Tơdrong pơhrăm gah tơdrong kăl jang đei pơih đơ̆ng năr 17/8/2026 đei 63 bơngai hŏk jĭ dôm Bơngai jang lơ̆m Ƀan châ̆p hanh Trung ương Đảng. Tơdrong pơhrăm gah nơ̆r pơma xa, tơdrong đei ƀôh 'nao hloh, hơtŏk tơdrong pơgơ̆r jang, vei lăng ăn đe kang ƀô̆ kơpal kơ Đảng lơ̆m jăl jang 'nao. Tổng Bí thư, Kơdră teh đak bơ̆n Tô Lâm ră hơdah, lăm pơhrăm đei pơgơ̆r kơtă lơ̆m sơnăm mă blŭng pơm kiơ̆ Tơchơ̆t Hop akŏm mă 14 kơ Đảng. 

Sơnong kăp gĭt dang ei noh pơgơ̆r jang: pơm ăn tơchơ̆t jang jing tơpă, păng đei jơnei hơdah; pơm ăn tơchơ̆t đơ̆ng Đảng jing trong hơtŏk tơ-iung teh đak păng tơdrong hơrih 'lơ̆ng rŏ hloh ăn kon pơlei. Tổng Bí thư, Kơdră teh đak bơ̆n ră hơdah, rim bơngai hŏk ưh hơdrô̆ pơgơ̆r jang hăm minh hơnih jang dah mă tơring, mă oei jing bơngai jang lơ̆m Ƀan châ̆p hanh Trung ương – anih jang kơpal hloh kơ Đảng lơ̆m 2 tơdrong Hop akŏm tơm. Kơyuơ noh, athei tơchĕng hơdah lơ̆m jơ̆p teh đak, pơm jang kơyuơ tơdrong pơyua atŭm, atŭm hăm Trung ương pŭ sơnong hăm Đảng, hăm kon pơlei gah dôm tơchơ̆t kăp gĭt păng tơdrong hơrih ning nai kơnh ăn teh đak.