Lơ̆m ‘măng năm ngôi, Khul đei dôm ‘măng tơƀâp, bơ̆ jang hăm Grŭp Nghị sĩ jang tơbôl Brasil - Việt Nam; Khul jang tơbôl Brasil - Việt Nam; Đảng Cộng sản Brasil păng Đảng Lao động Brasil. Bơ̆ jang hăm Grŭp Nghị sĩ jang tơbôl Brasil - Việt Nam, 2 păh drơ̆ng nơ̆r akhan, Việt Nam păng Brasil đei lơ tơdrong ‘lơ̆ng vă tơgŭm ăn băl.

Pơma nuh găh tơdrong jang hơdoi mŭk drăm, 2 păh akhan, dôm tơdrong iŏk đei tam mă tơgăl hăm dôm tơdrong ‘lơ̆ng păng trong jang hơdoi Gĭt kăl đơ̆ng 2 păh. Ƀok Lê Hồng Quang athei Quốc hội Brasil, mă loi jĭ Grŭp Nghị sĩ jang tơbôl Brasil - Việt Nam, hơnơ̆ng hơmet kơjăp trong jang hơdoi, pơjing tơdrong ‘lơ̆ng vă anih tech mơdro đơ̆ng 2 teh đak tơmât jên jang xa, tĕch mơdro; hơtŏk tơdrong jang hơdoi lơ̆m dôm tơdrong choh jang xa hăm kơmăy kơmŏk ‘nao, jang kơmăy pơm hơmet tơmam, unh hơyuh rơgoh, tơplih hăm kơmăy sô̆, jang khoa hŏk – kơmăy kơmŏk, logistics păng pơtho ăn khul bơngai jang.