Ưh kơ đei pơkă mă lei tơƀơ̆p, dôm năr sơnăm đĭ têt tuh, chơt hơ iă kơ Đảng, chơt hơ iă kơ puih mak, bơ̆n năm truh tơ̆ thôn Phú Hữu, tơring Hoà Thịnh, tơring răm kơtang ‘mi kial hơbut hơbông pơrăm păh Hơlĕch dêh char Dak Lăk ƀlep lơ̆m ŭnh hnam mŏ Lê Thị Kim Ngân đei tơmoi tôch kơ lơ. Kang ƀô̆ kong ang dêh char Đồng Nai, Khul drŏ kăn Kong ang dêh char Dak Lăk truh năm pôk ăn kơ ŭnh hnam pơbung hnam ‘mêm kơ eng. Mŏ Ngân chơt hơ iă ‘nă hal, song iŏk tơmam dram gĭt kăl lơ̆m jơ ‘năr gĭt kăl hloh: “Tơpă chơt hơ iă dêh, dang ei pă băt vă pơma lơ liơ bơih. Đe mih ma duch nă vang năm hmach têt, hmach thơ thou ăn ‘nhong pơmai oh sơnăm ‘nao pran jăng grăng akou pang hơnuk hơnoa”.

Jei ƀôh kang bang kơl lơ̆m năr pơjao hnam, ƀok Phương Văn Lành, Bí thư Đảng tơring Hoà Thịnh chơt hơ iă tơroi tơbăt akhan, gru gra đơ̆ng ‘mi kial hơbut hơbông đak lip pơrăm kơtang hlôi hơmet keh đang. Hoà Thịnh tok bok hơmet pơ ‘lơ̆ng tĕnh koăng, ‘lơ̆ng hơ iă. “Năr ou rim ‘nhong pơmai oh bơ̆n năm tơ̆ ou pă đei ƀôh gru gra đơ̆ng ‘mi kial đak hơbông đak lip kơtang pơrăm ou ki bơih, tơdrong hơrih sa kơ kon pơlei tŏk bok vih hơlơ̆k nhen so. ‘Nou jĭ gơnơm tơdrong chĕp pơgơ̆r đơ̆ng rim Đảng, tơdrong vang iung jang hơdoi đơ̆ng pơ đĭ khul jang chinh trĭ, tơdrtong vang kơrŭn đĭ jơhngơ̆m đơ̆ng dôm bơngai đei jơhngơ̆m đon ‘lơ̆ng mă đei đăi nhen lĕ hrei ‘nou văi”.

Hơtăih kơ hnam mŏ Ngân mĭnh ƀar pơnơ̆ chŭn na ‘noh Đội 13 thôn Phú Phong, hơnih đak hơbông đak lip pơrăm kơtang hloh, jei jing hơnih Thủ tướng Phạm Minh Chính hlôi truh năm dăr lăng păng pơrô̆ ‘Măng iung jang Quang Trung. Đơ̆ng dôm hơnih răm kơtang, dang ei tơ̆ ou hlôi đei ŭnh hnam pơgơ̆r et sa sơnăm ‘nao hrôih. Nhen ƀok Trần Văn Khánh, hlôi pơgơ̆r et sa sơng sơnăm ‘nao đơ̆ng hrôih. Truh dang ei sơđơ̆ng jơhngơ̆m, hơmet ăn Têt păng pơ đĭ tơdrong hơrih hơnô̆ hơnăp kơnh.“Dang ei hlôi lăng truh vei lăng năng tông chŭn na chă prôi phŏng, bŭch ‘ngiĕt, pruih pơgang, pơtăm kiĕm păng hơmet ăn ‘long-pơkao sơng têt dơ̆ng văi, đơ̆ng noh hơmet ming dơ̆ng mir pơgar. Pơma atŭm, ŭnh hnam oei lơ tơdrong kăl vă jang dơ̆ng”.

Đei lơ tơdrong tôch hơ iă, ƀok Trần Văn Khánh oei hơnơ̆ng đei chă krao akhan Trần Quốc Khánh. 4 ‘nu kon drŏ nglo kơ ƀok hơnơ̆ng đei tơchă ăn hơnăn ‘noh Hoà, Hội, Nghĩa, Nam… kiơ̆ hơnăn kơ teh đak “Cộng Hoà-Xã Hội-Chủ nghĩa-Việt Nam”. 5 pơbŭng hnam kơ ŭnh hnam đei 5 ‘nu ƀă kon: Quốc Khánh- Cộng Hoà- Xã Hội Chủ Nghĩa- Việt Nam, đei tơ iung pơjing ming man đơ̆ng ‘măng iung jang Quang Trung, hlôi keh đang tơ̆ hơvĕn chŭn na ƀa đak jing ‘lơ̆ng. Kiơ̆ đơ̆ng ‘nhŏng Trần Chủ Nghĩa, tơdrong jang đơ̆ng ‘măng iung jang ming hơmet tih mă Thủ tướng tơlĕch ăn, ưh khan lăp hơnhăk đei hnam ‘nao, vă kon pơlei tơ iung pơjing ming hơmet dơ̆ng tơdrong hơrih sa, mă oei pơm ‘lơ̆ng hơ iă ăn jơhngơ̆m đon.“Tơdăh sơ ‘ngon ‘noh jang ưh kơ lĕch yă kiơ hloi, kơ yuơ ăp jơhngơ̆m đon hiôk chơt ‘nei mă kĕ. Ưh kơ hlôh vao mă đơ̆ng chĕp đak mĭnh get jei diu trăp. Bơ̆n hiôk chơt ‘noh dôm tơdrong jang trăp trĭn dang yơ jei keh đang ngăl, ưh kơ đei gleh hrat yă kiơ ôh”.

Lơ̆m dôm năr chơt hơ iă kơ Đảng, chơt hơ iă kơ puih mak, ‘nhŏng Trần Chủ Nghĩa oei hơnơ̆ng pơjoăl hăm tơdrong chă pơlăp, pơ̆ng hơmet kem pĕng ăn cham hnam vă pơm hơnih sơng tơmoi, lê̆ gre. ‘Nhŏng Nghiã oei chô̆ hơmet đing mam ƀơ̆t ‘măng jang vă pơm jrăng hơtol hla kơ. ‘Nhŏng akhan, tơdrong chă hơtol hla kơ teh đak lơ̆m pơbŭng hnam ‘nao lơ̆m tơring ming hơmet đơ̆ng rŏng ‘mi kial hơbŭt hơbông pơrăm ‘noh jing tơdrong gĭt kăl hloh: “Kăl hơtol 2 tŏ hla kơ tơ̆ ‘măng jang ‘noh mă ‘lơ̆ng. Ih lăng năng văi hnam ayơ mă đei hla kơ ‘noh ‘lơ̆ng rŏ dêh ưh deh? Adoi păh to ‘noh hnam ƀă ĭnh. Sơnăm ou sư hlôi 45 sơnăm jang Đảng bơih, ba jei hlôi hloh mơjĭt sơnăm jang Đảng mơ̆n”.

Lơ̆m jơ ‘năr puih mak Bính Ngọ chơt hơ iă ‘nă hal chơt hơ iă kơ Đảng, chơt hơ iă kơ puih mak, dôm hla kơ ƀrê, sơnglŏng dreng păr mơliơk tơ̆ hơnăp ‘măng jang hnam ‘nao ưh khan tơbăt hơdăh ăn mĭnh pơyan Têt tôm tong, mă oei sơkơ̆t hơdăh jơhngơm đon hơpơi ‘meh vă đei tơdrong hơrih sa sơđơ̆ng dơ̆ng kơjăp, tơ iung pơjing tơdrong hơrih sa ning nai kai ning mônh kơjăp iăp kơtang lơ̆m groi teh ƀĕnh ƀang ‘mi kial hơbut hơbông pơrăm.