Pôk rơih-năr lêh kơ jơhngơ̆m đon kon pơlei, jĭ ‘long pơtŏ trŏ lăp kơ hơtŏ hơnơ̆ng, jĭ hơyak ăn tơ iung pơjing mĭnh Teh đak pháp quyền pran kơjăp iăp kơtang, mĭnh tơpôl hơtŏ hơnơ̆ng, gơh hơgei. ‘Nou jĭ jơ ‘năr tơdrong pơm tơm kơ dih kơ kon pơlei đei tơƀôh hơdăh hloh, đei sơkơ̆t hơdăh hăm iung jang hloi lơ̆m rim kơphĭu. Giáo sư, tiến sỹ Nguyễn Minh Đoan, ƀok thây pơtho tơm dơnơm hnam trương Đăi hŏk Luơ̆t Hà Nội sơkơ̆t hơdăh: ‘Moi kiơ̆ pôk rơih, Kon pơlei vang iung jang hloi lơ̆m tơchơ̆t hơdăh dôm tơdrong kăl kơ teh đak păng tơring; vang iung jang ưh kơ tă lơ̆m vei lăng teh đak păng tơpôl ‘moi kiơ̆ rim hơnih bơ̆ jang tơm dơnơm kơ yuơ bơ̆n pôk rơih:“ ‘Nou jĭ kon pơlei tơƀôh hơdăh tơdrong gơh jang kơ bơ̆n ‘moi kiơ̆ rơih dôm bơngai hơgei, đei jơhngơ̆m đon ‘lơ̆ng mă bơ̆n ngăl krao akhan dôm bơngai gơh hơgei trŏ lăp hloh kơ rim răih kon pơlei vă vang iung jang lơ̆m rim hơnih bơ̆ jang tơm dơnơm, hơnih jang tang măt kơ kon pơlei. Păng mưh hăp đei ƀơm ‘lơ̆ng hơ iă ưh khan lăp kơ teh đak mă lei kơ rim bơngai kon pơlei ‘noh lơ̆m mă noh kon pơlei mă ƀôh hơdăh tơdrong năm tăh hla nhen lĕ năr lêh mă lei jei ƀôh hơdăh tơdrong pôk rơih ‘noh trŏ lăp hloh”.

‘Măng pôk rơih kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei jăl jang 2026–2031 đei pơgơ̆r lơ̆m khei ‘năr teh đak bơ̆n yak mơ̆t lơ̆m jăl atŏk tơ iung gĭt kăl. Tam lăh đei Việt Nam dơ̆ng tơ̆ hơnăp tơdrong rơvơn gĭt kăl hloh nhen hrei ou: hơnih dơ̆ng păng tơdrong lui yom apŭng plĕnh teh đei tŏk kơtang; tơdrong hơpơi ‘meh vă atŏk tơ iung pơdrŏng pran kơtang, hơnŭk hơnoa hlôi jing jơhngơ̆m pran kơtang hloh; khoa hŏk-kmăi kmŏk, tơplih kơsô̆, mŭk drăm rơgoh, mŭk drăm kơsô̆ pơih đei trong atŏk tơ iung ‘nao, tơplih ‘nao chĕp pơgơ̆r teh đak đei ƀôh hơdăh.

Lơ̆m khei ‘năr ‘noh, ‘măng pôk rơih ưh khan lăp tơdrong kăl ăn jăl jang 5 sơnăm mă oei tơdrong rơih ăn trong jang kơ teh đak, pơjing đei tơdrong ‘lơ̆ng gơh hơgei kơ trong chĕp pơgơ̆r teh đak, pơjing đei iung jang kiơ̆ tơpă dôm tơdrong hơpơi ‘meh vă atŏk tơ iung lơ̆m lơ sơnăm đơ̆ng rŏng. Kiơ̆ đơ̆ng tiến sĩ Nguyễn Viết Chức - Kơ iĕng kơdră so chĕp pơgơ̆r Hơnih bơ̆ jang vei lăng Oei sa joh ayŏ, Pơtho pơhrăm, Hơdruh tơdăm, Hơ ioh păng Hơ ioh iĕ kơ Kuô̆k hô̆i, jơ năr ‘noh pơ koel rim kon pơlei kăl hlôh vao hơdăh hloh lơ lou, tơdrong gei teh đak păng tơdrong atŏk tơ iung kơ teh đak tơklep kơjăp lơ̆m tơdrong rơih iŏk đơ̆ng bơ̆n: “Bơ̆n tŏk bŏk yak mơ̆t lơ̆m chăl sơnăm iung jang kiơ̆ dôm tơdrong hơpơi ‘meh vă kơ hơdrĕch hơdrung, truh sơnăm 2045 đei jing teh đak atŏk tơ iung. Hăp pơjing ăn dôm tơdrong pơkoel iung jang kơtang păng pơkoel đei dôm bơngai tang măt tơpă ‘lơ̆ng, gơh hơgei hloh, tơnăp hloh dơ̆ng lơ̆m bơ̆jang pơvih pơvăn. Păng kon pơlei sa roi hlôh vao hloh dơ̆ng hơnăp jang păng tơdrong đei iŏk yoa kơ bơ̆n mưh năm tăh hla. Kơna năr lêh ou jĭ năr lêh gĭt kăl hloh. Rim bơngai tăh hla iung jang ‘lơ̆ng hơnăp jang bơ̆n vă rơih iŏk păng hlôh vao ‘nou jĭ mĭnh păh tơdrong đei iok yoa, mĭnh păh jĭ hơnăp jang hăm tơdrong atŏk tơ iung kơ teh đak”.

‘Măng pôk rơih kơdră tang măt Kuô̆k hô̆i jăl XVI păng kơdră tang măt Jơnŭm vei lăng kon pơlei jăl jang 2026–2031 sa roi gĭt kăl hloh dơ̆ng mưh đei pơgơ̆r lơ̆m khei ‘năr Hop akom tih kơdră tang măt lơ̆m teh đak ‘măng mă XIV kơ Đảng jơnei ‘lơ̆ng liĕm, sơkơ̆t hơdăh trong lăng, trong tơlĕch ăn atŏk tơ iung teh đak lơ̆m chăl ‘nao păng chă rơih dôm khul bơ̆ jang đei jơhngơ̆m đon chinh trĭ kơjăp iăp kơtang, đei jơhngơ̆m đon oei sa ‘lơ̆ng, trong tơchăr hle păng ‘meh vă plang ăn kơtang. Ƀok Nguyễn Văn Phúc, sơ̆ jang Kơ ieng Kơdră chĕp pơgơ̆r Hơnih bơ̆ jang vei lăng Mŭk drăm kơ Kuôk hô̆i akhan: jơnei kơ Hop akom tih ưh khan lăp pơjing đei trong jang chinh trĭ kơjăp iăp kơtang, mă oei hơmet pơ ‘lơ̆ng jơhngơ̆m đon lui đơ̆ng Kon pơlei lơ̆m tơdrong chĕp pơgơ̆r đŏng Đảng-tơdrong kăl hloh dôm tơdrong iŏk đei jơnei kơ kĕch mang Việt Nam. “Hop akŏm tih ‘măng mă XIV kơ Đảng ‘nao đei jơnei ‘lơ̆ng liĕm hlôi pơih đei mĭnh chăl atŏk tơ iung ‘nao, chăl atŏk tơ iung kơ hơdrĕch hơdrung Việt Nam. Kon pơlei, bơngai tăh hla lui kơjăp lơ̆m tơdrong chĕp pơgơ̆r đơ̆ng Đảng păng lui kơjăp lơ̆m Kuô̆k hô̆i ‘noh jĭ hơnih bơ̆ jang tang măt tơm dơnơm hloh kơ kon pơlei, Hơnih bơ̆ jang tơm dơnơm hloh kơ Teh đak. Bơngai tăh hla gô rơih ƀlep, pôk tơmơ̆t ƀlep dôm bơngai tơgăl vang iung jang kơ Kuô̆k hô̆i vă bơ̆ jang ‘lơ̆ng, jơnei pêng tơdrong bơ̆ jang gĭt kăl hloh kơ Kuô̆k hô̆i, đơ̆ng noh tơgop lơ̆m jang kiơ̆ rim tơdrong jang kơ yuơ Hop akom tih ‘măng mă XIV kơ Đảng tơlĕch ăn”.

Mưh kon pơlei năm tăh hla lơ̆m jơhngơ̆m đon lui yom kơtang hăm trong bơ̆ jang hlôi đei Hop akom tih kơ Đảng tơlĕch ăn, păng mưh khul kơdră chĕp pơgơ̆r teh đak đei tơ iung pơjing kiơ̆ trong ‘noh, ‘noh jĭ jơhngơ̆m pran, pơjing đei hơyak pran kơtang hloh vă teh đak yak mơ̆t lơ̆m chăl atŏk tơ iung ‘nao.