'Măng năm tơmang jĭ kăp gĭt hloh đei pơtơm trŏ ah năr tơbăt 50 sơnăm iung jang tơbôl Việt Nam - Thái Lan, tơgop hơtŏk Tơdrong jang tơbôl tôm tơdrong Việt Nam - Thái Lan roi năr roi hơtŏk 'lơ̆ng păng tơnăp. Ƀar ƀok kơdră drơ̆ng nơ̆r pơtoi hơtŏk đon lui gah chĭnh trĭ kiơ̆ đơ̆ng tơdrong akŏm pơma đam đe kơdră kơpal kơ dôm jăl jang; iŏk jang tơnăp dôm tơchơ̆t jang hơdoi kăp gĭt, mă kăl noh tơdrong hop akŏm atŭm kơ jơnŭm pơgơ̆r teh đak kơyuơ Thủ tướng 2 teh đak pơgơ̆r; atŭm pơm jang đei jơnei tơnăp Tơdrong tơlĕch jang Tơbôl tôm tơdrong Việt Nam - Thái Lan jăl jang 2026-2031 hăm dôm tơdrong đei jơnei hơdah lơ̆m dôm tơdrong jang vei sơđơ̆ng tơpôl, jang mŭk drăm, khua hŏk, kơmăi kơmŏk 'nao, joh ayŏ, tơmang pơhiơ̆ păng hơpeh hơpong kon pơlei.

Ƀar ƀok kơdră drơ̆ng nơ̆r hơtŏk jang đei jơnei Tơchơ̆t jang "3 hơnih jang tơroh dih băl", hơtŏk tơroh asong tơmam drăm, hơnih jang mŭk drăm, tơring păng dôm tơchơ̆t jang hơtŏk tơ-iung kơjăp sơđơ̆ng; iŏk jang đei jơnei Tơdrong jang mŭk drăm Hơlĕch – Pơmơ̆t păng Tơring jang mŭk drăm gah Pơbah; pơih să trong nơnăm, trong gre păr păng trong đak dơsĭ; hơvơn hơnih jang mŭk drăm kơ 2 teh đak hơtŏk tơdrong asong jang; iŏk yua tơnăp tơchơ̆t jang kơ Hơnih jang hơdoi Tĕch pơdro Việt Nam - Thái Lan, hơdrin keh đang hrôih tơchơ̆t tĕch răt tơmam drăm kơ 2 teh đak đei truh 25 tih đôlar, pơkăp truh 50 tih đôlar kiơ̆ trong hơtŏ hơnơ̆ng păng kơjăp sơđơ̆ng.