Tơ̆ tơdrong jang XL01, găh jăl 2 kơ tơdrong jang pơm Trong gre kơdâu hrĕnh Khánh Hòa – Buôn Ma Thuột, dôm anih jang hlôi hơmet khul jang kiơ̆ trong “prăng jang tơ̆ ‘ngoăih, ‘mi jang tơ̆ lăm”. Ƀok Nguyễn Viết Chung, Bơngai vei lăng Khul jang man trong trôm Phượng Hoàng tơroi, khul adrin bơ̆ jang pơtôm tơ̆ rim tơdrong jang, hăm tơdrong vang akŏm đơ̆ng 345 ‘nu công nhân, ki sư păng 120 tŏ gre, kơmăy kơmŏk.

“Mă ‘mi, mă prăng sư ưh đei ƀơm truh lơ tơ̆ tơdrong jang man trong trôm, lăp ƀơm ưh ‘lơ̆ng truh dôm tơdrong jang tơ̆ ‘ngoăih đĕch ‘nŏh jĭ gơng păng trong hmă. Lơ̆m dôm năr prăng, nhôn tơgĕch jang tơ̆ kơ ‘năr păng kơmăng hloi, hơmet tôm tơdrong ăn ‘nhŏng oh tuh yâu hăk vă gơ̆h bơ̆ jang đei yoa ‘lơ̆ng, trŏ năr tơ ‘ngal tơmât jên jang athei. ‘Nhŏng oh adrin tôch ai vă bơ̆ jang gơ̆h đei yoa ‘lơ̆ng hlŏh. Trong vă jang ‘nŏh truh ‘năr 31/12 gô man đang trong trôm păng ăn gre kơdâu mât lĕch.”

Ƀât oei hăt bơ̆ jang ming man, tơ̆ tơdrong jang XL03, ƀok Nguyễn Văn Lê, Phŏ Kơdră pơgơ̆r jang man trong trôm Cư Te ăn tơbăt, anih jang dang ei bơ̆ jang hiơ̆ ƀiơ̆ dang 5% pơting hăm tơdrong hơgăt. Vă jang đei ‘lơ̆ng, anih jang oei krao akŏm dang 500 ‘nu công nhân, ki sư kŭm hăm hlŏh 180 tŏ gre, kơmăy kơmŏk, adrin jang đang, pơjao trong trôm trŏ năr hơgăt.

“Hrei ‘nâu, nhôn oei đei hlŏh 150 ‘nu công nhân, ki sư đei tôm kơmăy kơmŏk vă bơ̆ jang ming man tơ̆ 3 anih ‘nŏh man trong trôm, man gơng păng trong hmă. Lơ̆m khei 8 đei lơ ‘mi kial kơna nhôn athei, mưh prăng ‘lơ̆ng ‘nŏh bơ̆ jang tơ̆ ‘ngoăih, oei ‘mi ‘nŏh jang lơ̆m trong trôm. Tơdrong jang lơ̆m trong trôm kŭm đei klăih song pơm 3 ka, adrin bơ̆ jang ming man. Păih trong trôm găh ‘ngieu hlôi man đang bơih; oei trong trôm păih ‘ma ‘nŏh anih iŏk jang oei adrin man pơđang bê tông lơ̆m trong trôm păng tuh yâu hăk tơ̆ trong lơ̆m khei 9 truh.”

Tơdrong jang tơ̆ jăl 2 kơ Trong gre kơdâu hrĕnh Khánh Hòa – Buôn Ma Thuột đei jên jang hlŏh 10.400 ti, kơjung vă jê̆ 37km, năm klĕch dôm xăh M’Đrắk, Krông Jing, Cư Pui păng Ea Kar (dêh char Đắk Lắk), yoa Anih vei lăng trong gre treng (Anih tơm ming man) pơm tơ ‘ngla tơmât jên jang. Trong gre đei pơm klĕch bri kông kơjung, hăm 4 tŏ trong trôm hơla kông păng 38 tŏ gơng kơpal teh. Truh dang ei, tơdrong jang hiơ̆ ƀiơ̆ 8,15% pơting hăm năr hơgăt, ‘nao jang đei hlŏh 86% tơdrong jang ming man. Vă jang lăp hăm năr hơgăt, dôm anih jang oei pơgơ̆r ăn 71 khul jang hơnơ̆ng, akŏm đei 546 tŏ gre, kơmăy kơmŏk păng vă jê̆ 1.400 ‘nu ki sư, công nhân, pơgơ̆r bơ̆ jang hơnơ̆ng “3 ka, 4 kíp”.

Ƀok Phan Đình Hạc, tang măt ăn Anih roi tơƀôh trong dăr lăng, ăn tơbăt găh tơdrong jang ming man tơ̆ tơdrong jang XL03: “Tơ ‘ngla tơmât jên jang pơgơ̆r bơ̆ jang tôch hơlen, nhôn jĭ anih dăr lăng hơnơ̆ng đei măt tơ̆ noh, athei dôm anih jang adrin. Hăm tơdrong jang tơƀưh hăm trong păih Jăl 1 hlôi ăn gre ki thuơ̆t kơdâu bơih, oei tơdrong jang ming man tơ̆ trong trôm Cư Te ‘nŏh oei tuh pơkeh bê tông lơ̆m trôm păng lu hơmet hơnă, tuh yâu yăk. Dôm anih iŏk jang adrin jang pơkeh vă ăn gre ki thuơ̆t kơdâu lơ̆m ‘năr 2/9.”

Tơdrong jang jăl 1 păng 3 Trong gre kơdâu hrĕnh Khánh Hòa – Buôn Ma Thuột oei man pơkĕh dôm anih mă hơtuch, adrin tơmât yoa lơ̆m khei 9 truh. Tơdăh tơdrong jang jăl 2 jang tom ‘nŏh đĭ đăng Trong gre kơdâu hrĕnh Khánh Hòa- Buôn Ma Thuột gô ăn gre kơdâu tôch trong ƀât hơtuch sơnăm ‘nâu păng iŏk yoa trong ‘nâu đơ̆ng blŭng sơnăm 2027 kiơ̆ nơ̆r pơtho đơ̆ng Khul kơdră  teh đak.