Tơ̆ jơ tơƀâp, bơngai tăh hla athei dêh char hơnơ̆ng tơlĕch jên jang ming man hrơ̆ch ‘lơ̆ng anih jang, trong nơnăm tơ̆ achon kông Hải Minh; tơjur tơlei unh điên lơ̆m teh tơ̆ dôm jăl trong glung tơm vă pơm tơjur ƀiơ̆ hiong răm đơ̆ng ‘mi kial hơbŭt; hơtŏk hrĕnh tơdrong hơmet ming tơring kơdrâm, vei lăng cham char đak dơsĭ; păng bơ̆ jang rơđăh rơđong mưh hơmet ming hnam trưng đơ̆ng rŏng kơ tơmât hơdai. Lơ nơ̆r pơma, athei dêh char đei trong jang atŏk tơiung chă tơmang lăng, tơklep hăm vei sơđơ̆ng păng pơm hơtŏk tơdrong ‘lơ̆ng lơ̆m tơdrong arih xa kơ kon pơlei.

Pơma nuh hăm bơngai tăh hla, Kơdră vei lăng kon pơlei dêh char Gia Lai Phạm Anh Tuấn pơma hơdăh, dêh char vă pơ ‘nhŏ hơdrol jên jang pơm hơmet anih jang, trong nơnăm tơ̆ dôm tơring gĭt kăl, hơdai hăm vei lăng sơđơ̆ng ‘lơ̆ng ăn kon pơlei păng jang tŏk pran kơjăp. Atŭm hăm ‘nŏh, hơtŏk tơdrong hơmet ming tơring kơdrâm, vei lăng ‘lơ̆ng jih trong, vei lăng cham char đak dơsĭ păng pơjing Quy Nhơn jing tơring kơdrâm chă tơmang lăng rơgei, sơđơ̆ng ‘lơ̆ng hơiă, lơ̆m noh tơdrong vang yak hơdai đơ̆ng kon pơlei ‘nŏh jĭ tơdrong gĭt kăl hlŏh.