Ƀok Trần Lưu Quang tang măt khŭl kơdră chĕp kơ̆l, kon pơlei pơlei tơm Hồ Chí Minh pơtruh nơ̆r vang sơ ‘ngon gĭt kăl truh Anih jang tang măt ăn teh đak Lào tơ̆ pơlei tơm HCM, đĭ đăng kang ƀô̆, bơngai jang lơ̆m Anih jang tang măt, Teh đak păng Kon pơlei Lào tơ̆ hơnăp tơdrong lôch hơchăng đơ̆ng nhap ƀok Kơdră Quốc hội Lào Xaysomphone Phomvihane. Lơ̆m hla ar chih hơpong, Bí thư Đảng pơlei tơm HCM ƀok Trần Lưu Quang chih:  “Hmach ‘mêm kơ ƀok Xaysomphone Phomvihane, Bơngai jang lơ̆m Anih tơm Chĭnh trĭ, Kơdră Quốc hội teh đak Cộng hòa Dân chủ Nhân dân Lào, bơngai buăl, bơngai jang hơdai tôch kơ joăt kơ Đảng, Teh đak păng kon pơlei Việt Nam.

Tơdrong lôch hơchăng đơ̆ng nhap ƀok Xaysomphone Phomvihane jĭ hiong răm tôch kơ tih hăm Đảng, Teh đak păng Kon pơlei Lào ‘nhŏng oh, jĭ ơh sơ ‘ngon ưh kơ kĕ pơm hơi jơhngơ̆m đơ̆ng unh hnam nhap ƀok; Đảng bộ, Khŭl kơdră păng Kon pơlei pơlei tơm HCM hiong hê̆ bơngai buăl joăt, ling lang ‘măn tơdrong bơngơ̆t truh gĭt kăl hăm tơdrong chĕp răk păng hơtŏk tơiung pơvei gĭt kăl Việt - Lào, lơ̆m noh đei tơdrong pơvei tơbôl, jang hơdai đơ̆ng pơlei tơm HCM păng dôm tơring kơ teh đak Lào”.