Lơ̆m hnam kơmăy ‘nao et hơtŏk kơ Kŏng ti pơm bơ̆n mam, nhôm Trần Hồng Quân, hơnih jang kơmăy kơmŏk Nhân Cơ, dêh char Lâm Đồng, dôm kơmăy pơtơm kơdâu. Đơ̆ng rŏng kơ pơm điện phân, nhôm đak đei tăh lơ̆m không, pơm ngach păng kiơ̆ trong pơm tơlĕch jing dôm djrong nhôm mă blŭng đei hơnăn Việt Nam.

Ƀok Trần Hồng Quân, Kơdră chĕp kơ̆l Kŏng ti pơm bơ̆n mam, nhôm Trần Hồng Quân tơbăt, jăl pơm mă blŭng kơ hnam kơmăi 450.000 tân/sơnăm, hlôi bơ̆jang sơđơ̆ng 'lơ̆ng. Hơnih mơdro sa tơchĕng hơdrol tŏk truh 300.000 tân/sơnăm lơ̆m jăl khei mă IV sơnăm ‘nâu păng iŏk đei pơđĭ kŏng suơ̆t lơ̆m jăl khei mă I/2027. Tơ̆ rŏng kơ dôm djrong nhôm mă blŭng 'noh jĭ trong yak hloh jĭt sơnăm yak hloh lơ mơmat tat găh jên, kơmăy kơmŏk păng hơnih jang kăl.

“11 sơnăm chang gô, truh dang ei, Kŏng ti pơm bơ̆n mam, nhôm Trần Hồng Quân chơt hơiă roi tơbăt djrong nhôm mă blŭng kơ Việt Nam. Lơ̆m kơplăh pơjing hnam kơmăy tơƀơ̆p ưh kơ tŏ sĕt tơdrong mơmat tat, tơhlăk tơhlĭn. Mă lei, hăm tơdrong bơngơ̆t truh pơgơ̆r đơ̆ng Đảng, Khŭl kơdră teh đak, tơdrong vang yak hơdai đơ̆ng khŭl kơdră tơring, khŭl jang jên hu, anih jang hơdai păng đĭ đăng kang ƀô̆, bơngai jang, nhôn hlôi ƀrư̆ ƀrư̆ yak hloh vă jang đang tơdrong jang".

Djrong nhôm mă blŭng ư̆h khan lăp tơƀôh mĭnh tơmam 'nao đei gơ̆h pơm đei lơ̆m teh đăk. Ƀơ̆t iŏk đei kŏng suơ̆t mĭnh sơnăm 450.000 tân, kơjă pơm tơlĕch đơ̆ng tơdrong jang kĕ iŏk đei dang 1 ti 400 rơbâu USD mĭnh sơnăm, hơtŏ dang 36.000 ti hlak jên. Hơdai hăm 1.000 bơngai bơ̆jang kơtă đei gơh hơgei păng vei lăng, tơdrong jang gơh pơm dơ̆ng dang 3.500 trŭh 4.000 tơdrong jang lơ̆m pơtruh tơmam, unh hơyuh, chơ pơdŭ, logistics, kơmăy kơmŏk, pơvĭh pơvăn păng tĕch mơdro.

Hăm Nhân Cơ, dôm kơsô̆ ‘noh tŏk bŏk pơih đei 1 hơnih hơtŏk tơiung ‘nao. ‘Meh vă bơngai jang ki thuơ̆t, hnam oei, chơ pơdŭ, logistics, tĕch mơdro, pơvih pơvăn gô tŏk kiơ̆ tơdrong jang hnam kơmăy. Tơring kŭm tŏk bŏk hơmet ăn teh vă sơng rim tơdrong jang kơmăy kơmŏk đơ̆ng rŏng dơ̆ng.

Kiơ̆ kơ ƀok Phan Anh Tuấn, Bí thư Đảng ủy xăh Nhân Cơ, mĭnh ƀar ‘nu bơngai jang mơlôh hlôi đei ăn năm hŏk pơhrăm vă hơmet ăn bơ̆jang tơ̆ hnam kơmăy. Hơtăih ƀiơ̆, tơring tŏk bŏk jô̆ hơlen chĕng hơmet Hơnih jang kơmăy kơmŏk Nhân Cơ 2 dang 400 hek tar; hơdai hăm hơmet ăn hơnih ăn hnam oei kŏng nhơ̆n, bơngai joăt jang, logistics, tĕch mơdro păng dôm tơdrong jang pơm tơlĕch ‘lơ̆ng đơ̆ng rŏng nhôm.

“Găh đunh đai, hăm Nhân Cơ 'noh nhôn kŭm hlôi hơmet ăn dôm tơdrong hiôk vă sơng đei tơmơ̆t jên jang, pơtrŭt tơmơ̆t jên jang, hơvơn rim bơngai tơmơ̆t jên jang mơ̆t bơ̆jang dôm tơmam pơm ‘lơ̆ng nhôm.. Hrei ‘nâu hnam kơmăi 'nao pơm tơlĕch đei nhôm djrong, tam mă tơlĕch đei dôm tơmam đơ̆ng rŏng nhôm... Nhôn hlôi hơmet ăn teh, prŏh hơmet hơnih jang kơmăi kơmŏk, logistics, tĕch mơdro vă sơng iŏk ăn tơdrong htŏk tơ iung tơ̆ hơnăp kơnh".

Ưh khan lăp pơm tơlĕch nhôm djrong, hnam kơmăy oei gô pơih să pơđĭ mĭnh trong jang pơm tơlĕch găh rŏng. Nhôm kim loại gơh jing tơmam tơm ăn dôm anih jang kơmăy kơmŏk pơm tơlĕch, tơmam 'nao, kơmăy điên tư, trong nơnăm, gre kơdâu păng ŭnh hơyuh rơgoh. 'Noh kŭm jing trong hơtŏk tơiung Lâm Đồng tơlĕch ăn đơ̆ng rŏng kơ jơnei pơm tơlĕch nhôm djrong mă blŭng. Ƀok Y Thanh Hà Niê Kđăm, Bơngai jang lơ̆m Trung ương Đảng, Bí thư Đảng dêh char Lâm Đồng pơma hơdăh:

“Đơ̆ng tơmam drjong nhôm mă blŭng, ưh khan lăp tơƀôh hơdăh tơdrong 'lơ̆ng găh pơm tơlĕch mă oei pơih đei tơdrong hiôk pơjing đei trong jang kơmăy kơmŏk 'nao, sơng đei dôm anih jang kơmăy kơmŏk pơm tơlĕch, tơmam 'nao, kơmăy kơmŏk tơgŭm, tơmam điên tư, trong nơnăm, ŭnh hơyuh rơgoh păng lơ tơdrong jang kơmăy kơmŏk 'nao hơtŏk tơiung tơ̆ dêh char Lâm Đồng kŭm nhen tơring Tây Nguyên".

Đơ̆ng teh gôh bazan truh dôm djrong nhôm rang hơdăh 'lơ̆ng jĭ jăl trong hơnhăk tơmam drăm yak tŏk dơ̆ng mĭnh hơyak lơ̆m kơjă kăp gĭt. Ƀơ̆t đak nhôm tŏ ro lĕch tơ̆ Nhân Cơ, Lâm Đồng tŏk bŏk đei pơ ‘yoi hăm dôm hnam kơmăi pơm tơlĕch jrŭ, kơjă kăp gĭt đơ̆ng bauxite Tây Nguyên gô ưh lăp đei jô̆ hăm tơmam drăm kăl lơ̆m teh đak đei sir iŏk, mă hăm kơmăy kơmŏk, tơdrong jang păng kơjă kăp gĭt tŏk bŏk đei pơjing kơtă hloi tơ̆ tơring teh ‘nâu.