Tơ̆ dôm bơbŭng hnam iĕr tơ̆ plei Đoàn Kết, xăh Tân Hội, dêh char Lâm Đồng, dôm hlak pin unh điên măt ‘năr đei chô̆ hơmet ‘lơ̆ng vă sơng iŏk măt ‘năr pơchrang. Tơ̆ lăm, iĕr đei rong kiơ̆ trong klĕp ‘lơ̆ng; kơtăp iĕr đơ̆ng rŏng kơ dônh, rơih hơmet păng tăh lơ̆m tơpu đei bơ̆ jang tôch ‘lơ̆ng, chih hơdăh anih rong hăm mã QR.

'Nâu jĭ trong jang “Kơtăp iĕr 'lơ̆ng” đơ̆ng 1 anih jang, tơmât hơdai hăm unh hơyuh rơgoh, kơmăy kơmŏk 'nao, tơplih hăm kơmăy sô̆ păng jang mŭk drăm klĕp 'lơ̆ng. Unh điên măt 'năr vang pơm tơjur ƀiơ̆ jên jang; pơgang păng tơmam vi sinh đei tăh lơ̆m tơmam hiĕm; ich iĕr đei pơm hơmet jing mơ̆r. Ƀok Phạm Trọng Tâm, tơ ‘ngla anih jang tơroi, sư oei pơjing trong jang rơđăh 'lơ̆ng, rơgoh păng pơjing đei kơjă măk ƀiơ̆: “Nhôn ưh đei tĕch 1 pôm kơtăp iĕr hmă đĕch, mă tĕch hloi đon lui păng kơmăy kơmŏk, pơm hơtŏk kơjă kơtăp iĕr, vei lăng ‘lơ̆ng jơhngâm pran tơpôl păng pơm hơtŏk kơjă mŭk drăm”.

Trong jang tơ̆ Tân Hội ăn ƀôh, khoa hŏk lăp pơjing đei kơjă tơmam tơpă mưh tơdrong tơchĕng hơlen đei, đei tơmât yoa lơ̆m tơdrong jang xa, tĕch mơdro păng đei anih tĕch mơdro lăp đon. ‘Nâu kŭm jing nơ̆r pơtho lơ̆m tơdrong Tơchơ̆t 57 đei tơlĕch jang kiơ̆ jing tơdrong đei tơpă tơ̆ yăn âu tơ̆ Lâm Đồng mưh tơplih đơ̆ng tơchĕng hơlen hơdrô̆ jing sek tơlang kiơ̆ dôm tơdrong 'mĕh vă lơ̆m tơdrong jang xa. Hăm choh jang xa, hơdai hăm pơjing tơring pơtăm, ƀơk ăn kơsô̆ tơring pơtăm păng anih tăh tơmam, dêh char oei athei hơmet pơ 'lơ̆ng dôm anih 'măn răk tơmam, logistics, vei lăng, pơchrang điên păng hơmet pơ 'lơ̆ng đơ̆ng rŏng kơ phĕ vă pơm hơtŏk kơjă tơmam.

Đơ̆ng 2026-2027, dêh char Lâm Đồng tơlĕch đon pơhnŏng tơgŭm ăn tŏ sĕt hlŏh 20 tơdrong tơchĕng hơlen păng pơtho tơƀôh trong jang hăm kơmăy, 20 hla ar pơkăp tơchĕng hơlen – jang tŏk, 30 anih jang tơplih ‘nao hăm kơmăy kơmŏk păng 300 anih jang iĕ păng păh lăp tơplih hăm kơmăy sô̆; hơdai hăm ‘nŏh pơjing 3 trong jang hơdoi mưh tơchĕng hơlen, tơmât yoa păng tĕch mơdro hăm kơmăy.

Vă jang đei dôm tơdrong ‘nâu, pơjing đei kơjă tơ̆ yăn âu, dôm trong jang đơ̆ng tơring pơtăm, jang đei tơmam truh pơm hơmet păng tĕch mơdro athei tơmât hơdai jing mĭnh. Ƀok Nguyễn Ngọc Phúc, Phŏ Kơdră vei lăng kon pơlei dêh char Lâm Đồng, tơroi, dêh char oei pơ ‘nhŏ hơdrol ăn tơdrong tơmât yoa kơmăy rơgei vă pơm hơtŏk tơdrong đei yoa mưh jang xa, pơm hơtŏk kơjă păng kơsư̆k pơjei: “Lâm Đồng đei lơ tơdrong pran ‘lơ̆ng găh choh jang xa hăm kơmăy kơmŏk ‘nao, pơm hơmet tơmam đơ̆ng jang đei, pơm tơlĕch unh hơyuh rơgoh. Tơdrong kăl hlŏh ‘nŏh athei tơmât hơdai rim tơdrong ‘lơ̆ng jing trong jang hơdăh ‘lơ̆ng, jang đei tơmam ‘nao, kơmăy kơmŏk ‘nao, trong jang xa ‘nao, hơnhăk ba iŏk yoa ‘lơ̆ng ăn kon pơlei, anih tĕch mơdro păng tơdrong jang mŭk drăm kơ dêh char gơ̆h tŏk truh 2 kơsô̆, pơm hơtŏk kơsư̆k pơjei ăn dêh char”.

Đơ̆ng trong jang rong iĕr iŏk kơtăp 'lơ̆ng tơ̆ Tân Hội truh dôm tơdrong hơmet pơ 'lơ̆ng kơjă tơmam păng tơplih hăm kơmăy sô̆, Lâm Đồng oei dar deh hơnhăk Tơdrong tơchơ̆t 57 mât tơ̆ yăn âu, pơm ăn khoa hŏk, kơmăy kơmŏk păng tơplih 'nao rơgei jing jơhngâm pran vă jang tŏk mŭk drăm tơ̆ tơring.