Khul bơ̆ jang dăr lăng tơ̆ Hơnih jang Kmăi kmŏk pơm tơlĕch tơmam drăm Hòa Phú, Hơnih jang Kmăi kmŏk pơm tơlĕch tơmam drăm Phú Xuân păng Tơdrong vă jang Hnam pơgang tơm Ƀuôn Hồ. Iung pơma tơ̆ jơ dăr lăng, Bí thư Đảng dêh char Dak Lăk Lương Nguyễn Minh Triết pơma hơdăh, rim hơnih jang kmăi kmŏk pơm tơlĕch tơmam drăm jing hơnih kăl lơ̆m pơtrŭt atŏk tơ iung kmăi kmŏk pơm tơlĕch tơmam drăm, tơplih tơdrong jang mŭk drăm păng pơjing tơdrong jang. Ƀok Lương Nguyễn Minh Triết athei Hơnih vei lăng kon pơlei dêh char pơrô̆ athei rim hơnih bơ̆ jang, tơring tĕnh koăng hơmet pơ ‘lơ̆ng tơnap tap, atŏk kơtang iung jang pơm trong tơm mơ̆t lơ̆m Hơnih jang Kmăi kmŏk pơm tơlĕch tơmam drăm Hòa Phú, kmăi kmŏk đing pơro đak rơgoh, hnam kmăi hơmet pơ ‘lơ̆ng rơ̆m rĕk; adoi hrôih rơih đei bơngai tơmơ̆t jên jang trong hnam Hơnih jang Kmăi kmŏk pơm tơlĕch tơmam drăm Phú Xuân.