Tơ̆ jơ pơma đam, Tổng Bí thư, Kơdră teh đak bơ̆n lui ngeh tơdrong hơtŏk sơđơ̆ng kơ Australia ưh hơdrô̆ hơnhăk tơdrong jơnap ăn kon pơlei Australia, ăn tơdrong jang tơbôl Việt Nam - Australia mă oei tơgop kăp gĭt ăn tơdrong rơngei hiôk hian, sơđơ̆ng păng hơnŭk hơnua ăn tơring păng apŭng plenh teh. Pơma đam gah tơdrong jang tơbôl 2 pah, Tổng Bí thư, Kơdră teh đak bơ̆n Tô Lâm ră hơdah Australia jĭ buăl juăt, jĭ teh đak jang hơdoi lui ngeh hăm Việt Nam.

Việt Nam tơgĭt tơdrong yak hơdoi păng tơgŭm đơ̆ng Australia lơ̆m tơdrong jang hơtŏk tơ-iung teh đak, atŭm hăm noh hơpơi 'meh hơtŏk jang tơbôl 2 teh đak roi năr roi kơjăp đei jơnei hloh. Gah sơkơ̆t trong jang hơdoi, Tổng Bí thư, Kơdră teh đak bơ̆n Tô Lâm pơtruh nơ̆r: 2 teh đak pơtoi hơtŏk đon lui gah chĭnh trĭ kiơ̆ đơ̆ng tơdrong pơma đam kơpal kơ dôm tơchơ̆t jang hơdoi; pơih să tơdrong jang hơdoi gah vei lăng teh đak; hơtŏk jang tĕch pơdro, asong jang, pơkăp truh tơmam tĕch răt kơ 2 pah đei truh 20 tih đôlar păng tŏk kơtang asong jang kơ 2 pah.