Năr rim ŭnh hnam oei tơ̆ tơring đak hơbông pơrăm kơtang Hòa Thịnh, dêh char Dak Lăk ba ƀok Tăo brŏk tơ̆ plĕnh, pơtôch sơnăm Ất Tỵ, jei jing năr chơt hơ iă ‘nă hal rim tơdrong pơgơ̆r “Puih mak khu 5 tơgoăt tơgoăl ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei”. Lơ̆m cham Hơnih gru gra gĭt kăl dăr sơnăm Teh đak Hòa Thịnh, kon pơlei, kang ƀô̆, ƀô̆ đô̆i atŭm dih băl ‘nŭng păng pai ƀĕnh chư̆ng; pơlong dih băl đă ƀŏng lŏng tơplŏng kơdou, joh ayŏ kơdŏ soang. Đe hơ ioh, đe hơdruh tơdăm, bơngai ‘lŏ đei ƀô̆ đô̆i yô̆ ăn sŏk. Rim đe mĕ, đe mŏ chă răt tơmam drăm têt tơ̆ rim hơdrơ̆r tơmam drăm 0 hlak jên. Ƀok Phạm Văn Mạnh, kon pơlei oei lơ̆m tơring Hòa Thịnh, chơt hơ iă pơma: “Mă blŭng bơnê tơdrong lăng ba đơ̆ng Kơdră Đảng, tơdrong tơgŭm djru đơ̆ng Ƀô̆ đô̆i. ‘Măng ‘mi kial hơbŭt hơbông pơrăm ou ki hlôi tơgŭm ăn kon pơlei tôch kơ lơ găh tơmam drăm, phe ƀa. Rim hơnih ƀô̆ đô̆i, hơnih bơ̆ jang jei vei lăng năng tông, jei đei mơ̆h, đei phe sa, vih hơlơ̆k sơđơ̆ng dơ̆ng, hnam ou to jei ming man kơ jăp ‘lơ̆ng.”

Hòa Thịnh ‘noh jĭ tơring răm kơtang hloh lơ̆m ‘măng ‘mi kial hơbŭt hơbông khei 11/2025. Lơ̆m jơ ‘năr mơmat tat, đak lip lơ̆p hnam, puăn pang ngăl đak glơch glach, rim khul ƀô̆ đô̆i hlôi ƀôh kang bang kơ̆l tơtom atŭm hăm kơdră đảng, kơdră chĕp pơgơ̆r tơring vang yak hơdoi hăm kon pơlei đơ̆ng tơgŭm dŏng, hơmet pơ ‘lơ̆ng đơ̆ng ‘mi kial pơrăm truh tơ iung pơjing ming man hnam, hơmet ming tơdrong hơrih sa ăn kon pơlei đơ̆ng rŏng ‘mi kial pơrăm. Đơ̆ng rŏng “ ‘Măng iung jang Quang Trung" jơnei keh kong tơ̆ tơring Hòa Thịnh, um rup Ƀô̆ đô̆i Ƀok Hô gei kơjăp lơ̆m jơhngơ̆m đon kon pơlei hăm jơhngơ̆m đon ‘mêm kơ eng kơtang hloh dơ̆ng. Đại tá Đinh Văn Hưng, Chính ủy Hơnih tơm Ƀô̆ đô̆i dêh char Dak Lăk pơma hơdăh, Tơdrong pơgơ̆r “ Puih mak khu 5 tơgoăt tơgoăl-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei” ‘măng mă ou mĭnh ‘măng dơ̆ng sơkơ̆t hơdăh jơhngơ̆m đon ‘mêm kơ eng dih băl ƀô̆ đô̆i hăm kon pơlei sa roi kơjăp iăp kơtang hloh dơ̆ng: “ ‘Moi kiơ̆ tơdrong pơgơ̆r năr ou bơ̆n hơnơ̆ng sơkơ̆t hơdăh mĭnh tơdrong tôch gĭt kăl tơ iung pơjing đĭ đăng kon pơlei vang vei lăng teh đak, sơđơ̆ng tơring ưh khan lăp khul jang mă blŭng ‘noh hăm tơdrong tơgoăt tơgoăl kơjăp jơhngơ̆m đon ƀar păh ƀô̆ đô̆i hăm kon pơlei. Mưh kon pơlei sơđơ̆ng jơhngơ̆m, mưh kon pơlei lui yom ‘mêm kơ eng kơtang ‘noh jing hơyak pran kơjăp iăp kơtang hloh ăn sơđơ̆ng atok tơ iung kơjăp ‘lơ̆ng kơ hơdrĕch hơdrung.”

Kiơ̆ đơ̆ng ƀok Phương Văn Lành, Bí thư Đảng ủy tơring Hòa Thịnh, đơ̆ng lơ̆m ‘mi kial hơbŭt hơbông pơrăm truh dôm năr mơdŭk mơdăk hơmet ming kơ tơdrong jang “ ‘Măng iung jang Quang Trung", dĭng truh dang ei, Hòa Thịnh oei sơng iŏk đei lơ tơdrong tơgŭm djru pơđĭ găh mŭk drăm hăm jơhngơ̆m đon đơ̆ng Đảng păng Teh đak, rim khul jang chinh trĭ, tơpôl, rim khul ƀô̆ đô̆i kŏng ang, rim khul jang ‘mêm mơnat păng tĕnh koăng hơmet ming pơ ‘lơ̆ng đơ̆ng ‘mi kial hơbŭt hơbông pơrăm. Tơdrong pơgơ̆r Puih mak khu 5 tơgoăt tơgoăl ou, mĭnh ‘măng dơ̆ng pơjing đei jơhngơ̆m pran ăn kơdră tơring lơ̆m jang kiơ̆ jơnei rim tơdrong jang sơnăm 2026. "Atŭm hăm rim khul Đảng, kơdră tơring, rim khul ƀô̆ đô̆i kŏng ang ‘noh hlôi akŏm vei lăng năng tông ăn kon pơlei. Mă kăl năr ou Quân khu 5 hơnhăk Puih mak Khu 5 tơgoăt tơgoăl-Têt ƀĕnh ƀang jơhngơ̆m đon ‘mêm kơ eng dih băl ƀô̆ đô̆i kon pơlei truh hăm kon pơlei, vang atŭm hăm kon pơlei hơmet pơ ‘lơ̆ng dôm tơdrong tơnap tap, hơnhăk ăn kon pơlei đei jơhngơ̆m đon chơt hơ iă ‘nă hal đei sa Têt phĭ tơtŏ dơnŏ ‘lơ̆ng, hiôt chơt, hơnŭk hơnoa."

Rim kon pơlei Hòa Thịnh hưch hanh hơmanh bơnê hăm tơdrong joăt joe nuih mơng pran kơtang kĕch mang, pơjing đei ‘măng iung tơjră Hòa Thịnh dôm sơnăm 60, dang ei nuih mơng yak hloh mơmat tat kơ yuơ ‘mi kial pơrăm. Têt ou kon pơlei tơring ‘mi kial pởtăm đei dơ̆ng jơhngơ̆m đon ‘mêm kơ eng dih băl kơjăp đơ̆ng tơdrong vang lăng ba kơ pơđĭ kobn pơlei pơla. Tơdrong hơrih sa ‘nao tŏk bŏk ƀôh kang bang kơ̆l lơ̆m rim ŭnh hnam. Mĭnh pơyan puih mak ‘nao tŏk bŏk brŏk truh hăm pơlei pơla iung tơjră kơtang sơ̆ ki Hòa Thịnh.