Kiơ̆ trong jang tŏk bŏk đei dêh char pơjing, kơsô̆ hnam trưng mầm non jur đơ̆ng 356 pă 150 tŏ hnam trưng; jăl mônh đơ̆ng 450 jur pă 134 tŏ hnam trưng; jăl ƀar đơ̆ng 284 jur pă 92 hnam trưng. Kơplăh ‘nŏh, trong jang pơjing hơdai hnam trưng jăl mônh – jăl ƀar tŏk đơ̆ng 63 truh 159 tŏ hnam trưng. Jăl pêng, kơsô̆ hnam trưng vă tơjur dang 10 hnam trưng, đơ̆ng 78 jur pă 68 tŏ hnam trưng. Grŭp anoh pơtho tơdrong jang – pơtho ƀô tŭk kŭm đei hơmet ming, jur đơ̆ng 24 pă 9 anih, đei 5 Anih pơtho tơdrong jang – pơtho hŏk ƀô tŭk păng 4 hnam trưng pơtho tơdrong jang. Tơdrong hơmet ming âu kŭm ƀơm truh tơ̆ khul kăn ƀô̆, thây kô, bơngai jang tơ̆ anih pơtho pơhrăm hai. Tơchĕng adrol đei 643 ‘nu hiê̆u trơng, 780 ‘nu phŏ hiê̆u trơng păng 935 ‘nu bơngai jang đei ƀơm truh. Đơ̆ng rŏng kơ tơmât hơdai, lơ hnam trương roi tih ƀiơ̆, vei lăng lơ hnam hŏk ƀiơ̆, athei hơmet ming trong pơgơ̆r ‘nao dơ̆ng.

Yă Lê Thị Thanh Xuân, Kơdră vei lăng Anih pơtho pơhrăm dêh char Đắk Lắk ăn tơbăt, anih pơtho pơhrăm oei jang hơdoi hăm Anih jang Nô̆i vŭ pơjing tơdrong hơgăt atŭm vă pơtho ăn dôm tơring hơmet ming khul kăn ƀô̆ vei lăng: “Truh âu kơnh, anih pơtho pơhrăm vă jang hơdoi hăm Anih jang Nô̆i vụ chih pơjing tơdrong hơgăt atŭm vă pơtho ăn dôm tơring bơ̆ jang, rơih hơmet ming khul kăn ƀô̆ vei lăng. Truh giĕng đơ̆ng rŏng nhôn adrin jang pơkeh tơdrong ‘nâu. Chih hơdăh rim hnam trưng tơm đei 1 ‘nu hiê̆u trơng, 1 ‘nu phŏ hiê̆u trơng oei dôm hnam hŏk tơ̆ pơlei pơla ‘nŏh 1 hnam hŏk đei 1 ‘nu phŏ hiê̆u trơng.”

Tơdrong kăl pơma ‘nŏh kŭm hăm tơjur kơsô̆ hnam trưng, tơdrong dang ei jĭ athei pơm ‘lơ̆ng ăn tơdrong pơtho hŏk pơhrăm tơ̆ dôm hnam trưng ‘nao tơmât hơdai. Mưh 1 hnam trưng đei lơ hnam hŏk tơ̆ pơlei pơla, tơdrong athei thây kô jur pơtho, jơnăr bơ̆ jang đơ̆ng kăn ƀô̆ vei lăng păng hơnăp jang chĕp kơ̆l pơgơ̆r gô roi pơmat tat ƀiơ̆.

Bí thư Đảng dêh char Đắk Lắk Lương Nguyễn Minh Triết athei tơdrong hơmet ming, tơmât hơdai hnam trưng ưh gơ̆h ƀơm ưh ‘lơ̆ng truh tơ̆ đe hŏk tro. Khul kơdră chĕp kơ̆l Đảng dêh char drơ̆ng nơ̆r hăm trong jang yoa Anih vei lăng kon pơlei dêh char tơroi păng athei hơmet pơ ‘lơ̆ng adrol kơ ‘năr 30/8. Adrol kơ ‘năr 12/8 athei tơlĕch tơdrong hơgăt chă rơih hiê̆u trơng, phŏ hiê̆u trơng; atŭm hăm ‘nŏh klăih song hơdăh hơnăp jang ăn đe kăn ƀô̆ vei lăng tơ̆ dôm hnam trưng đơ̆ng rŏng kơ tơmât hơdai, mă loi jĭ dôm hnam trưng đei lơ hnam hŏk tơ̆ pơlei pơla:

“Athei pơm hơdăh hơnăp jang đơ̆ng hiê̆u trơng, hiê̆u phŏ tơ̆ dôm hnam hŏk ‘nao tơmât hơdai. Adrol ki hiê̆u trơng lăp vei lăng 1 hnam trưng đĕch, dang ei đei 5 hnam hŏk tơ̆pơlei pơla ‘nŏh tơjur jơnăr pơtho tơ̆ dôm hnam trưng thoi yơ vă hơmet pơ ‘lơ̆ng tơdrong ưh kơmăh thây kô. Thây kô athei năm pơtho hloi tơ̆ dôm hnam hŏk găh 1 hnam trưng lơ̆m 1 xăh, athei hơmet jơnăr thoi yơ mă lăp, tơdrong ‘nâu athei hơtŏk đon jang rơgei, tơnăp ‘lơ̆ng, klăih song hơdăh hơnăp jang păng tơdrong pơgơ̆r vei lăng đơ̆ng hiê̆u trơng”

Thoi noh, hơmet ming hnam trưng tơ̆ Đắk Lắk ưh lăp vă tơjur kơsô̆ hnam trưng đĕch. Mă găh rŏng sư jĭ dôm tơdrong athei hơmet ming dơ̆ng tơdrong vei lăng, pơtruh thây kô năm pơtho păng pơm ‘lơ̆ng ăn tơdrong hŏk pơhrăm đơ̆ng đe oh hŏk tro.