Bơ̆ jang hăm Khul kơdră chĕp pơgơ̆r Đảng dêh char Khánh Hòa, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Hơnih bơ̆ jang Dăr lăng Trung ương Trần Sỹ Thanh pơma hơdăh, tơdrong tơchơ̆t jang kiơ̆ Tơdrong tơchơ̆t Hop akom tih Đang ƀô̆ dêh char Khánh Hòa kăl tơklep kơjăp hăm Tơdrong tơchơ̆t Hop akŏm tih lơ̆m teh đak ‘măng mă XIV; Khánh Hòa ưh khan pơdơ̆h ƀơ̆t jang kiơ̆ kơjăp mă oei kăl iung jang kơtang, tơchăr, tơchă đei trong jang ‘nao, trong jang jơnei vă Trung ương akŏm, lang să. Bơ̆ jang dăr lăng, lăng hơlen ưh khan vă “ƀôh jang glăi” mă vă iung jang, tơtom hơmet pơ ‘lơ̆ng tơnap tap, xek tơlang keh đang rim tơlĕch jang hiơ̆, tơhlăk tơhlĭn đunh, pơjing hơyak pran ăn tŏk mŭk drăm. Kơdră chĕp pơgơ̆r Hơnih bơ̆ jang Dăr lăng Trung ương Trần Sỹ Thanh pơkă, trong tơlĕch jang tŏk ƀar kơsô̆ ưh khan lăp nơ̆r pơma mă lei kăl tơlĕch jang kiơ̆ hơdăh, hơdăh bơngai, hơdăh tơdrong jang, hơdăh jang keh đang lơ liơ; atŏk kơtang dăr lăng, lăng hơlen tơklep hăm hơlen hơdăh jang kiơ̆ keh đang lơ liơ tơgop lơ̆m tŏk mŭk drăm. Adoi, atŏk kơtang hơmet ming trong bơ̆ jang mă ‘lơ̆ng, lang să trong tơlĕch jang kiơ̆ Tơdrong tơchơ̆t truh hăm kang ƀô, đang viên păng lơ̆m tơpôl, pơjing đei hơyak tơplih kơtang lơ̆m iung jang kiơ̆. Ƀok Trần Sỹ Thanh pơma:“Lơ̆m trong tơbăt ‘măng dăr lăng, lăng hơlen kăl pơm hơdăh păng sơkơ̆t hơdăh tơdrong tơgop lơ̆m tŏk mŭk drăm kơ Khánh Hòa ‘noh dôm yơ pơtih kơhrĕng, hơpơi đei lơ loh ‘noh ‘lơ̆ng hloh. Ưh khan lăp tơƀôh hơdăh, tơƀôh hơdăh lăp vă bơ̆ jang ‘lơ̆ng hloh dơ̆ng. Đơ̆ng noh vang tơchă trong iung jang kiơ̆ păng trong xek tơlang dôm tơdrong tơlĕch ăn; pơchoh trong jang kiơ̆ mă hơdăh vă jang keh đang trong tơlĕch ăn tŏk 10%. Xek tơlang dôm tơdrong vă pơm kiơ? Bu dăr lăng hơlen tơdrong jang keh đang păng jang keh đang dang yơ? Ưh kơ gơh chă pơma atŭm atŭm, mă lei pơma tơroi hơdăh jơ ‘năr ayơ, pơjao ăn tơdrong jang mă hơdăh”.

Ƀok Nghiêm Xuân Thành, Bí thư Đảng dêh char Khánh Hòa tơbăt, tơring hlôi tơlĕch jang kơjăp, tơlĕch tơdrong Tơchơ̆t Hop akŏm tih mă XIV păng rim trong iung jang, sơđơ̆ng lei lăi đơ̆ng dêh char truh tơ̆ tơring. Tơring sơkơ̆t hơdăh jang kiơ̆ kơjăp trong tơlĕch ăn tŏk ƀar kơsô̆, jang kiơ̆ kơjăp tơdrong hơpơi ‘meh vă tơ iung pơjing dêh char jing pơlei tơm găh Trung ương kiơ̆ Tơdrong tơchơ̆t kơsô̆ 09-NQ/TW đơ̆ng Hơnih tơm Chinh trĭ.       

Bơ̆ jang hăm Khul kơdră chĕp pơgơ̆r Đảng dêh char Gia Lai, Kơdră bơ̆jang lơ̆m Hơnih tơm Chinh trĭ, Kơdră chĕp pơgơ̆r Hơnih tơm jang tơbôl Lê Hoài Trung pơm hơdăh, tơlĕch jang kiơ̆ rim tơdrong tơchơ̆t, nơ̆r athei jang kiơ̆ đơ̆ng Trung ương  jang kiơ̆ ‘lơ̆ng, kơjăp păng ƀlep trong pơchoh ăn. Lơ̆m khei ‘năr rim Kơdră chĕp pơgơ̆r Đảng tŏk bŏk akŏm jang kiơ̆ Tơdrong tơchơ̆t Hop akŏm mă XIV păng hơmet ăn pôk rơih, tơdrong jang ou sa roi gĭt kăl hloh dơ̆ng. Dêh char Gia Lai kăl lăng kơjăp bơ̆ jang dăr lăng tơdrong jang kiơ̆ trong tơlĕch ăn tok ƀar kơsô̆; tơlĕch jang kiơ̆ trong bơ̆ jang khul kơdră ƀar kâp; atŭm hăm rim Tơdrong tơchơ̆t atŏk tơ iung dôm tơdrong jang kăl kiơ̆ nơ̆r pơrô̆ jang đơ̆ng Trung ương păng kơdră Đảng tơring. Kơdră Khul bơ̆ jang dăr lăng athei dêh char Gia Lai pơjao ăn rim hơnih bơ̆ jang, iung jang hơdoi kơjăp hăm Khul bơ̆ jang dăr lăng; pơm keh đang hla bơar chih tơbăt tơdrong bơ̆ jang mă tơpăt, mă trŏ ƀlep, tơƀôh hơdăh dôm tơdrong tơnap tap, tơhlăk tơhlĭn păng nơ̆r apĭnh tơlĕch jang mă hơdăh.

Bơ̆ jang hăm Khul Kơdră chĕp pơgơ̆r Đảng dêh char Dak Lăk, bok Nguyễn Thanh Nghị, Kơdră jang lơ̆m Hơnih tơm Chinh trĭ, Bí thư Trung ương Đảng, Kơdră chĕp pơgơ̆r Hơnih bơ̆ jang Tơdrong jang tơm Trung ương, Kơdră Khul tơbăt, dăr lăng, lăng hơlen ‘noh jĭ tơdrong iung jang hơnơ̆ng vă hơlen ƀlep, ƀôh hơdăh dôm tơdrong yan ou ‘lơ̆ng kơnê̆ lơ liơ, trong jang hơ iă, tơchăr hơ iă vă hơnơ̆ng tơlĕch jang kiơ̆; tơƀôh hơdăh dôm tơdrong jang tim mă ‘lơ̆ng vă tơtom đei trong hơmet pơ ‘lơ̆ng, adoi drơ̆ng ƀôh dôm tơdrong tơnap tap, tơhlăk tơhlĭn lơ̆m jơ ‘năr tơlĕch jang kiơ̆ rim trong bơ̆ jang đơ̆ng Đảng. “Ĭnh athei bơ̆n tĕnh koăng pơrô̆ kơtang vă pơjing hla bơar chih tơbăt tơdrong bơ̆ jang dăr lăng kiơ̆ trong tơlĕch ăn păng adoi jei đơ̆ng mă noh pơtruh ăn rim trong jang păng nơ̆r pơrô̆ jang ăn rim hơnih jang rim bơngai ƀơm truh vă iung jang hơdoi kơjăp hăm khul. Hăm hla bơar chih tơbăt tơdrong bơ̆ jang kăl chih mă tôm tong, mă trŏ lăp hơdăh dôm tơdrong jang hlôi jang kiơ̆ lơ liơ, chih hơdăh jang keh đang lơ liơ, jang tim mă ‘lơ̆ng ƀơ̆t yơ, tơdrong tơm pơm ăn adoi nhen trong tơlĕch jang kiơ̆. Dôm tơdrong tơhlăk tơhlĭn lơ liơ ‘noh bơ̆n tơroi mă rơhao ăn khul  vă khul chih akŏm tơroi tơbăt ăn Hơnih tơm Chinh trĭ lăng hơlen."

Khul bơ̆ jang dăr lăng mĭnh ƀar tơdrong jang tơm nhen: Tơdrong pơgơ̆r iung jang kiơ̆ đơ̆ng rim hơnih jang, tơring lăp đơ̆ng rŏng jang kiơ̆ trong bơ̆ jang khul kơdră chĕp pơgơ̆r tơring ƀar kâp; rim tơdrong jang, trong tơlĕch jang vă sơđơ̆ng ăn jang kiơ̆ ‘lơ̆ng trong tơlĕch ăn tok mŭk drăm jô̆ hơtŏ lơ̆m jăl jang 2026-2030 đơ̆ng 10% năm tơ̆ lơ kiơ̆ Tơdrong tơchơ̆t Hop akom tih ‘măng mă XIV kơ Đảng; tơdrong pơrô̆ jang, pơgơ̆r jang kiơ̆ Tơdrong tơchơ̆t kơsô̆ 57 đơ̆ng Hơnih tơm Chinh trĭ găh atŏk kơtang atŏk tơ iung khoa hŏk, kmăi kmŏk, tơplih ‘nao tơchăr, tơplih kơsô̆ teh đak.

Hloh đơ̆ng dăr lăng, lăng hơlen, rim khul bơ̆ jang đơ̆ng Hơnih tơm Chinh trĭ vă hơlen jang kiơ̆ rim tơdrong tơchơ̆t, nơ̆r athei jang kiơ̆ đơ̆ng Trung ương tơ̆ dêh char lơm tơring Tây Nguyên păng Nam Trung bộ; tơtom ƀôh dôm tơdrong jang jơnei vă pơih să jang kiơ̆, adoi hơmet pơ ‘lơ̆ng tơnap tap, tơhlăk tơhlĭn, sơđơ̆ng ăn trong bơ̆ jang tih đơ̆ng Đảng đei tơlĕch jang kiơ̆ tôm tong, kơtang, tơgop pơtrŭt kơtang atŏk tơ iung mŭk drăm-tơpôl păng jang keh đang rim trong tơlech jang tŏk muk drăm kiơ̆ Tơdrong tơchơ̆t Hop akŏm tih ‘măng mă XIV kơ Đảng.