Tơ̆ tơdrong jang, kon pơlei jang ka đei roi tơƀôh dôm tơdrong tơm đơ̆ng Luơ̆t ka hơdang sơnăm 2017; pơtho vei sơđơ̆ng kơmăy hơlen lăng tơdrong chă năm, chih hơlen tơdrong rôp yâu ka păng pơm hla ar mưh duk lĕch, vih dơ̆ng tơ̆ tơnŏk. Khul jang kơpal kŭm roi tơƀôh tơdrong gơh băt tang găn sar bar, hơmet pơ 'lơ̆ng tơdrong ưh kơ pŭn ai păng jang hơdai chă dŏng sar bar tơ̆ đak dơsĭ.

Ƀok Đồng Văn Thi, bơngai jang ka phường Phú Thủy tơbăt, dôm tơdrong hlôh vao đei pơhrăm tơgŭm ăn kon pơlei băt hơdăh hơnăp jang mưh jang ka, sơđơ̆ng jơhngâm năm jang tơ̆ đak dơsĭ păng jang ka trŏ luơ̆t.

“Kŭm vih tơ̆ kông đunh bơih, dang ei 'nao jur dơ̆ng, kŭm kơtơ̆ng đe tơroi IUU âu mă lei ƀơ̆t doh sơ̆ kŭm tam mă băt hơdăh. Năr 'nâu ĭnh vang truh hop akŏm, ĭnh hlôh 'nŏh jĭ athei rôp yâu trŏ tơdrong hơgăt, ưh kơ gơ̆h rôp yâu tơ̆ dôm tơring đak dơsĭ teh đak ưh kơ ăn, pơm thoi yơ vă tơdrong jang ka hơdang gơ̆h hơgei".

Kiơ̆ đơ̆ng Ƀô̆ đô̆i vei lăng sơlam teh đak Kơđông Lĭnh vei lăng sơlam teh đak Thanh Hải, hơdai hăm dăr lăng, vei lăng tơ̆ 'măng jang đak dơsĭ păng tơ̆ đak dơsĭ, tơdrong pơtho tơbăt khôi luơ̆t kơtă tơgŭm ăn kon pơlei jang ka băt hơdăh hơnăp jang ưh kơ gơ̆h mơ̆t lơ̆m tơring đak dơsĭ teh đak đe, pơm kiơ̆ dôm tơdrong pơkăp lơ̆m chă rôp yâu ka păng vei sơđơ̆ng ăn bơngai, gre, duk. Đại úy Tạ Hữu Nghĩa, Phŏ Kơdră chĕp kơ̆l Khul Krao hơvơn tơpôl, Kơđông Lĭnh vei lăng sơlam teh đak Thanh Hải tơbăt:

“Kơđông Lĭnh vei lăng sơlam teh đak Thanh Hải kơchăng jang hơdai hăm rim hơnĭh jang, khŭl jang păng khŭl jang kơpal tơlĕch jang hrơ̆ch mĭnh 'măng lơ trong jang, lơ̆m noh akŏm roi tơbăt tơ̆ hơnih hop akŏm păng roi tơbăt tơ̆ dôm tơnŏk ka vă kon pơlei jang ka băt hơdăh rim tơdrong hơgăt đơ̆ng khôi luơ̆t. Hơdai hăm ‘noh, anih jang âu kŭm jang hơdai hơnĭh jang kŭm tơgep tơdrong roi tơbăt khôi luơ̆r lơ̆m rim 'măng hop akŏm vă kon pơlei jang ka hlôh vao păng pơm kiơ̆ 'lơ̆ng rim tơdrong hơgăt lơ̆m chă rôp ka hơdang tơ̆ đak dơsĭ”.

Tơ̆ hơnăp kơnh, Ƀô̆ đô̆i vei lăng tơring sơlam dêh char Lâm Đồng hơnơ̆ng jang hơdai hăm dôm anih jang, tơring hơtŏk tơdrong roi tơbăt khôi luơ̆t tơ̆ tơring tơter đak dơsĭ, vang tơgop pơjing tơdrong jang ka hơgei, hơtŏk tơiung kơjăp păng pơm kiơ̆ đei yua dôm nơ̆r athei đơ̆ng Anih jang châu Âu găh tang găn rôp yâu ka hơdang IUU.