Minh lơ̆m dôm tơdrong tơm pơm ăn asong jên jang kŏng tơ̆ dêh char Gia Lai ưh đei jơnei noh lơ tơdrong jang tơm tŏk bŏk oei adar. Lơ̆m noh đei Tơdrong man hnam trưng phôh thŏng kon kông teh đak rong 'me dôm jăl hŏk tơ̆ 7 xah sơlam, Tơdrong ming man trong păr tŏk jur kơsô̆ 2 tơ̆ Cham gre păr Phù Cát păng Tơdrong ming hơmet gru grua Kơthôt Chăm Dương Long. Tơrĕk hloh noh, jăl trong kơdou hrĕnh Quy Nhơn - Pleiku, tơdrong asong jang đei jên asong lơ păng đei sơkơ̆t jĭ minh lơ̆m dôm tơdrong hơtŏk tơ-iung tơm kơ dêh char, adoi tam mă đei hrŭ 'mong hơnih teh iŏk ming man tơ̆ lơ tơring kơlih jăl trong găn noh mă lơ jing bri hon kơdih. Ƀok Nguyễn Tự Công Hoàng, Phŏ Kơdră Hơnih jang vei lăng kon pơlei dêh char Gia Lai, pơgơ̆r dôm tơdrong asong ming man ăn tơbăt: "Tơhlăk tăk 'noh Hơnih Choh jang xa păng Cham char athei sek tơlang pơkeh gah teh bri. Tơdrong mă ou lơ̆m 8 khei kơ ou Jơnŭm vei lăng bri hơmŏ ưh gơh jang, giĕng mă yơ hop akŏm adoi tơroi truh ngăl. Tơdrong jang mă 2 (Ming man trong kơdou hrĕnh Quy Nhơn- Pleiku) mă tơm noh tơhlăk gah teh bri"

Ưh hơdrô̆ tơhlăk gah hla bar luơ̆t, teh ming man, tơdrong asong jên jang kŏng tơ̆ Gia Lai oei ƀơm răm kơlih dôm tơdrong pơgơ̆r pơm jang. Hơnih jang vei lăng kon pơlei dêh char Gia Lai sơkơ̆t hơdah, tơ̆ lơ hơnih jang vei lăng, đei tơdrong pơm jang pơgia la, pơ-'nhang gah ou gah to. Ah mă hô sơ đei tơhlăk tăk, pơtăl kơ jang hơdoi chă trong pơklaih, noh đei 'măng pơdreo hô sơ, pơm ăn khei năr sek lăng jing đunh.

Kơdră Hơnih jang vei lăng kon pơlei dêh char Gia Lai Phạm Anh Tuấn pơgơ̆r hăm rim hơnih jang, rim tơring dah hơmet tơtenh, jang trŏ nhen tơchơ̆t; hơmet trong pơm jang kơjăp kiơ̆ pơkăp “6 hơdah”. Ƀok Phạm Anh Tuấn ăn tơbăt, Hơnih jang vei lăng kon pơlei dêh char Gia Lai hlôi chih akŏm trong jang hơdah, pơgơ̆r hăm rim hơnih jang, rim tơring pơm jang kơjăp vă keh đang jên asong jang kŏng 100% ah hơtuch sơnăm: "Lơ̆m 30 tơdrong tơchơ̆t kơ Tơlĕch jang đơ̆ng teh đak, kơdră kơ dôm hơnih jang athei pơgơ̆r jang mă trŏ. Athei pơgơ̆r jang thoi vă jên asong jang hlôi đei, dêh char asong jên dah mă xah asong jên adoi iŏk jang đĭ. Lơ̆m noh, athei asong jên hrôih ăn jăl trong kơdou hrĕnh Quy Nhơn - Pleiku păng tơdrong man hnam trưng hŏk tơ̆ tơring sơlam. Gah asong jên jang kŏng 'noh athei akŏm asong tôm 100%.”