‘Nâu jĭ ‘măng hop akŏm mă blŭng đơ̆ng rŏng kơ Anih pơgơ̆r jang đei pơjing, tơƀôh jơhngơ̆m đon jang hăt hot, tơpăt, ‘lơ̆ng, pơ tơm jang hloi lơ̆m hơnăp jang tih kơ Đảng bơ̆n lơ̆m jăl jang ‘nao. Pơtôch jơ bơ̆jang, Tổng Bí thư Tô Lâm tơroi rơđăh tơdrong jang, bơ̆n tŏk bŏk hơmet ăn 1 tơdrong gĭt kăl ‘noh jĭ tơbăt 100 sơnăm teh đak hăm tơdrong chĕp kơ̆l đơ̆ng Đảng Cộng sản Việt Nam păng 40 sơnăm jang kiơ̆ Tơdrong tơchơ̆t pơjing teh đak lơ̆m khei ‘năr jang kiơ̆ chủ nghĩa xã hội. Pơtôch 100 sơnăm jing ‘măng vă bơ̆n lăng dơ̆ng pơđĭ jăl trong Đảng chĕp kơ̆l hơdrĕch hơdrŭng: đơ̆ng iung jang tơ găr iŏk đei rơngei hiôk hian teh đak, truh pơjing păng vei lăng Teh đak xã hội chủ nghĩa; đơ̆ng trong jang tơlĕch jang akŏm truh tơdrong jang Tơplih ‘nao tôm tong; đơ̆ng 1 teh đak dơnuh hin, ưh kơ hlôh kơvao jing 1 teh đak đei anih dơ̆ng roi ‘năr roi kơ jung lơ̆m apŭng plĕnh teh.

‘Nâu jing tơdrong hiôk vă pơm rơđăh hloh tơdrong jang hơtŏk tơiung, dôm jơnei iŏk đei, dôm tơdrong tam mă ‘lơ̆ng, tơdrong tơm pơm ăn păng ƀai hŏk hlôh vao. Gĭt kăl hloh ‘noh jĭ hơmet ăn lĭ luơ̆n păng yan âu ăn dôm tơdrong jang gĭt kăl lơ̆m jăl jang hơtŏk tơiung ‘nao, yak truh sơnăm 2045 păng hơtăih hloh dơ̆ng ‘noh jĭ trong vă jang chĕp kơ̆l hơtŏk tơiung teh đak truh sơnăm 2130.