Tơ̆ Hơnih bơ̆ jang thôn Phan Dũng, tơring Tuy Phong kơƀang pơklep hla bơar chih hơnăn bơngai tăh hla păng bơngai đei hơnăn ăn pôk pơm kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp jăl jang 2026 - 2031 ling lang đei lơ kon pơlei truh chă đŏk lăng. Ƀok Mang Nhu, hơdrung Raglai oei lơ̆m thôn Phan Dũng tơbăt, dôm năr ou ki kang ƀô̆ thôn hơnơ̆ng năm truh rim hnam kon pơlei vă tơroi tơbăt găh ‘măng pôk rơih, pơkă athei kon pơlei năm lăng vă băt hơdăh dôm bơngai đei hơnăn pôk rơih păng lăng hơlen hơnăn kon pơlei tăh hla, hơmet ăn vang năm tăh hla.“Rim kon pơlei gơh rơih rim bơngai tang măt, kơna kăl pôk tơmơ̆t lơ liơ mă ƀlep, mă kiăp bơngai. Jĭ bơngai tăh hla bu bu jei hơpơi ‘meh vă dôm bơngai tang măt lăp đơ̆ng rŏng đei mơ̆t pơm kơdră tang măt ‘noh lăng ba truh lơ tơdrong hloh dơ̆ng truh tơdrong hơpơi ‘meh vă kơ kon pơlei, lăng ba vă đei tơdrong hơrih sa phĭ tơtŏ dơnŏ ‘lơ̆ng dơ̆ng kơjăp, hơnuk hơnoa. Ba ƀôh kon pơlei bu bu jei chơt hơ iă, chă pơtho khan ăn kôn mon kon sou 18 sơnăm năm tơ̆ ‘lŏ gơh năm tăh hla”.

Ƀok Mang Hiếu, Thôn trơng thôn Phan Dũng tơbăt, thôn Phan Dũng đei lơ kon pơlei hơdrung Raglai, găh lơ̆m hơnih tăh hla kơsô̆ 5 kơ tơring Tuy Phong, dêh char Lâm Đồng. Thôn đei 663 ‘nu bơngai tăh hla păng rim bơngai tah hla jei kơtơ̆ng tơroi tơbăt găh năr pôk rơih.“Vă kon pơlei băt hơdăh hloh dơ̆ng găh năr 15/3 ‘noh năr đĭ đăng kon pơlei năm tăh hla ‘noh hrei ou thôn jei hlôi iung jang hơdoi hăm Măt trân vă tơroi tơbăt lơ̆m Zalo kơ khul adoi nhen fanpage kơ Khul kon pơlei choh jang sa. Đơ̆ng noh vă tơroi tơbăt ăn kon pơlei băt hơdăh năr ‘noh jĭ năm tăh hla, pơtruh jơhngơ̆m đon hơpơi ‘meh vă đơ̆ng kơdih hăm dôm bơngai đei hơnăn pôk tơmơ̆t”.

Tơ̆ tơring Bắc Bình, dêh char Lâm Đồng, bơ̆ jang hơmet ăn năr lêh tih jei hlôi jang keh đang. Yak năm truh hăm rim pơlei hơdrung Chăm kơ tơring Bắc Bình, mă tơ̆ yơ jei kơtơ̆ng aloa rapor găh ‘măng pôk rơih. Ưh khan lăp pơrô̆ tơbăt kiơ̆ aloa, rim khul vei lăng pôk rơih oei iung jang hơdoi hloi hăm dôm bơngai đei kon pơlei lui yom, rim bơngai chĕp kơ̆l khul lui lơ̆m kon pơlei bơngai Chăm năm truh rim hnam kon pơlei vă pơtho tơbăt, tơblang hơdăh ăn kon pơlei băt hơdăh kơ ‘măng pôk rơih. Ƀok sư Huỳnh Cứng, mĭnh ‘nu bơngai chĕp kơ̆l khul lui kơ bơngai Chăm tơ̆ thôn Bình Tiến, tơring Bắc Bình tơbăt: Hloh đơ̆ng ‘măng chă pơrô̆ pơtho tơbăt, kon pơlei Chăm ƀôh hơdăh pôk rơih ưh khan lăp tơdrong đei yoa kăl mă oei jing hơnăp jang kơ rim bơngai tăh hla. Đơ̆ng noh lang să jơ ‘năr chơt hơ iă ‘nă hal, lui yom kơtang vă năr pôk rơih-năr 15/3 kơnh tơpă jĭ năr lêh tih kơ kon pơlei pơla.“Dôm năr ou ki, tơring hơnơ̆ng pơrô̆ pơtho tơbăt kơtang găh bơ̆ jang pôk rơih, tơ̆ trong jei hơtol ƀăng rôn, nơ̆r pơrô̆, hla kơ teh đak, hla kơ pơrơ̆ vă jang kiơ̆ năr pôk rơih. Kơdih ba jĭ bơngai chĕp kơ̆l khul lui, ba chă pơtho khan mă blŭng ‘noh hăm ŭnh hnam kơdih bơ̆n chăm truh năr năm tăh hla păng rơih dôm bơngai đei jơhngơ̆m đon ‘lơ̆ng, bơ̆ jang hơgei vă đơ̆ng rŏng ou mưh đei pơm bơngai tang măt kăl bơ̆ jang ƀlep hăm nơ̆r pơkăp đơ̆ng kơdih hơdrol ou ki, tơgop jơhngơ̆m plang ăn pơlei pơla”.

Yă Nguyễn Thị Vân Khánh, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih vei lăng pôk rơih tơring Bắc Bình tơbăt, pơđĭ lơ̆m tơring đei hloh 36.400 ‘nu bơngai tăh hla. Vă hơmet ăn ‘măng pôk rơih kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp jăl jang 2026 - 2031, khul kơdră chĕp pơgơ̆r tơring hlôi tĕnh koăng tơlĕch jang tôm tong tơdrong jang hăm iung jang kơtang, mă kăl bơ̆ jang pơrô̆ tơbăt.“Bơ̆ jang pơrô̆ tơbăt kăl đei lăng kơjăp, mă kăl ‘noh lơ̆m tơring kon kông. Păng kiơ̆ đơ̆ng noh, nhôn iung jang hơdoi hăm khul chih kơtơ̆ng ang vă tơroi tơbăt kơtơ̆ng ang păng tơƀôh tơbăt dôm tơdrong đei ƀơm truh bơ̆ jang pôk rơih. Trong jang mă kơdră kơpal pơrô̆, nhôn jei iung jang kiơ̆ ƀlep tơchơ̆t, bơ̆ jang dôm tơdrong đei ƀơm truh tơdrong jang pôk rơih, păng nhôn lui năr 15/3 tơpă jĭ năr lêh tih kơ pơđĭ kon pơlei”.

Jei nhen tơ̆ tơring Bắc Bình, tơring Tuy Phong ‘nao đei pơjing hăm groi teh să, măt bơngai kon pơlei oei răh rap, tơdrong hơrih sa oei lơ mơmat tat, tơdrong bơ̆ jang hơmet ăn pôk rơih kăl iung jang mă hơlen hloh dơ̆ng. Ƀok Trần Di Hậu, Kơ iĕng Kơdră chĕp pơgơ̆r Hơnih vei lăng kon pơlei tơring Tuy Phong, dêh char Lâm Đồng tơbăt, akop măt bơnbgai tăh hla kơ tơring ‘noh 6.616 ‘nu lơ̆m 9.751 ‘nu kon pơlei. Lơ̆m tơring đei 2 hơnih tăh hla đei lơ kon pơlei kon kông ‘noh thôn Phan Dũng hăm thôn Tuy Tịnh 2. Truh dang ei, bơ̆ jang pơrô̆ tơbăt đei tơring iung jang hăm lơ trong jang tôch trŏ lăp.“Lăp đơ̆ng rŏng sơng iŏk đei hla bơar chih hơnăn rim bơngai pơjei, tơring jei hlôi pơrô̆ pơgơ̆r tơ iung pơjing trong pơrô̆ tơbăt găh dôm tơdrong oei sa, tơdrong bơ̆ jang kơ rim bơngai pơjei vă pơre lơ̆m aloa, đơ̆ng noh chih tơmơ̆t lơ̆m rim trang fanpage. Păng đơ̆ng dang ei truh năr tơpơh tơ̆ rim hơnih kơdrơ̆m bơngai nhen: Hnam trương hŏk, rim kơchơ gô chă hơtol dôm kơƀang pơrô̆ tơbăt păng rim pa-nô vă kon pơlei băt hơdăh hloh dơ̆ng tơdrong kăl kơ ‘măng pôk rơih”.

Rim ‘măng pơgơ̆r hop akŏm tơƀơ̆p pơma dơnuh hăm bơngai tăh hla hăm bơngai pơjei, dôm nơ̆r pơrô̆ tơbăt ăn năr pôk rơih, jơva aloa pơrô̆ tơbăt re vơvak prăt năr ... đĭ đăng tŏk bŏk pơjing đei jơ ‘năr chơt hơ iă ‘nă hal hloh hơdrol kơ năr pôk rơ̆ih tơ̆ tơring kon pơlei Chăm, Raglai.