Lêh Sầu riêng Đắk Lắk sơnăm 2026 đei 17 tơdrong jang tơm. Ƀôh hơdăh nhen: lêh pơgơ̆r pơih blŭng tơ̆ Cham să 10/3; Hop akŏm cham char sầu riêng kơjăp; lêh tơmam sa yak truh pơjing ki lŭk Việt Nam hăm 102 tơmam sa pơm đơ̆ng sầu riêng; hơnih pơdă tơmam sầu riêng păng tơmam OCOP; dôm tour chă lăng pơgar sầu riêng tơklep hăm tơmang lăng joh ayŏ - cham char bri brăh; kŭm hăm lơ tơdrong jang joh ayŏ kơdŏ soang, pơdă păng pơtrŭt tĕch mơdro....

Mă hơdăh, hơnih pơdă tơmam sầu riêng păng tơmam OCOP đei 310 kơdeng. Găh tơmang lăng, dôm anih mơdro sa pơgơ̆r 8 tơdrong jang chă lăng vă kơbăt. Tơdrong jang 500 tong gre tih kơdâu pơrŏ tơ̆ trong roi tơƀôh sầu riêng hăm trong năm đơ̆ng Krông Păk truh Buôn Ma Thuột. Tơdrong joh hơri hơsoang păng tơmam sa roi tơƀôh 102 tơmam sa pơm đơ̆ng sầu riêng. Pơlong kơdâu Tuy Hòa 2026 “Sơng ‘năr lĕch tơ̆ đak dơsĭ” hlôi sơng đei dang 2.600 ‘nu bơngai vang kơdâu chih măt...

Lêh tơmam sa Sầu riêng Đắk Lắk đei pơgơ̆r tơ̆ hơnih cham Tơdrong jang Eco Palace, phường Buôn Ma Thuột. Tơ̆ âu oei roi tơƀôh tơmam đơ̆ng choh jang sa đei, tơmam ‘lơ̆ng kơ tơring, tơmam chă tơmang lăng, joh ayŏ Tây Nguyên, pơlei tơdrong jang joăt joe păng dôm tơmam sa, tơmam huch nhă pơm đơ̆ng sầu riêng. Hơdai hăm tơdrong jang tơmam sa, lêh đei dôm tơdrong jang tôn chĭng chêng, reh tĭng nĭng, teh chĭng klơk Tây Nguyên, hơsoang, tơdrong pơchơt kră sơ̆, chhơ̆ rup trong kơphô̆ păng dôm tơdrong joh ayŏ kơdŏ soang.... Tơmoi kŭm đei huch đĕch tơmam huch pơm đơ̆ng sầu riêng, lơ̆m noh đei cheh phe sầu riêng păng trà sữa sầu riêng.

Ƀok Lê Hoàng Cơ, Kơdră vei lăng Dam San Tourist, Kơdră Khŭl pơgơ̆r Lêh Tơmam sa Sầu riêng, tơbăt, dôm bơngai pơm pai đơ̆ng 20 khŭl pơlong đơ̆ng jơ̆p lơ̆m teh đak gô vang pơm pai “102 tơmam sa hơdai hăm Sâu riêng Đăk Lăk”. Tơdrong jang âu pơjing đei Ki lŭk Việt Nam:  “Sâu riêng jĭ 1 kơloăi tơmam đơ̆ng choh jang sa đei kơti dô lar kơna bơ̆n athei hơtŏk sư ‘lơ̆ng, ‘ngoăih kơ yua hmă ‘noh bơ̆n athei pơm, pai. Mưh pơjing đei đang ki lŭk 102 tơmam sa hăm sầu riêng ‘noh tơdrong ‘măn ăn hơtuch ‘noh jĭ bơ̆n pơih đei dôm hơnih tĕch mơdro tơmam et sa tih, hnam tĕch tơmam sa sầu riêng tơ̆ rim tơring, đei hloi tơ̆ lơ̆m teh đak păng apŭng plĕnh teh”.

Minh tơdrong jang tơchĕng hơdrol đei Guinness apŭng plĕnh chih tơmơ̆t ki lŭk ‘noh jĭ gre tih chơ sầu riêng kơdâu pơrŏ đơ̆ng Krông Pắc tŏk tơ̆ Hơnih kơdrơ̆m Trong tơklah 6 păng 1,2 trong kơphô̆ đơ̆ng anih kơdrơ̆m Buôn Ma Thuột. Khŭl gre tih chơ sầu riêng kơdâu pơrŏ tơ̆ Lêh sầu riêng Đắk Lắk 2026 ‘noh đei 500 tong gre, minh tong gre chơ 200 kĭ sầu riêng. Khŭl pơm tơm kơdâu đơ̆ng Cham să Tân An, xăh Krông Pắc, năm rok kiơ̆ Trong tih 26, đơ̆ng rŏng ‘noh lơ̆m trong tih 27 păng truh tơ̆ Trong Võ Nguyên Giáp. Khŭl hơnơ̆ng năm brih hơnih kơdrơ̆m Trong tơklăh 6 păng 1,2 trong kơphô̆ lơ̆m Buôn Ma Thuột.

Yă Trần Vũ Thùy Linh, Phŏ Kơdră Khŭl pơgơ̆r khŭl gre kơdâu pơrŏ, tơbăt truh dang ei, Khŭl pơgơ̆r hlôi sơng iŏk hlar chih măt hloh 600 tơ ‘ngla gre, yak hloh tơdrong hơgăt hloh 100 tong gre. Anih jang Guinness kŭm hlôi pơtruh bơngai tang măt truh tơ̆ Đắk Lắk vă jang hơdai, pơgơ̆r pơm bơ̆n hla ar chih tơmơ̆t ki lŭk:  “Gah tơchơ̆t Guinness 'noh tôch kơhret, đơ̆ng kơsô̆ plei sâu riêng lơ̆m gre athei tơmam tơpă 100% truh tơdrong mă bơngai vang jang athei đei tôm hơnăn măt păng hơnăn dôm bơngai vơ̆r gre. Dang ei Jơnŭm jang Sâu riêng dêh char Đăk Lăk hlôi pơm tôm hla bar ou. 'Nguaih kơ noh, Jơnŭm jang adoi hơvơn minh 'nu juăt jang gah Guinness năm truh tơ̆ Đăk Lăk vă hơlen pơkăp. Đơ̆ng rŏng tơlĕch jang pơhlom 30 pơnĭt, đe sư gô dăr lăng, pơkăp minh 'măng dơ̆ng. Mưh ưh đei kiơ tơhlăk, 'noh gô tơlĕch tơchơ̆t kơtă hloi”

Kiơ̆ Jơnŭm pơgơ̆r, Lêh akŏm Sâu riêng Đăk Lăk sơnăm 2026 ưh hơdrô̆ tơbang hơnăn sâu riêng mă oei pơkăp truh tơdrong pơjing tơmam drăm pơm jang, hơtŏk jang hơdoi đơ̆ng pơm tơlĕch – tĕch răt, hơvơn asong jang dơnơm, logistics păng hơtŏk tơmang pơhiơ̆ choh jang xa. Đăk Lăk brư̆ brư̆ hơnhăk Lêh akŏm Sâu riêng jing tơdrong lêh tơm kơ jơ̆p teh đak, lĕch truh teh đak nai.

Ƀok Trần Hồng Tiến, Kơdră Hơnih jang Joh ayŏ, Tơplŏng kơdou păng Tơmang pơhiơ̆ dêh char Đăk Lăk ăn tơbăt, dôm tour chă dăr lăng pơgar sâu riêng đei pơjing ưh hơdrô̆ lơ̆m lêh akŏm đĕch ôh, mă gô đei hơlen lăng vă pơjing tơmam drăm tơmang pơhiơ̆ hơnơ̆ng, tơgop hơnhăk pơyan sâu riêng jing hơnih truh tơmang pơhiơ̆ rim sơnăm kơ Đăk Lăk: “Dôm tour ou ưh hơdrô̆ 'măn ăn lêh akŏm mă đơ̆ng rŏng kơnh gô đei hơlen lăng pơjing dôm tour tơmang pơhiơ̆ hơnơ̆ng rim sơnăm. Lơ̆m dôm sơnăm ưh đei pơgơ̆r lêh akŏm, mă lei vă rim bơngai truh hăm Đăk Lăk chă hơlen băt dôm tơring pơtăm, đei xa đei lăng trong pơm jang, iŏk yua, tah 'nŭng. Đơ̆ng rŏng kơ lêh nhôn hơpơi 'meh rim pơyan sâu riêng 'noh rim bơngai gô ƀlŏk hơdơ̆r păng gô năm tơmang pơhiơ̆ truh Đăk Lăk”.

Gah tơdrong jang đei jơnei kơ Lêh akŏm Sâu riêng Đăk Lăk sơnăm 2026  hăm bơngai pơtăm, mă kăl noh tơdrong pơih să tơdrong tĕch răt, hơvơn asong jang, tĕch pơdro păng dôm tơchơ̆t ah mă lêh akŏm pơtôch, yă Đặng Thị Thủy, Phŏ Kơdră Hơnih Choh jang xa păng Cham char dêh char Đăk Lăk ăn tơbăt: “Hơnih jang hlôi tơlĕch trong jang hơdah, vă tơgŭm ăn Hơnih jang vei lăng kon pơlei dêh char đei lơ trong jang 'lơ̆ng lơ̆m vei lăng tơdrong jang sâu riêng. Nhôn tŏk bŏk tơgŭm ăn Hơnih jang vei lăng kon pơlei dêh char hơtŏk kơtang iŏk yua kơmăi kơsô̆, lơ̆m noh đei tơdrong jang 30 măng năr. Mă 2 noh pơm kiơ̆ tơdrong hơlen đơ̆ng rŏng, dang ei hăm tơdrong asong mã kơsô̆ tơring pơtăm păng hơnih tah 'nŭng 'noh nhôn adoi hơtŏk kơtang, pơm thoi yơ tang găn đei tơdrong pơjĭp lơ̆m mã kơsô̆ tơring pơtăm”.

Dêh char Đăk Lăk dang ei đei jê̆ 45.000 ha sâu riêng, đei hloh 1/5 teh pơtăm sâu riêng kơ jơ̆p teh đak. Sơnăm 2025, plei sâu riêng kơ dêh char đei yua truh 390 rơbou tấn, tĕch ăn teh đak đe đei yua pơhlom 1,1 ti đôlar, hơnhăk sâu riêng jing minh lơ̆m dôm tơmam choh pơtăm dơnơm kơ tơring. Đơ̆ng rŏng kơ dôm kơsô̆ ou noh jing trong pơm jang kơ dôm jĭt rơbou unh hnam, jing tơđrong tơplih kơ lơ pơlei pơla păng jơhngơ̆m pran vă vei răk tơƀăk mong dôm tơdrong kăp gĭt gah joh ayŏ.

Lêh akŏm Sâu riêng Đăk Lăk 2026 ưh hơdrô̆ pôk pơ-ư hăm hơdrĕch 'long xa plei ou, mă oei sơkơ̆t hơdah tơdrong hơpơi 'meh hơnăn tơmam choh pơtăm tơguăt hăm tơdrong joh ayŏ Tây Nguyên, hơtŏk tơmang pơhiơ̆ păng hơtŏk tơdrong kăp gĭt kơ tơdrong jang kơ ti đô ou. Ah tơdra chĭng chêng re ang lơ̆m pơyan sầu riêng đum, 'noh jing kơplah Đăk Lăk tơroi hăm bôl buăl lơ̆m teh đak păng lơ̆m apŭng plenh teh băt gah tơring teh pơjing mŭk drăm choh jang xa jing trong jang hơtŏk mŭk drăm – tơpôl.