t. Tơdrong tơƀôh tơbăt măt bơngai vă pôk tơmơ̆t tơ̆ rim pơlei pơla đei hơmet ăn tôch kơ ‘lơ̆ng ‘moi kiơ̆ pơma dơnuh dih băl tơpăt găh tơdrong pơkăp, jơhngơ̆m đon ‘lơ̆ng păng bơ̆ jang gơh. Hơnih bơ̆ jang Măt trân rim pơlei pơla păng Hơnih jang pôk rơih tơring Nghiã Hành pơgơ̆r iŏk nơ̆r tơgop đơ̆ng bơngai tăh hla mă dôm bơngai đei hơnăn vă pôk tơmơ̆t hơrih sa tơ̆ noh.

Ƀok Lê Quang Thu, Kơdră chĕp pơgơ̆r Hơnih bơ̆ jang Mặt trận Tổ quốc Việt Nam tơring Nghĩa Hành, dêh char Quảng Ngãi tơbăt, tơdrong bơngai tang măt đei jơhngơ̆m đon ‘lơ̆ng ‘noh jing tơdrong tơm hloh.“Vă tơlĕch jang ‘lơ̆ng tơƀôh tơbăt bơngai tang măt Jơnŭm vei lăng kon pơlei, hơnih bơ̆ jang athei rim hơnih jang iung jang kiơ̆ tơroi tơbăt hơdăh ăn đĭ đăng kang ƀô̆, bơngai jang. Hăm dôm bơngai vă pơm kơdră tang măt tơ̆ pơlei pơla, Hơnih bơ̆ jang măt trân pơlei pơla pơgơ̆r hop akŏm bơngai tăh hla păng rim chi hô̆i, khul ou to vă tơroi tơbăt dôm bơngai đei rơih vă pôk tơmơ̆t”.

Lơ̆m dêh char Quảng Ngãi đei 4 hơnih pôk rơih kơdră tang măt Kuôk hô̆i, pôk rơih 11 ‘nu bơngai tang măt; 21 hơnih pôk rơih kơdră tang măt Jơnŭm vei lăng kon pơlei dêh char, pôk rơih 66 ‘nu bơngai tang măt. Tơ̆ tơring, hlôi pơtruh ăn tơdrong tơchơ̆t găh hơnih pôk rơih păng măt bơngai tang măt đei pôk rơih hăm akŏp đĭ đăng 683 hơnih pôk rơih. Bơ̆ jang hop akŏm rơih blŭng a đei tơlech jang ƀlep trong jang păng tơroi tơbăt tôm tong truh rim hơnih bơ̆ jang kơpal.

Yă Y Bích Thọ, Kơ iĕng Kơdră chĕp pơgơ̆r Hơnih bơ̆ jang Mặt trận Tổ quốc Việt Nam dêh char Quảng Ngãi tơbăt, Mặt trận rim kâp chĕp pơgơ̆r bơ̆ jang tôm tong, tơpăt ƀlep 3 ‘măng hop akom rơih hơdrol kiơ̆ Khôi luơ̆t pôk rơih, sơđơ̆ng tơpăt, hơdăh đơ̆ng jơ tơƀôh tơbăt măt bơngai vă pôk rơih hloi.“Lơ̆m pơgơ̆r pơma dơnuh rơih blŭng a, Hơnih bơ̆ jang Mặt trận Tổ quốc Việt Nam dêh char Quảng Ngãi lăng kơjăp tơdrong ‘lơ̆ng, jang gơ̆h kơ bơngai chih hơnăn ăn pôk rơih; adoi sơđơ̆ng proh hơmet trŏ lăp kiơ̆ găh drŏ nglo drŏ kăn, găh sơnăm ‘lơ̆p ‘lŏ, găh hơdrĕch hơdrung, găh tơdrong lui khop, găh kon pơlei pơla; lăng kơjăp ƀar păh kiơ̆ tơdrong pơkăp păng proh ăn, lăng tơdrong gơ̆h găt kơ bơngai tang măt ‘noh tơm hloh. Tơdrong iŏk nơ̆r tơgop, drơ̆ng nơ̆r đơ̆ng bơngai tăh hla lơ̆m tơring pơlei mă bơngai tang măt oei păng hơnih bơ̆ jang ‘noh jei tôch gĭt kăl, tơƀôh hơdăh jơhngơ̆m đon, tơdrong hơpơi ‘meh vă đơ̆ng Kon pơlei”.