Tơ̆ kơsơ̆, mưh kon pơlei brŏk đơ̆ng jang, rim bơngai jang lơ̆m Khul vei lăng ƀuôn Ea Bông, phương Buôn Ma Thuột ‘noh klăh asong dih băl năm truh rim hnam chă pơroi tơbăt găh năr pôk rơih năr 15/3 kơnh. Dôm tơdrong tơbăt ưh khan lăp tơroi tơbăt găh jơ ‘năr, hơnih tăh hla mă oei tơblang hơdăh găh hơnăp jang, sơnong jang đơ̆ng bơngai tăh hla, găh dôm bơngai đei hơnăn ăn pôk tơmơ̆t păng dôm tơdrong kăl kơ Khôi luơ̆t pôk rơih. Yă H Chuyên Ênuôl, Thôn trơng ƀuôn Ea Bông tơbăt, trong jang ou trŏ lăp hăm tơdrong oei sa kơ kon pơlei lơ̆m pơlei.“Kơ yuơ kon pơlei tơ̆ ou găh lơ ‘noh choh jang sa, bơ̆n năm pơrô̆ pơrôp ‘noh lơ̆m kơsơ̆, mĭnh khul bơ̆n năm dang 5 dăh mă 10 ŭnh hnam”.

Atŭm hăm pơrô̆ tơbăt kơtă, tơdrong tơroi tơbăt kơtơ̆ng ang ‘noh oei đei iung jang kiơ̆ rim ‘măng pơgơ̆r hop akŏm kon pơlei păng ‘moi kiơ̆ rim khul jang lơ̆m pơlei. Vă sơđơ̆ng ăn rim bơngai jei băt hlôh ƀôh hơdăh tơdrong, trong pơma sa jei hơmet ming mă trŏ lăp. Ƀok Y Sil Ênuôl, bơngai đei kon pơlei lui yom lơ̆m ƀuôn Ea Bông tơbăt, tơdrong pơrô̆ tơbăt đei chă pơma dơnuh hăm ƀar nơr ‘noh nơ̆r Yuăn păng nơ̆r Êđê vă trŏ lăp hăm rim bơngai.“Pơrô̆ tơbăt ăn kon pơlei hăm ƀar nơ̆r Yoăn păng nơ̆r kon kông kơdih bơ̆n. Kơ yuơ tơdăh chă pơma tơbăt hăm nơ̆r Yuăn ngăl lei kon pơlei ưh kơ gan hlôh, mưh pơma hăm nơ̆r kon kông kơdih bơ̆n ‘noh kon pơlei hlôh păng băt hơdăh tơdrong hơpơi ‘meh vă vă rơih iŏk đei dôm bơngai tơgăl hloh”.

Jĭ bơngai kon khop tơ̆ phương Ea Kao, yă H Pliêr Niê Kđăm tơbăt, tơdrong kơtơ̆ng ang găh pôk rơih jei đei tơroi tơbăt lơ̆m rim ‘măng năm hơkŭm păng jơ tơƀơ̆p pơma dơnuh hăm bơngai tăh hla tơ̆ tơring pơlei.“Jei đei ‘măng tơroi tơbăt, tơƀơ̆p pơma dơnuh hăm bơngai tăh hla lơ̆m rim pơlei pơla. Lơ̆m hnam khop ‘noh ƀok soi jei chă pơtho pơkă ăn ‘noh jĭ bơngai kon khop ‘noh truh năr ‘noh kăl năm tăh hla mă tôm”.

Ƀok soi Nguyễn Minh Hảo, Ƀok chĕp pơgơ̆r Tơring khop Mẫu Tâm, giáo phận Buôn Mê Thuột akhan, rim kon khop adoi jĭ mĭnh ‘nu kon pơlei păng tơdrong vang năm tăh hla ‘noh jang kiơ̆ hơnăp jang hăm teh đak.“Rim kon khop ‘noh jĭ kon pơlei păng kơ yuơ lơ loh kơna jơhngơ̆m đon kon pơlei tôch chơt hơ iă mưh đei pơgơ̆r pôk rơih ‘nao. Ba tôch hưch hanh iung jang hơnăp jang kơ mĭnh ‘nu kon pơlei. Hơnăp jang ‘noh kăl iung jang mă ‘lơ̆ng, ‘noh jing mĭnh tơdrong pơtho khan kơ Khul khop.”

Tơ̆ tơring sơlam teh đak, kơ yuơ tơring să, kon pơlei oei răh rap, bơ̆ jang pơrô̆ tơbăt đei tơlĕch jang hơbĕch hơbal hloh. Kiơ̆ đơ̆ng mŏ Lang Thị Son, Kơdră chĕp pơgơ̆r Hơnih bơ̆ jang Mặt trận Tổ quốc Việt Nam tơring Ia Lốp, kang ƀô̆ Măt trân iung jang hơdoi hăm thôn trơng, bơngai đei kon pơlei lui yom rim koeng ƀôt, ba ăn hla bơar pơtho tơbăt ăn kon pơlei lăng hơlen hơnăn bơngai tăh hla hlôi đei pơklep tơbăt tơ̆ hơnih tăh hla.“Tơring Ia Lốp ‘noh tơring să, kon pơlei kơtoei kơna ưh khan lăp pơrô̆ tơbăt tơ̆ rim ‘măng hop akom dăh mă lơ̆m aloa tơring, mă oei ba ăn hloi hla bơar truh hăm ŭnh hnam kon pơlei. Truh dang ei kon pơlei hlôi băt hơdăh dôm tơdrong găh bơ̆ jang pôk rơih truh ou kơnh”.

Năr 15/3 kơnh, bơngai tăh hla lơ̆m teh đak gô vang năm pôk rơ̆ih Kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei rim kâp, jăl jang 2026-2031. Tơdrong pơtruh ăn kơtơ̆ng ang pôk rơih truh hăm rim pơlei pơla, tơring khop tơ̆ Dak Lăk tơgop sơđơ̆ng rim bơngai tăh hla băt hơdăh dôm tơdrong tơchơ̆t kơ khôi luơ̆t găh pôk rơih. Đơ̆ng noh, pơm kiơ̆ tôm tong hơnăp jang păng sơnong jang kơ kon pơlei lơ̆m tơdrong pơgơ̆r gĭt kăl hloh kơ teh đak.