Đơ̆ng mĭnh teh đak răt iŏk đơ̆ng teh đak đe, Việt Nam tơplih kơdih jing teh đak tĕch mơdro tơ̆ teh đak đe; sơnăm 2025 jing sơnăm mă 10 tĕch mơdro tơ̆ teh đak đe lơ (jô̆ đơ̆ng sơnăm 2016). Kơsô̆ teh đak tĕch mơdro tơ̆ teh đak đe iŏk đei hloh 1 ti USD jei tŏk tĕnh koăng, đơ̆ng 27 teh đak lơ̆m sơnăm 2013 tŏk truh 36 teh đak lơ̆m sơnăm 2025. Sơnăm 2026 jĭ sơnăm tôch gĭt kăl, sơnăm blŭng a tơlĕch jang kiơ̆ Trong pơprŏ atŏk tơ iung muk drăm-tơpôl 5 sơnăm 2026 - 2030, tơdrong jang tĕch mơdro tơ̆ teh đak đe kăl hơnơ̆ng iung jang ‘lơ̆ng hơnăp jang ‘noh hơyak kăl hloh, adoi tơplih kơtang đơ̆ng tŏk kiơ̆ să jing tŏk kiơ̆ ‘lơ̆ng, jơnei păng kơjăp, tơklep hăm pơm hơtŏk kơjă, tơmam drăm kmăi kmŏk păng gơh pơm tơ-‘ngla kơ tơdrong jang mŭk drăm. Ƀok Trần Thanh Hải - Kơ iĕng Kơdră Hơnih tơm vei lăng Tĕch mơdro tơ̆ teh đak đe găh Hơnih tơm vei lăng Mơdro sa akhan, ‘ngoăih tơdrong tơlĕch jang jơnei tơ̆ rim teh đak joăt joe, Việt Nam kăl hơnơ̆ng pơjing đei lơ teh đak tĕch mơdro, pơm tơjur gơnang lơ lơ̆m mĭnh ƀar teh đak joăt joe sơ̆ ki.“Pơjing lơ teh đak tĕch răt dih băl, ‘nou jei jing trong jang vă kơ bơ̆n dă ƀiơ̆ hiong răm mưh gơnang kơtang lơ̆m dôm teh đak mă bơ̆n joăt tĕch mơdro dăh mă teh đak mă bơ̆n răt tơmơ̆t. Mưh đei teh đak tĕch mơdro dih băl ‘noh trong jang truh ou kơnh ‘noh bơ̆ jang pơtrŭt tĕch răt  ... Tơplih ‘nao bơ̆ jang găh pơtrŭt tĕch mơdro, lơ̆m ou đei tơdrong tơ iung pơjing hơnăn păng iŏk yoa trong jang nhen tơchă băt tơm a la chă ‘noh dôm trong tơgŭm ăn bơ̆ jang pơtrŭt mơdro sa kơ bơ̆n gô iŏk đei jơnei ‘lơ̆ng hơ iă hloh ...”.

Lơ̆m khei năr tơdrong jang mŭk drăm apŭng plĕnh teh oei lơ tơdrong ou to păng mơdro sa lơ̆m plei teh yak mơ̆t lơ̆m jăl hơmet ming, tĕch răt hăm teh đak đe vei kơjăp hơnăp jang kăl hăm tŏk mŭk drăm kơ Việt Nam, mă lei tơdrong tơlĕch ăn hlôi pha kơ hơdrol. TS. Cấn Văn Lực - Bơngai joăt jang Mŭk drăm BIDV, Kơdră jang lơ̆m Jơnum pơchoh trong tơdrong jang kơ Thủ tướng Teh đak akhan, pơtrŭt tĕch mơdro tơ̆ teh đak đe lơ̆m jăl truh ou kơnh ưh khan lăp pơdơ̆h ƀơ̆t trong tơlĕch ăn tŏk iŏk đei tĕch mơdro tơ̆ teh đak đe, mă kăl tơplih kơtang lơ̆m pơm hơtŏk ‘lơ̆ng găh tŏk mŭk drăm; kăl iung jang hơdoi ƀar păh trong jang tơgŭm djru mơdro sa, pơtrŭt tĕch mơdro tơ̆ teh đak đe, atŏk tơ iung logistics, kon jên hu tơgŭm djru păng mă kăl ‘noh pơm hơtŏk ‘lơ̆ng trong tơchơ̆t păng tơdrong pơgơ̆r jang kiơ̆. “Bơ̆n kăl tŏk kơtang tơdrong đei kơ dih, dang ei kăl jang kơdih dôm trong tơlĕch jang, ‘noh jĭ kăl tơdrong kăl, jang kiơ̆ đunh đai. Bơ̆n kăl tơgĕch jang ‘lơ̆ng hloh dơ̆ng rim FTA, atŏk kơtang tĕch mơdro tơ̆ teh đak đe, pơm hơtŏk iŏk đei jơnei pơtrŭt mơdro sa, hơnăn tơmam drăm teh đak ...”.

Yak mơ̆t lơ̆m jăl ‘nao, tĕch mơdro tơ̆ teh đak đe hơnơ̆ng jing hơyak pran kơtang, mă lei kăl pơjing đei trong atŏk tơ iung ‘lơ̆ng hơ iă păng trŏ lăp hăm khei ‘năr ‘nao. Kiơ̆ Tơdrong tơchơ̆t kơsô̆ 01/NQ-CP năr 8/1/2026 kơ Khul kơdră chĕp pơgơ̆r Teh đak, trong tơlĕch ăn tŏk akŏp iŏk đei tĕch mơdro tơ̆ teh đak đe sơnăm 2026 iŏk đei dang 15 - 16% pơtêng hăm sơnăm 2025, hơtŏ hăm iŏk đei 546 - 550 ti USD. Vă jang iŏk đei trong tơlĕch jang ou, iŏk đei tĕch mơdro tơ̆ teh đak đe jô̆ hơtŏ rim khei kăl đei đơ̆ng 45 - 46 ti USD - mĭnh trong tơlĕch ăn đei lăng jĭ ƀĕnh ƀang tơdrong long, pơkoel iung jang hrơ̆p mĭnh ‘măng, atŏk kơtang hlŏh dơ̆ng đơ̆ng rim hơnih tơm, tơring păng tơpôl hơnih mơdro sa đơ̆ng dôm khei blŭng sơnăm. Kiơ̆ đơ̆ng khul joăt jang, lăng truh pơkăp tŏk ‘nao, pơkoel tơdrong tơplih ‘nao trong tơchăr truh iung jang. Mưh pơjing đei lơ̆m tơdrong ‘lơ̆ng hơ iă păng kmăi kmŏk kơsô̆, tĕch mơdro tơ̆ teh đak đe kơ Việt Nam gô tŏk tĕnh koăng păng kơjăp ‘lơ̆ng hloh dơ̆ng.