Dôm năr ‘nâu, ŏh Vũ Trần Tiến Đạt, hŏk tro lăm 5 Hnam trưng jăl mônh Nguyễn Thị Định, xăh Ia R'vê, kŭm hăm đe boăl đă ƀŏng lŏng ƀât anih teh hoh tơklă 'măng jang hnam trưng. Păih to ‘nŏh jĭ Hnam trưng teh đak rong xăh Ia R'vê oei man pơkeh đang dôm tơdrong jang hơtuch tơ̆ anĭh oei xa, hnam thi pơlong lơ tơdrong, Anih mong đŏk hla ar... Đạt tôch hơiă yoa sơnăm hŏk 2026–2027 trŭh au kơnh, ŏh kŭm hăm bôl boăl đei hŏk pơhrăm, oei xa lơ̆m hnam trưng 'nao:

"Thây kô păng mĕ ƀă ĭnh khan, đơ̆ng sơnăm hŏk truh ĭnh hŏk lơ̆m Hnam trưng teh đak rong xăh Ia R'vê. Ĭnh ƀôh tôch kơ chhôk ‘nă mưh đei mơ̆t hŏk tơ̆ noh. Tơ̆ noh, đe thây kô gô vei lăng nhôn, đơ̆ng sŏng xa, tep, pơdơh păng đei hloi anih pơtâp hơkâu jăn, tơplŏng kơdâu. Hơtuch giĕng ‘nŏh, ĭnh brŏk ngôi tơ̆ hnam. Ĭnh vă adrin hŏk pơhrăm mă gơ̆h. Tơdrong hơpơi 'meh đơ̆ng ĭnh 'noh ning mônh kơnh jing bơngai đă ƀŏng lŏng."

Oei oh Nông Thị Thùy, hŏk lăm 7 Hnam trưng jăl ƀar Trần Hưng Đạo, xăh Ia Lốp ăn tơbăt, Hnam trưng teh đak rong jăl mônh păng jăl ƀar xăh Ia Lốp đei pơjing ‘moi kiơ̆ Hnam trưng jăl mônh Nguyễn Trãi păng Hnam trưng jăl ƀar Trần Hưng Đạo. Yoa thoi noh, sơnăm hŏk truh oh gô đei hŏk pơhrăm, oei sa kơtă tơ̆ noh. Tơ̆ hơnăp tơdrong đei hŏk lơ̆m hnam trưng 'nao kơjăp 'lơ̆ng, đei tôm tơmam, kơmăy kơmŏk kăl, hăm anih oei xa ‘you rơgoh, oh tôch hơiă pơma:

"Ĭnh tôch kơ hơiă yoa đei hŏk oei xa kơtă tơ̆ hnam trưng, yoa hnam nhôn hơtăih kơ hnam trưng truh 15 kây sô̆. Lơ̆m hnam trưng đei bôl buăl, thây kô, đei hnam oei hơdrô̆ ăn đe drŏ kăn tôch 'lơ̆ng. Ĭnh vă hơdrin hŏk, hơmet tơdrong arih xa ăn kơ dih mă ‘lơ̆ng. Inh hơpơi 'meh ning mônh kơnh pơm kô pơtho. Kơna ĭnh vă hơdrin hŏk mă 'lơ̆ng vă ning mônh kơnh jing kô pơtho thoi kơdih hơpơi 'meh, đang kơ ‘nô̆h vih dơ̆ng tơ̆ tơring sơlam chă pơtho ăn đe oh hơioh tơ̆ âu dơ̆ng."

Dêh char Dak Lăk đei 4 xăh sơlam 'noh Ea Bung, Ia R'vê, Ia Lốp păng Buôn Đôn. Dôm xăh âu đei teh să ngăl, kon pơlei oei xa răh rai, lơ pơlei pơla atăih kơ anih kơdrơ̆m lơ̆m xăh truh dôm jĭt kilômet. Mŏ Vi Thị Thiều, oei tơ̆ Plei Druh dăm iung jang xa, xăh Ia Lốp ăn tơbăt: Ŭnh hnam đei ƀar 'nu kon oei hŏk lăm 8 păng lăm 6. Hnam atăih kơ hnam trưng vă jê̆ 20km kơna tơdrong chă ba đe mon năm hŏk tôch mơmat tat. Bre mon đei hŏk, oei xa kơtă tơ̆ hnam trưng sư tơgŭm ăn ŭnh hnam sơđơ̆ng jơhngơ̆m ƀiơ̆:

"Mưh mon đei hŏk pơhrăm, oei xa lơ̆m mĭnh hnam trưng kơjăp 'lơ̆ng, đei tôm tơmam hăm anĭh sŏng xa, tep pơdơ̆h 'nŏh ĭnh ƀôh sơđơ̆ng lơ̆m jơhngơ̆m. 'Nâu jĭ anĭh gô tơgŭm ăn mon tih vơ̆ djơ̆ ‘lơ̆ng tôm tơdrong đơ̆ng đon rơgei trŭh jơhngơ̆m pran, hơkâu jăn. Jĭ bơngai pơm mĕ, ĭnh ƀôh tôch hơiă yoa ư̆h pă kơ pơngơ̆t truh tơdrong chơ ba kon năm hŏk rim năr nhen adrol ki, păng ư̆h gan pă pơngơ̆t truh tơdrong vei lăng đe mon ‘năi bơih. Ƀât hơtuch giĕng ‘nŏh bre mon brok ngôi tơ̆ hnam."

Jăl jang đơ̆ng sơnăm 2025–2027, dêh char Đăk Lăk man 4 hnam trưng hŏk teh đak rong tơ̆ dôm xăh sơlam păng tơring pơmat tat. Lơ̆m noh, dôm hnam trưng tơ̆ Ia R’vê, Ia Lốp păng Buôn Đôn gô tơmât yoa lơ̆m sơnăm hŏk 2026–2027, sơng iŏk dang 3.100 'nu hŏk tro đơ̆ng lăm 1 truh lăm 9, hăm dang 2/3 kơsô̆ hŏk tro đei hŏk pơhrăm, oei xa kơtă tơ̆ hnam trưng.

Ƀok Hồ Sĩ Cát, Hiê̆u trơng Hnam trưng teh đak rong Ia R'vê (xăh Ia R'vê), tơroi, hnam trưng hlôi jang đang tơdrong rơ̆ih 910 'nu hŏk tro mât hŏk, đơ̆ng 3 hnam trưng đei: Hnam trưng jăl mônh, Jăl ƀar Chu Văn An, Hnam trưng jăl ƀar Nguyễn Thị Định păng Hnam trưng jăl mônh Nguyễn Đình Chiểu. Hơdai hăm ‘nŏh, hnam trưng oei hơmet ming khul thây kô pơtho, bơngai jang, bơngai vei lăng hŏk tro păng bơngai pai gŏ, hơmet tôm tơdrong vă gơ̆h sơng hŏk tro mât hŏk sơnăm hŏk 'nao 2026 – 2027:

"Mưh đe oh mơ̆t hŏk tơ̆ hnam trưng bơih noh, tơdrong vei lăng hŏk tro đơ̆ng pơgê truh kơmăng ưh pă đei pơngơ̆t kiơ bơih, đe sơđơ̆ng jơhngâm năm jang mir. Mĕ ƀă pă đei pơngơ̆t truh tơdrong sŏng xa 'năr dơ̆ng, kơsơ̆ sơng kon, rong kon sŏng xa. Đĭ đăng hŏk tro hŏk tơ̆ hnam trưng teh đak rong đei xa yoa dôm tơdrong tơgŭm, đơ̆ng jên sŏng xa, hơbăn ao hruk, hla ar hŏk truh ƀao hiêm pơgang yoa đơ̆ng teh đak tơgŭm ăn."

Dôm hnam trưng tơ̆ tơring sơlam teh đak tơ̆ Tây Nguyên ưh lăp pơih đei tơdrong ‘lơ̆ng mưh hŏk pơhrăm đĕch, mă oei tưk tơiung tơdrong hơpơi 'meh, tơgŭm đe hơioh tơring sơlam hŏk pơhrăm tih vơ̆ djơ̆ ‘lơ̆ng tôm tơdrong, vă ning mônh kơnh vih dơ̆ng tơ̆ pơlei, vang tơgop jơhngơ̆m tơiung pơjing pơlei pơla tơ̆ tơring sơlam teh đak.