Truh dang ei, tơlĕch kon jên teh đak tơmơ̆t jang kơ dêh char ‘nao jơnei 30% trong tơlĕch ăn, tŏ sĕt hloh pơtêng hăm jô̆ hơtŏ lơ̆m teh đak. Dang ei lơ̆m dêh char đei hloh 100 tơdrong vă jang kăl hơmet pơ ‘lơ̆ng tơnap tap, tơhlăk tơhlĭn, lơ̆m ou đei 50 tơdrong vă jang găh Hơnih vei lăng kon pơlei dêh char Quảng Ngãi tơchơ̆t. Tơ̆ hơnăp tơdrong ou, Kơdră chĕp pơgơ̆r Hơnih vei lăng kon pơlei dêh char Quảng Ngãi athei rim hơnih bơ̆ jang, tơring păng Hơnih vei lăng kon pơlei rim tơring, phương dăr lăng rim tơdrong vă jang, xơkơ̆t hơdăh tơdrong tơm pơm ăn iung jang hiơ hiơ̆, tơtom hơmet pơ ‘lơ̆ng dăh mă tơroi tơbăt dôm tơdrong tơnap tap. Rim hơnih bơ̆ jang vei lăng tơdrong vă jang kăl kĭ pơkăp hăm Hơnih vei lăng kon pơlei dêh char Quảng Ngãi jang keh đang tơlĕch kon jên jang 100% trong tơlĕch jang jên hu lơ̆m sơnăm ou.