Iŏk đơ̆ng tơlĕch jang tơdrong jang (7/7) truh dang ei, dêh char Đắk Lắk đei 53 tơdrong jang tơm tơ̆ pơđĭ tơring păih Hơlĕch păng păih Pơmơ̆t đei tơlĕch jang iŏk pơ ‘ngoăih teh. Truh dang ei, 3 tơdrong jang hlôi jang đang 100% teh, 50 tơdrong jang iŏk đei dang 90%. Lơ̆m kơsô̆ iŏk đei hloh 90% đei dôm tơdrong jang tih nhen Trong gre kơdâu hrĕnh Khánh Hòa – Buôn Ma Thuột tơdrong jang 3 păng Tơdrong jang pơm trong nơnăm tơ ter đak dơsĭ Phú Yên…

Ƀok Phạm Ngọc Hùng, Phŏ Kơdră Anih vei lăng găh Choh jang sa păng Cham char dêh char Đắk Lắk (bơngai jang lơ̆m Grŭp jang tơgŭm) tơbăt, 5 grŭp bơ̆jang yua đơ̆ng Anih vei lăng kon pơlei pơjing hlôi tơtom hơmet pơ ‘lơ̆ng lơ tơdrong hơnat hơnot, pơdui đunh lơ sơnăm. Tơdrong jang iŏk pơ ‘ngoăih teh tơplih đơ̆ng pơmơ̆ng jing kơchăng kiơ̆ trong tơlĕch jang, tŭn hrĕnh pơjao teh păng tơlĕch jên jang hrŭ ‘mong.