Lăp đơ̆ng rŏng hơgrop hăm Dak Nông păng Bình Thuận, dêh char Lâm Đồng ‘nao đei cham char atŏk tơ iung tôm tong groi kông-tơnă-tơmăn tơter đak dơsĭ, hăm hơgăt teh să hloh 24.000 km², să hloh lơ̆m teh đak. Groi teh ou akŏm đei tôm tong bri ‘long ou to păng groi teh gơh pơjing đei ŭnh hơyuh ‘lơ̆ng rŏk, mŭk drăm bri brăh, mŭk drăm đak dơsĭ păng choh jang sa kmăi kmŏk hơgei. Lơ̆m trong atŏk tơ iung ‘nao, Groi kông Di Linh jĭ hơnih tŏk bŏk git kăl hloh, lang să đơ̆ng trong hông hang krang nak Bảo Lộc truh tơ̆ jơ̆ng kông trong hông hang krang nak Prenn, tơƀưh rim tơring kăl kơ dêh char. Ƀok Bùi Hoàng Phương, Kơ iĕng kơdră chĕp pơgơ̆r Hơnih tơm Khoa hŏk păng Kmăi kmŏk akhan, pơchoh trong atŏk tơ iung ‘nao hlôi iŏk Groi kông Di Linh lơ̆m hơnhăk tŏk kơtang ‘nao, hơnih kăl hloh tơgoăt dih băl:“Groi kông Di Linh oei lơ̆m bro gĭt kăl hloh tơƀưh dih băl Tơring Tây Nguyên hăm Tơring Tơmăn Nam Trung Bộ lăp hơtăih kơ pơlei tơm Hồ Chí Minh dang 200km tơbưh dih băl tôch rơvơn kiơ̆ jăl trong gre rĕnh Dầu Giây- Liên Khương păng atŭm hăm 2 cham gre păr, cham gre păr Liên Khương păng hơnô̆ hơnăp kơnh ‘noh cham gre păr Phan Thiết tơgŭm ăn Di Linh ƀônh yak truh hăm hơnih tơm jang mŭk drăm lơ̆m teh đak. Adoi trong ưh kơ măh hơtăih dang mĭnh ƀar jơ păr Di Linh bơ̆n gơh yak truh hăm dôm hơnih tơm păng tơring mơdro sa tih kơ châu Á”.

Hăm teh groi dang 1.000 mét pơtêng hăm đak dơsĭ, Groi kông Di Linh prăt sơnăm ‘năr rơngơp 22,2 độ C, ‘mi jrăh jrai, teh  bazan jing ‘lơ̆ng. Tơ̆ ou đei mir pơgar chehphe, hla che, ‘long pơmur rong sơdrông pơm brai, ‘long sa plei… hăm jang sa lơ̆m hơgăt teh ‘noh đei iŏk yoa kơjăp gơnơm jang kiơ̆ trong choh jang sa hơgei, tuh mơ̆r. Atum hăm bri kông thoong đak ‘lơ̆ng rŏ, Groi kông Di Linh hlôi jing hơnih tơm lơ̆m chăl sơnăm sơ̆ ki- hơnih bơ̆ jang lơ̆m khei ‘năr pơjing đei dêh char Đồng Nai Thượng păng dêh char Lâm Đồng. Ƀok Nguyễn Anh Dũng, Kơ iĕng kơdră Hơnih jang vei lăng Pơtho pơhrăm Đăi hŏk găh Hơnih tơm vei lăng Hnam trương pơơtho pơhrăm akhan, tơdăh đei pơchoh ăn trŏ lăp, tơ̆ ou rŏ năng gô jing hơnih jang pơlong năng pơtho pơhrăm hăm tơplih ‘nao tơchăr:“Di Linh tŏk bŏk oei lơ trong atŏk tơ iung kiơ̆ sơ̆ ki kơ yuơ lơ loh ‘nou jing hơyak ‘lơ̆ng vă atŏk tơ iung lơ̆m khei năr kơnh. Hăm pơtho pơhrăm jei kăl đei hơyak pran ‘nao, lơ̆m ou teh đak ‘noh pơjing, găh khul mơdro sa ‘noh ưh khan lăp hơdrô̆ jang găh mơdro sa mă lei vang tơgop hloi lơ̆m tơdrong hlôh vao păng tơplih ‘nao tơchăr.”

Sơnăm 2025, tơdrong jang mŭk drăm kơ dêh char Lâm Đồng iŏk đei hloh 300.000 ti hlak jên. Hơmet ming trong jang mŭk drăm hơ iă, roi năr roi tơjur trong choh jang sa sơ̆ ki, atŏk kơtang jang kmăi kmŏk pơm tơlĕch tơmam drăm-tơ iung pơjing păng tĕch mơdro…Mă lei, vă iŏk đei trong tơlĕch ăn tok 2 kơsô̆ lơ̆m sơnăm 2026, dêh char Lâm Đồng sơkơ̆t hơdăh kăl tơplih kơtang jing jang kiơ̆ tŏk mŭk drăm ‘moi kiơ̆ khoa hŏk, kmăi kmŏk, tơplih ‘nao tơchăr, muk drăm rơgoh ‘lơ̆ng păng muk drăm kơsô̆.

Đơ̆ng cham char ‘lơ̆ng rŏ, oei sa ‘lơ̆ng rŏ păng hơpơi ‘meh vă tơplih ‘nao, Groi kông Di Linh tŏk bŏk đei dêh char Lâm Đồng tơchơ̆t vă atŏk tơ iung kơtang hloh dơ̆ng. Ƀok Hồ Văn Mười, Kơdră jang lơ̆m Trung ương Đảng, Kơdră chĕp pơgơ̆r Hơnih vei lăng kon pơlei dêh char Lâm Đồng tơroi găh trong iung jang yak hơdoi kơ tơring vă tơ iung pơjing Groi kông Di Linh jing cham char akŏm adoi rim kơjă kăp gĭt găh choh jang sa, cham char, ŭnh hơyuh păng khoa hŏk kmăi kmŏk lơ̆m hơmet ming atŏk tơ iung kơ dêh char:“Vă pơjing rơvơn ‘lơ̆ng hơ iă hloh ăn rim hơnih mơdro sa năm truh hăm groi kông Di Linh kăl iung jang trong pơprŏ lơ̆m dêh char Lâm Đồng mă trŏ lăp, mă ‘lơ̆ng hơ iă. Ăp lơ loh hơnih mơdro sa mă năm truh. Kơdră chĕp pơgơ̆r dêh char Lâm Đồng ling lang tơnăp păng sơkơ̆t hơdăh hơnih mơdro sa ‘noh mĭnh lơ̆m tơdrong kăl hloh tơchơ̆t hơdăh vă atŏk tơ iung. Nhôn iŏk tơdrong atŏk tơ iung vă sơđơ̆ng, adoi iŏk tơdrong sơđơ̆ng vă atŏk tơ iung”.

Lơ̆m trong atŏk tơ iung jăl ‘nao, dêh char Lâm Đồng tơlĕch ăn trong tơ iung pơjing Groi kông Di Linh đei jing hơnih tơm chă tơchĕng, jang kiơ̆ păng lang să kmăi kmŏk hơgei lơ̆m tơdrong jang choh jang sa kmăi kmŏk hơgei, kmăi kmŏk sinh hŏk, pơm tơlĕch ‘lơ̆ng păng pơjing ŭnh hơyuh. Atŏk tơ iung mŭk drăm yak hơdoi hăm vei lăng cham char, sơđơ̆ng tơdrong hơrih sa păng hơtŏ hơnơ̆ng tơpôl. Đơ̆ng tơdrong cham char hơ iă păng oei sa gơh găt, tơring groi teh ou tŏk bŏk đei hơmŏ yak kơtang, đei jing hơnih tơm tŏk mŭk drăm păng pơm yă ăn trong jang atŏk tơ iung ‘moi kiơ̆ jơhngơ̆m đon hơgei, tơplih ‘nao tơchăr.