Tơring groi kông A Vương ‘noh 1 lơ̆m 3 hơnih pơgơ̆r jang chă khăm, ƀơk pơgang ăn kon pơlei dơnuh. Đunh kơ ou dôm khei, tơring groi kông ou hlôi răm ‘mi kial đak hơbông pơvang kơtang, tơdrong hơrih ƀĕnh ƀang tơdrong mơmat tat. Đơ̆ng til pơgê, kơhrĕng ‘nu kon pơlei Kơ Tu hlôi năm truh tơ̆ Hơnih bơ̆ jang vei lăng kon pơlei vă sơng iŏk tơmam drăm păng khăm jĭ, sơng iŏk pơgang. Dôm đe ƀok, yă, đe hơ ioh, đe drŏ kăn đei rim ƀok thây pơgang tơ̆ pơlei tơm Đà Nẵng phăl hơlăng chă khăm jĭ nhen: huyêt ap, tơdrong jĭ jăn lơ̆m hơkou, jĭ măt ... Kon pơlei đei tơroi tơbăt, ƀơk ăn pơgang vă hơmet jĭ jăn, tang găn jĭ jăn păng pơm hơtŏk jơhngơ̆m pran jăng grăng akou. Mŏ A Lăng Thị Hiềm, oei lơ̆m pơlei Ta Lang, tơring A Vương măh chhur jơhngơ̆m:“Nhôn tôch bơnê kơ khul hlôi năm pôk ăn tơmam drăm ăn rim kon pơlei tơ̆ ou. Đei khul chă khăm jĭ jăn, kon pơlei tơ̆ ou tôch chhôk hơ iă, ‘nă hal vă sơng đei Têt phĭ tơtŏ dơnŏ ‘lơ̆ng”.

        Vng iung jang lơ̆m tơdrong jang ou đei hloh 100 ‘nu ƀok thây pơgang ‘noh Kơdră chĕp pơgơ̆r, Kơ iĕng Kơdră chĕp pơgơ̆r rim Hnam pơgang tơm tơ̆ Đà Nẵng, Kơdră chĕp pơgơ̆r, Kơ iĕng Kơdră chĕp pơgơ̆r rim khoa găh Hnam pơgang Đà Nẵng, Hnam pơgang Ung bướu Đà Nẵng, Hnam pơgang Phụ Sản Nhi, Hnam pơgang Măt Đà Nẵng, Hnam pơgang hơmet jĭ Tơsoh, Hnam pơgang Quân Y 17, Hnam pơgang C, Khul Ƀok thây pơgang sơnăm mơlôh pơlei tơm Đà Nẵng păng mĭnh ƀar hnam pơgang tơring.

Vang iung jang tơdrong ou, rim Hnam pơgang tơ̆ Đà Nẵng hlôi ăn rim ƀok thây pơgang hơgei hơnhăk ba lơ kmăi kmŏk, tơmam drăm jang pơgang nhen kmăi siêu âm, điện tim, kmăi phĭn X.Quang lưu động... Mă kăl, Hơnih tơm chĕp pơgơ̆r Quân khu 5 păng rim hnam pơgang vang iung jang tơdrong jang ou hlôi tơgŭm djru ăn hloh 1.000 kơ loăi pơgang, 300 loeng noet vă ƀơk ăn kon pơlei năm khăm. Ƀak si Phạm Minh Huy, Kơ iĕng Khoa ngoại Chấn thương Chỉnh hình Hnam pơgang tơm Đà Nẵng tôch hơ iă mưh đei vang jang tơdrong jang gĭt kăl ou:“VOV miền Trung hăm Khul ƀok thây pơgang sơnăm Mơlôh pơlei tơm Đà Nẵng vang iung jang hơdoi hăm rim hnam pơgang lơ̆m pơlei tơm Pơgơ̆r tơdrong jang “Pôk tơmam drăm Têt Bính Ngọ 2026-Tơgoăt kơjăp Đà Nẵng, lang să jơhngơ̆m đon ‘mêm kơ eng dih băl” jĭ tôch git kăl. Nhôn gô hơnơ̆ng yak hơdoi hăm tơdrong jang vă đei lang să hlŏh dơ̆ng đơ̆ng rŏng ou kơnh”.

Tơ̆ ‘măng Pơgơ̆r, Khul kơdră chĕp pơgơ̆r hlôi pôk ăn 1.300 tơnô̆ tơmam drăm, mĭnh tơnô̆ 600.000 hlak jên pôk ăn kon pơlei tơnap tap oei tơ̆ rim tơring sơlam teh đak Hùng Sơn, A Vương, kŏng nhân hơrih sa tơnap tap tŏk bŏk jang tơ̆ rim Hơnih jang Kmăi kmŏk hơgei păng rim Hơnih jang Kmăi kmŏk pơm tơlĕch tơmam drăm Đà Nẵng.Lăp lơ̆m mĭnh năr, hlôi pơgơ̆r chă khăm, ƀơk pơgang ăn 600 ‘nu kon pơlei dơnuh tơ̆ tơring A Vương; 500 ‘nu kŏng nhân hơnih sa tơnap tap jang lơ̆m Hơnih jang kmăi kmŏk hơgei păng rim Hơnih jang Kmăi kmŏk pơm tơlĕch tơmam drăm Đà Nẵng; Khăm hơlen jĭ jăn ăn 500 ‘nu hơ ioh iĕ, hơ ioh hŏk jăl kơđeh tơ̆ hnam trương jăl kơđeh Ba Lế, tơring A Vương, pơlei tơm Đà Nẵng. Akŏp kon jên tơmam drăm pôk ăn lơm ‘măng năm jang ou dang 1 ti 500 triu hlak jên.