- ‘Nhŏng Y Khăm Ta Niê ăi, hăm hơnăp jang jĭ bơngai Ƀĭ thư Chi ƀô̆ kơ ƀuôn tơring kon kông ‘noh tơdrong yă kiơ kăl hloh tơgŭm ăn kơ ‘nhŏng đei jơhngơ̆m đon chinh tri kơjăp păng pơjing đei tơdrong kon pơlei lui yom, pơm jŭk yŭk trong hơlou vă akŏm, tơgoăt tơgoăl kơjăp đang viên păng kon pơlei lơ̆m pơlei bơ̆n?

Ƀĭ thư Chi ƀô̆ Y Khăm Ta Niê: Hăm ĭnh, tơdrong kăl hloh vă vei kơjăp jơhngơ̆m đon chinh trĭ păng pơjing đei tơdrong lui yom lơ̆m kon pơlei ‘noh jơhngơ̆m đon lui đơ̆ng kon pơlei. Jơhngơ̆m đon lui ‘noh ưh khan kơ dih hăp đei mă lei hăp đei đơ̆ng nơ̆r pơma tơ-‘ngla iung jang hloi, ling lang pơm jŭk yŭk trong hơlou lơ̆m hop akŏm, jang sa, pơm kiơ̆ kơjăp trong bơ̆ jang đơ̆ng Đảng, khôi luơ̆t Teh đak păng tơdrong joăt ‘lơ̆ng rŏ kơ pơlei pơla. Jĭ Ƀĭ thư Chi ƀô̆ tơring kon kông, ba sơkơ̆t hơdăh tơjê̆ kon pơlei, hlôh vao kon pơlei, pơma kon pơlei hlôh păng jang vă kon pơlei lui. Mưh kang ƀô̆, đang viên tơpă oei sa ‘lơ̆ng rŏ hăm kon pơlei, tơgŭm djru dih băl dôm tơdrong mơmat tat ou to, lăng tông nông gia ăn kon pơlei ‘noh tơdrong lui yom gô đei jing. Đơ̆ng noh mă akŏm đei đang viên păng kon pơlei tơgoăt tơgoăl pôm nơ̆r ƀơ̆r đon kơjăp tơ iung pơjing pơlei pơla roi năr roi atŏk tơ iung, pơdrŏng ‘lơ̆ng liĕm.

- Đơ̆ng tơdrong chĕp pơgơ̆r Chi ƀô̆ ƀuôn A1 jang keh đang ‘lơ̆ng hơnơ̆ng lơ̆m lơ sơnăm, kiơ̆ kơ ih trong jang jơnei hloh lơ̆m tơplih ‘nao pơm hơtŏk hop akŏm Chi ƀô̆, vă Tơdrong tơchơ̆t đơ̆ng Đảng tơpă đei mơ̆t lơ̆m tơdrong hơrih?

Ƀĭ thư Chi ƀô̆ Y Khăm Ta Niê:  Đơ̆ng bơ̆ jang chep pơgơ̆r Chi ƀô̆ ƀuôn A1, kiơ̆ kơ ĭnh trong bơ̆ jang jơnei hloh vă tơplih ‘nao pơm hơtŏk hop akom Chi ƀô̆ kiơ̆ Nơ̆r athei jang kiơ̆ 50 đơ̆ng Trung ương ‘noh hop akŏm Chi ƀô̆ pơma dơnuh dôm tơdrong đei ƀôh yan ou kơ pơlei. Chi ƀô̆ ưh pơma dơnuh dôm tơdrong ou to mă lei akŏm lơ̆m dôm tơdrong hơdăh hloi nhen tơjur dơnuh, tơ iung pơjing ming man hnam oei, vei kơjăp sơđơ̆ng, vei răk tơƀăk mong tơdrong oei sa joăt joe ‘lơ̆ng rŏ sơ̆ ki, atŏk tơ iung jang sa. Tơdrong tơchơ̆t mă hơdăh găh tơdrong jang, bơngai jang, jơ ‘năr jang, jang keh đang lơ liơ, hop akŏm kăl hơlen hơdăh păng pơma tơpăt dih băl lơ̆m pơgơ̆r hop akom. Pơtrŭt đảng viên pơma dơnuh mă rơhao, pơma tơpăt. Pơgơ̆r hop akom chi ƀô̆ atŭm hăm pơrô̆ pơrôp, pơtho tơbăt trŏ lăp hăm kon pơlei kon kông vă Tơdrong tơchơ̆t tơpă đei mơ̆t lơ̆m tơdrong hơrih.

- Rim trong jang Khul tôn chĭng chêng dăh mă khul jang hơdoi rong rơmo pơlei păng rim trong jang sa anai đei ƀơm lơ liơ hăm tơdrong tơplih jơhngơ̆m đon tơchĕng, trong jang sa kơ kon pơlei. Păng hơnăp jang kơ Chi ƀô̆ lơ̆m hơgrop tơ iung pơjing Đảng hăm atok tơ iung mŭk drăm tơpôl păng tơring hlôi iung jang lơ liơ hŏ ‘nhŏng?

Ƀĭ thư Chi ƀô̆ Y Khăm Ta Niê: Rim trong jang nhen Khul tôn chĭng chêng, khul jang hơdoi rong rơmo hlôi pơjing đei trong tơplih kơtang lơ̆m jơhngơ̆m đon kon pơlei. Đơ̆ng tơdrong gô chang gơnang yoa hlôi tơ plih tơgoăt dih băl, jang hơdoi, đei iŏk yoa sa hơpăh hơdoi dih băl. ‘Moi kiơ̆ khul tôn chĭng chêng, kon pơlei mă ƀôh hơdăh tơdrong kăp gĭt kơ tơdrong oei sa joăt joe sơ̆ ki ưh khan lăp vă vei răk tơƀăk mong tơdrong joăt joe mă oei pơjing đei tơdrong oei sa sơđơ̆ng, tơƀôh tơbăt pơlei pơla bơ̆n dơ̆ng. Khul jang hơdoi rong rơmo tơgŭm ăn kon pơlei tơplih ‘nao trong jang sa đơ̆ng kơdih kơdih jing jang sa hơdoi, băt chă hơlen pơkom mong răk, hơdrin yak hloh dơnuh hin. Hơnăp jang kơ Chi ƀô̆ ƀôh hơdăh lơ̆m pơchoh trong, chông ba, dơ̆ng pang tang măt ăn rim tơdrong jang, pơjao ăn đang viên vei lăng vang jang hloi. Đơ̆ng noh hơgrop tơ iung pơjing Đảng hăm atŏk tơ iung mŭk drăm tơpôl, hơmet pơ ‘lơ̆ng jơhngơm đon lui yom kơ kon pơlei lơ̆m tơdrong chĕp pơgơ̆r đơ̆ng Đảng tơ̆ tơring.

- Đei pôk pơ ư ƀlep lơ̆m jơ ‘năr tơbăt 96 sơnăm Năr pơjing Đảng, ih ‘meh pơtruh nơ̆r ƀơ̆r pơma lơ liơ hăm jơhnơr mơlôh, đảng viên sơnăm mơlôh tơ̆ tơring kông, tơ̆ rim tơring sơlam teh đak?

Ƀĭ thư Chi ƀô̆ Y Khăm Ta Niê: Đei pôk pơ ư ƀlep lơ̆m jơ ‘năr tơbăt 96 sơnăm Năr pơjing Đảng jĭ tơdrong pŭn tih tên adoi jei jing hơnăp jang kơtang. Ba hơvơh hơvơi hơpơi jơhnơr mơlôh, đảng viên sơnăm mơlôh oei tơ̆ tơring sơlam teh đak, tơring kon kông lơ lou dăh vei kơjăp jơhngơ̆m đon hơpơi ‘meh vă oei sa gơh găt, ‘meh vă atŏk tơ iung đơ̆ng kơtă pơlei pơla kơdih. ‘Nĕ tơchĕng tơring tơnap tap ‘noh ưh kơ kĕ kơtŏk mă lei lăng ‘noh jing trong ăn kơ bơ̆n hơdrin kơrŭn đĭ ai, plang ăn lơ, kĕ iung. Jơhnơr mơlôh, đảng viên sơnăm mơlôh kăl, pơ̆n tơchĕng, pơ̆n iung jang, pơ̆n chiu pŭ, hơdrin hŏk pơhrăm, vei kơjăp tơdrong oei sa joăt joe sơ̆ ki kơ hơdrĕch hơdrung, yŭk trong hơlou lơ̆m atŏk tơ iung muk drăm, vei lăng sơđơ̆ng tơring sơlam teh đak, tơ iung pơjing pơlei pơla roi năr roi pơdrŏng ‘lơ̆ng liĕm, gơh hơgei. ‘Nou jing tơdrong kăl hloh vă tơgăl hăm tơdrong joăt joe nuih mơng gơh hơgei kơ Đảng.

- Ŏ ah, bơnê kơ ‘nhŏng Y Khăm Ta Niê, Ƀĭ thư Chi ƀô̆ ƀuôn A1, tơring Ea Sŭp, dêh char Dak Lăk.