Tơ̆ dơnŏk duk ka Đông Tác lơ̆m phương Phú Yên, dêh char Đăk Lăk,  22 tong duk rôp you ka vih dơ̆ng, chĕp ba dôm jĭt tâ̆n ka ngư đak dơsĭ vă tĕch ăn dôm hơnih jang mŭk drăm jang gah ka hơdang. Lơ̆m rim tong duk rôp you đei đơ̆ng 50 truh 70 tŏ ka ngư đak dơsĭ, hơtŏ đơ̆ng 2,5 truh 3 tâ̆n ka. Hơdah nhen duk ƀok Phùng Hồng Ánh 'nhăk vih 90 tŏ ka ngư. Duk ƀok Bùi Văn Xông rôp you đei hloh  70 tŏ. Kơjă ka ngư kơchap dreng blŭng sơnăm đei rim hơnih jang mŭk drăm răt hăm kơjă hloh 100 rơbou hlj 1 kĭ, hơtŏk hăm dôm sơnăm hơdrol ki.

Rôp đei lơ ka, kơjă tĕch sơđơ̆ng, kon pơlei jang rôp you ka đei yua lơ. Ƀok Bùi Văn Xông, tơ̆ phương Phú Yên, dêh char Đăk Lăk sô̆ hơ-iă ăn tơbăt: “Sơnăm ou tơdrong chă rôp you ka ƀônh ƀŏ hloh hăm kon pơlei, 'noh adoi sô̆ lơ̆m jơhngơ̆m, pơtơm jur 1 tong duk noh rôp đei truh pơh jĭt hngam jĭt tŏ ka, tơ̆ hơnăp noh hmach bơnê kơ plenh teh bơih. Rôp đei lơ noh hơ-iă bơih. Kơjă tĕch adoi sơđơ̆ng mơ̆n".

Tơ-'ngla duk đei cheh, bơngai jang lơ̆m duk adoi đei xa yua lơ, đei jên chă lơ̆m khei Têt Bính Ngọ. Bơngai jang rôp ka hơdang Phạm Đắc Dũng, oei tơ̆ kueng kơphô̆ 4, phương Phú Yên chơt hơ-iă: "Sơnăm ou plenh teh sơđơ̆ng 'lơ̆ng, ka lơ. Inh năm jang dang ƀar jĭt dôm năr đĕch mă rôp you đei hloh 2 tâ̆n, asong ăn minh 'nu jang pơhlom đơ̆ng 15 - 16 triu hlj. 'Nhŏng oh jang xa ƀôh tŏk, đei xa yua lơ". 

Hơnơ̆ng noh đơ̆ng blŭng khei ning nơng truh khei dŏng kap jĭ khei năr ka ngư đak dơsĭ chêk lar lơ. Đơ̆ng rŏng kơ 'mi kial pơtoi hơnơ̆ng, đak dơsĭ sơđơ̆ng 'lơ̆ng dơ̆ng, ka ngư đei lơ hlôi tơgŭm ăn bơngai jang rôp you ka rôp đei lơ ka, gơnơm thoi noh mă kon pơlei đei jơhngơ̆m lĕch tơ̆ đak dơsĭ rôp you ka kơtă lơ̆m dôm năr têt păng sơng sơnăm 'nao kơtă lơ̆m duk tơ̆ đak dơsĭ. Minh 'nu bơngai jang rôp you ka ăn tơbăt: “Đơ̆ng rŏng kơ pơkă tĕch ka đang, kon pơlei jang rôp you ka hơnơ̆ng pơdơh lơ̆m pơhlom 1 giĕng đang kơ noh pơtoi lĕch tơ̆ đak dơsĭ, xa têt lơ̆m duk tơ̆ đak dơsĭ hloi, kơlih lơ̆m minh sơnăm hơdrô̆ lơ̆m dôm khei ou đĕch rôp you đei yua lơ”.  

Kon pơlei adoi hơpơi 'meh lơ̆m sơnăm 'nao 2026 hơnih jang gah choh pơtăm dêh char Đăk Lăk pơm trong hiôk vă sut lê̆ tơchơ̆t tin nhăn păng pơtăl hăm tơdrong hơlen lăng tơdrong vih vơ̆t vă ƀônh hiôk hloh ăn kon pơlei lơ̆m tơdrong pơm hla bar tơgŭm đak xăng đak dou đơ̆ng Jơnŭm pơgơ̆r teh đak. Ƀok Đặng Cu Em, kơdră vơ̆r duk ka PY91008TS pơtruh nơ̆r: "Kơmăi tin nhăn hloh kơ dôm jĭt sơnăm bơih dang ei so bơih, nhăn tin ưh kơ tôm. Noh hơpơi 'meh hơnih jang kơpal asong sut lê̆ tơdrong nhăn tin, iŏk yua hăm kơmăi hơlen tơdrong vih vơ̆t đơ̆ng kon pơlei”.

  Dôm năr Têt Bính Ngọ tơjê̆ truh adoi jing khei năr dơnŏk duk ka rơ-ông rơ-ang duk mơ̆t lĕch. Kon pơlei hơpơi 'meh sơnăm 'nao plenh teh đak dơsĭ sơđơ̆ng 'lơ̆ng, ka đei lơ, hơnhuăl rôp đei ƀenh kơ ka, theh dreng Châu Âu đei pơih lê̆ vă kơjă ka ngư tĕch ăn teh đak đe gơh tŏk hloh, tơgŭm ăn kon pơlei jang rôp you ka tơ̆ đak dơsĭ da ƀiơ̆ kơ tơnap tap đơ̆ng rŏng minh sơnăm ou ki ƀơm răm đơ̆ng 'mi kial đak hơbông. Sơnăm 'nao, tôm bơ̆n atŭm jơhngơ̆m hơ-'nhăk tơdrong jang rôp you ka hơdang kơ dêh char Đăk Lăk hơtŏk tơ-iung kơjăp sơđơ̆ng.