Đơ̆ng 2022 - 2026, dêh char Đắk Lắk đei 60 tơdrong jang khoa hŏk kơmăy kơmŏk tơ̆ dêh char đei hơlen năng, pơjao asong iŏk yoa. Mĭnh ƀar tơdrong tơchĕng hơlen hlôi đei tơmât yoa tơ̆ yăn âu, vang tơgop tưk tơiung tơdrong choh jang xa hăm kơmăy kơmŏk ‘nao, pơm hơmet tơmam đơ̆ng choh jang xa, pơgang, tơplih hăm kơmăy sô̆, vei lăng gen păng vei lăng jơhngâm pran tơpôl.

Trong jang hơdoi đơ̆ng teh đak, bơngai jang khoa hŏk păng anih tĕch mơdro kŭm đei tơlĕch lơ̆m 1,2 tơdrong jang pơm hơmet tơmam đơ̆ng plei sầu riêng, atŏk tơiung ‘long pơgang, hơlen năng hơdrĕch ƀum ‘nao păng rong pơmâu pơgang tơ̆ hơla yơ̆p ‘long bri. Mă lei, tơdrong pơtho tơƀôh, tĕch dôm tơdrong tơchĕng hơlen đei oei tam mă ‘lơ̆ng; trong vei lăng, kla jên ăn dôm tơdrong jang khoa hŏk oei tam mă lăp.

Tơ̆ hop akŏm, kơdră chĕp kơ̆l Anih vei lăng kon pơlei dêh char Đắk Lắk athei Anih jang Khoa hŏk păng kơmăy kơmŏk dêh char hơnơ̆ng hơlen năng tơdrong jang, lăng năng tơdrong đei yoa đơ̆ng dôm kơmăy hlôi đei tơmât yoa; chă rơih dôm tơdrong jơnei đơ̆ng tơchĕng hơlen vă pơih xă, tĕch mơdro, tơmât hơdai tơdrong tơchĕng hơlen hăm tơdrong 'mĕh vă jang tŏk đơ̆ng dêh char kiơ̆ Tơdrong tơchơ̆t 57 đơ̆ng Anih tơm Chinh trĭ. Hăm dôm tơdrong tơhlăk găh trong pơm hla ar, pơgơ̆r jang, dêh char athei jăh hơlen năng vă kăt tơjur tŏ sĕt hlŏh 50% tơdrong hơgăt găh hơnăp jang đơ̆ng tơring.